«Будудмурт» проект улэп

Тодӥськоды на ке, та проект сярысь газетамы кык ар талэсь азьло гожтӥськеммы вал ини.

«Будудмурт» — тазьы нимаське выль проект, кудӥз Татарстан Республикаын улӥсь 10-15 аресъем удмурт нылпиос понна чакламын. Проектэ культуралэн пӧртэм удысъёсыз пыртэмын, соин но авторезлэн, Анна Самсоновалэн, верамезъя, та юрттоз нылпиослы вакчи дыр куспын удмурт калыклэсь пуштроссэ валаны» — тазьы кутске вал Наталья Жуковалэн та проектлы сӥзем статьяез. Соку, 2019-тӥ арын, Покчи Лӧзя шоръёзо школаын Татарстанысь удмуртъёслэн лулчеберетъя йӧскалык автономизылэн егитъёсын ужан ёзэзлэн азьветлӥсез Анна Владимировна Самсонова #будудмурт шуыса нимам аслэсьтыз та тунсыко проектсэ улонэ пыӵатэм вал. Со дырысен кык ар ортчиз. Тани туэ та проект выльысь улӟиз, выльысь Покчи Лӧзя школае берытскиз но южтолэзьлэн пумаз но оштолэзьлэн кутсконаз куинь нунал ӵоже отын ужаз. 

Тодады вайытӥськом, проект Татарстанын улӥсь 10-15 аресъем пиналъёс понна (нылпиос пӧртэм калыкысь луыны быгато) чакласа радъямын вал шуыса. Валтӥсь курон — удмурт кылэн, лулчеберетэн, огъя вераса, удмуртлыкен тунсыкъяськон.

Туэез ужрад мукетгес форматэн ортчиз, со удмурт кылэз но лулчеберетэз дышетскись 14-15 аресъем быдэ вуымтэосын урокъёс бере ужанлы сӥземын вал. Вакчияк вераса, пиналъёслы творчествоен вырыкузы но ваньмон дырзэс пайдаё ортчытон понна туала технологиосты пыртыса ужан формат ӵектэмын вал. Ужрадлэн нырысетӥ нуналаз проектлэн авторезлэн. Казаньысь лулчеберетъя кун институтысь магистрлэн Анна Самсоновалэн но асьме аспалмылэн, Тагашур гуртысь егит дизайнерлэн Татьяна Константиновалэн кивалтэмзы улсын 8-тӥ классын дышетскись пиналъёс туала дизайнэн но декоративно-прикладной творчествоысь этнофутуризм ӧрен тодматскизы, удмурт пужыосын нимысьтыз туспуктэмъёсты лэсьтон инты радъязы (фотозона).

Кыкетӥ нунал сӥземын вал этноблогинглы. Нылпиос со нуналэ шошма удмуртъёслэн кырӟанъёсынызы но эктонъёсынызы тодматскизы. Таяз радэ ужрадлэн куноез луиз Сырья гуртысь кубызчи Николай Иванович Плотников. Со пиналъёсты калык инструментъёсын тодматӥз. Нылпиос кубыз улсын сюан гурез кырӟаны но апай эктонэз эктыны, арган шудэм улсын ӟуч кылысен удмуртэ берыктэм кырӟанъёсты быдэстыны дышетскизы.

Куинетӥ нуналаз Анна Владимировна #будудмурт проектлэн кыкетӥ этапезлы йылпумъянъёс лэсьтӥз, озьы ик пиналъёсын удмурт калык шудонъёсты дышетӥз, нош дизайнер Татьяна Константиноваен ӵош нылпиос мастер-класс ортчизы но италмас сяськалэсь брошь лэсьтӥзы.

Тӥни озьы куинь нунал ӵоже Покчи Лӧзя школаысь 8-тӥ классысь пиналъёс огъя удмурт калык, сям-йылолъёс сярысь тодон-валанъёссэс муромытӥзы, удмурт калык кырӟанъёсын, эктонъёсын, дизайнэн тодматскизы.

Проектлэн туэ выльысь улонэ пыӵамез шумпоттэ. Татын Покчи Лӧзя шоръёзо школалэн коллективез но бадӟым инты басьтэ шуыса вераны янгыш уз луы. Та ласянь нимысьтыз пусйыны кулэ 8-тӥ класслэсь кивалтӥсьсэ Наталия Артемьеваез, удмурт кылъя но литературая дышетӥсьёсты Ольга Пчельниковаез но Наталия Антоноваез, озьы ик школалэсь директорзэ Эмиль Гариповез. Соослэн тыршемзылы но юрттэмзылы луыса #будудмурт проектлы азинскыны луонлык кылдӥз.