«Данъяськыны ас выжыосыдлэн данэнызы яра гинэ ӧвӧл, кулэ но...» (А. С. Пушкин)

Мыным кельше история. Трос-трос аръёс талэсь азьло адямиослэсь кызьы улэмзэс, маин выремзэс, дуннеын ма луэмзэ тодонлэсь тунсыко номыр но ӧвӧл, дыр.

Эшшо мон яратӥсько пӧсь шоколад юонъям ӵужанаеным вераськыны, яратӥсько солэсь альбомъёссэ эскерыны, отын выпускникъёс Атыкай музъеммес утись ӵыжы-выжыоссы сярысь очеркъёс дасяллям. Монэ тунсыкъяськытӥз — малы ӵужанай сое лэсьтӥз? Ӵужанае валэктӥз, озьы со дышетскисьёсаз ӵыжы-выжыоссылы но матысь адямиоссылы, Атыкай музъемзылы таукарон мылкыд пыӵатӥз шуыса.

Быдӟым ож — со кунмылэн историысьтыз аспӧртэм бам... Со 80 ар талэсь азьло йылпумъяськиз, нош тодэ ваён али но улэ. Со улоз котьку, асьмеос со сярысь верамы ке, ожын быремъёсты буре вайыса улӥмы ке. Та кышкыт ож котькуд коркаез, котькуд семьяез йӧтӥз.

Семьяямы ми ӵыжы-выжыосмес сӥлы карыны дышемын. Анае шуэ, мон соосты тодыны но тодын возьыны кулэ шуыса. Со понна анай выжы писпу кылдытӥз. Мон асьме писпулэн витетӥ поколениез луисько. Мынам ӵыжы-выжыосы огшоры адямиос луиллям: лякытэсь но даноесь, крестьянъёс но черкын ужасьёс, дышетӥсьёс но эмчиос, колхозникъёс но ожгарчиос. Но тужгес пусйымонэз — соос вал кунмес яратӥсь адямиос. Ӵапак соос сярысь ик мынам вераме потэ.

Мынам пересь ӵужанае (ӵужанаелэн анаез) Шафигуллина Эммикамал Шафигулловна вордскемын 1908-тӥ арын Балтась ёросысь Янгул гуртын.

Нырысетӥ дунневыл ож дыръя соослэн атайзы быре. 1917-тӥ арын кулэ песянайзы, ар ортчыса — анайзы. Куинь нылпиос сирота кылё. Бадӟымезлы (мынам пересь ӵужанаелы) 10 арес луэ, Минзифалы — 7 арес, покчиезлы, Сабиралы — 2 арес. Ассэ сюдон понна пересь ӵужанаелы кураськыны потоно луэ: мурт нылпиосты утьыны, корка котырын утялскыны — ляльчи кадь улэ со. Нош покчи сузэръёссэ нылпи юртэ келяло но соослэн пыраклы пытьыоссы ышо. 1980-тӥ аръёсы пересь ӵужанае покчи Сабира сузэрезлэсь адрессэ шедьтэ (со кыӵе ке министрлы бызем но со вакытэ Узбекистанын улэм вылэм), но гожтэт гожтыса уг вутты....

18 арес тырмыса, пересь ӵужанае Янгул гуртэз кельтэ но Казане кошке. Ужа мех фабрикаын: шубаос вуре.

1941 ар. Немец фашистъёс асьме шаермы вылэ омырско. Кутске Быдӟым тылож. Шугадӟонъёс, шимес учыръёс, курадӟонъёс, кышкан, кайгу но сирота улон вайись ож.

Война кутскем бере ик пересь ӵужанайме танкъёслы пумит окопъёсты гудыны ысто, собере со отличиен йылпумъя эмсузэръёслэсь курсъёссэс. 1943-тӥ арын 20-тӥ ошттолэзе сое мобилизовать каро но «Грибояга» санитарной пароходэн фронтэ келяло. Гужем Белоруссиын сыпной тифен висьыны усе но Гомель котырысь военной госпитальын эмъяське.

Бурмемез бере госпитале кыле. 3 ар 8 толэзь ужа со госпитальёсын. Берпуметӥез, кытын со ужаз, Арча городысь 3655 номеръя эвакуационной лагерь луэ. Сӧсырмемъёсты отчы Сталинград фронтысь вайылӥллям.

3655 номеро эвакогоспиталь 1941-тӥ арын гудырикошконэ Арчаын ёрос больницалэн, 2 номеро школалэн но педучилищелэн (туннэ 3 номеро школа) юртъёсазы усьтӥське но сӧсырмем советской солдатъёсты кутыны кутске. 2 номеро школалэн интыяз туннэ мечеть интыяськемын. Госпитальын ёросысь эмъясь сузэръёс сяна, шаермылэн пӧртэм сэрегъёсысьтыз эмъясьёс но эмсузэръёс ужаллям. Эмъясьёс тырмиллямтэ, соин ик эмсузэръёс сӧсырмемъёслы вань кулэ луись юрттэт сётӥллям. Куддыръя соослы операциос но лэсьтоно луылэм, малы ке шуоно хирургъёсты ӵемысь фронтэ басьтылӥллям. Больницаын ужам сяна, соос эвакогоспитальлэсь гурзэ эстыны пу дасяллям, госпитальлы сиён-юон сётӥсь колхозъёслы юрттӥллям.

