Бускельёсмы дорын лауреат луизы

Сяме пыремын ини, тулыспал толэзе котькуд удыс «сайканы» кутске. Арлы быдэ Малмыж улосвылысь Вятской Полянаын удмуртъёслэн «Бускельёсын пумиськон» улоскуспо фестивальзы ортче. Туэ со 4 тулыспалэ радъяськиз.

«Бускельёсын пумиськон» фестиваль удмурт кылэз но сям-йылолъёсты гажась адямиос понна туж матын но кема витем ужрад луэ. Удмурт лулчеберетэз но кылэз азинтон вылысь радъям фестиваль бордаз сыӵе ик сюлмаськись адямиосты люка. Татчы лыктэм куноос удмурт калыклэн дӥськутэнызы, чебермам тӥрлыкъёсынызы, пӧртэм пумо сиён-юонъёсынызы тодматскыны быгатӥзы. Озьы ик таӵе пумиськонъёс бускельын улӥсь удмуртъёсын шуныт кусыпъёсты возьыны юрттэ.

VII-тӥ улоскуспо фестиваль таяз аре но узыр, шуныт мылкыдъёсын тырмиз. Татчы люкаськизы Татарстанысь, Марий-Элысь, Свердловск улосвылысь, Москваысь куноос. Асьме ёросысьтымы та фестивале Балтась лулчеберетъя юртысь «АйТаиФи» квартет, «Орчык» кырӟанъя инструментальной ансамбль пыриськизы, озьы ик ужрадэз шулдыртӥз «Мылкыд» ансамбль. Соос сцена вылын мыло-кыдо, рос-прос дасям номеръёс возьматӥзы. Артистъёсмы учкисьёсты жингрес кырӟанъёсынызы, задор эктонъёсынызы синмаськытӥзы. Таланто артистъёсмылы азьланяз но азинсконъёсы вутскыны мылкыд кариськом! Нош фестиваль азьпалан но мед сяськаяськоз!