1943-тӥ арын южтолэзе госпитальын кутыны кутскиллям сӧсырмем пленнойёсты. Эмъясьёс, эмсузэръёс, санитаръёс соосты эмъяны, валаса учкыны тыршиллям, ог-огзэс вӧсь медаз каре шуыса тыршиллям. Пленнойёс пӧлын немецъёс гинэ вылӥллямтэ, румынъёс, французъёс, итальянецъёс, чехъёс, словакъёс, полякъёс, австриецъёс, мадьяръёс но луиллям.

Татарстанын 4 сыӵе госпиталь луэм. Гиппократлэн кыл сётонэзлы оскымон кылем эмъясьёс девизэн ужаллям: котьма ке но калыклы юрттоно. Соос сӧсырмемъёсты тушмонэз кадь ӧвӧл, юрттэтлы кулэяськись висисьёсты кадь адӟыны дышетскиллям. Госпиталь 1 сюрс интылы чакламын луэм. Соос висиллям тифен, туберкулёзэн, трахомаен, дифтериен. Тифен 105 эм ужасьёс но висьыны усиллям, соос пӧлысь 7-ез улонысь кошкиллям.

9-тӥ Май 1945-тӥ ар! Вормон! Кызьы возьмазы та кылэз секыт ож вакытэ. Нош кыӵе пумтэм шуд вал та нуналъёсы Вормон!

1947-тӥ арын гудырикошконэ пересь ӵужанаймес Арчаысен Балтасе, ёрос больницае, ысто. Но инты луымтэен со огдырлы Гондыргуртэ ужаны мынэ. Собере озьы ик та гуртэ кыле, нылзэ будэтэ, кудӥз бератаз бускель гуртысь пияшлы бызе, собере нунокъёссэ будэтэ: мынэсьтым анайме но анайлэсь сузэрзэ.

Пересь ӵужанае данъямын пӧртэм данъетъёсын, кылсярысь, Сталин нимо грамотаен, медальёсын, соос пӧлын «За отвагу», «За освобождение Сталинграда» медальёс но, ож бере сётэмъёсыз но вал. Но наградаосыз утиськиллямтэ — ӵужанае пичи дыръяз соосын шудэм, ыштэм. Анаез ож сярысь тодаз вайыны, вераськыны ӧз яратылы, шуэ ӵужанае. Соин но, дыр, медальёс солы сокем дуно ӧй вал.

Туж потэ вал пересь ӵужанае сярысь тросгес тодэме, «Память народа» сайт пыр учкыны малпай, но, жаляса верано, одӥг чур но отысь ӧй шедьты. Собере тодӥ, военнопленнойёсын ужамъёс сярысь тодэтъёс секретной шуыса.

Нош тани ӵужатайлэсь атайзэ «Память народа» сайтысь шедьтыны луиз. 

Степанов Александр Степанович вордскемын 1910-тӥ арын Балтась ёросысь Ярак-Чурма гуртын. Семьяяз со 2-тӥ пинал луэм, бадӟымез Лизавета апаез, покчиез Пётр выныз. Агаен-вынъёс Атыкай музъеммес утьыны нырысетӥ нуналъёсысеныз ик кошкиллям.

Мынам пересь ӵужатае быдэс войнаез ортчем, Берлинозь вуэм!

1941-тӥ арын ныры-сетӥ толэзьёсаз сое 33-тӥ нимаз специальной назначения инженерной бригадае пырись 8-тӥ нимаз электротехнической батальонэ юнмато. Батальонысь солдатъёс ожутиськон электро котыртэтъёс лэсьтыло. Сайтъёстӥ, архивъёстӥ учконо ке, тодыны луэ пересь ӵужатаелэсь ож сюрессэ. Россиысь Утиськонъя министерстволэн Центральной архиваз Александр Степановичлэн бамаз таӵе гожтэмез вань — 8 оэтб 212сп 49 сдЗапФ. Та гожтосэз ми расшифровать карыны быгатӥмы: 8 оэтб — со 8-тӥ нимаз электротехнической батальон, 212 сп — 212-тӥ стрелковой полк, 49 сдЗапФ — 49-тӥ Западной фронтлэн стрелковой дивизиез.

Нош 49-тӥ стрелковой дивизилэсь сюрессэ эскероно ке, тодыны луэ, Со Сталинград оже, Курск оже пыриськемын шуыса. Белоруссиез но Литваез мозмытэм. Варшава кар вӧзын тушмонлэсь обороназэ чигтэм, Вислаез но Одерез пырпотэм, туж зол юнматэм Франкфурт-на-Одереез штурмовать карем. Нош война пумын Берлинын тушмонэз быдтэм.

Ӵужатае шуэ вал, атаез, пе, уг яраты вал война сярысь вераськыны, но куддыр куд-ог фактъёс вераськон вискытӥ потылӥллям. Одӥг пол, соос кык машинаен мынӥллям но немец самолётъёс пуштытъяны кутскиллям, вань солдатъёс ватсконэ пегӟиллям, нош машинаосы пуксьыкузы, пересь ӵужатаелы аслаз машинаяз инты кыльымтэ но со мукет кузове пуксем. Нош аслэсьтыз машиназэ пуштытӥллям... 

Пересь ӵужатае 3 медальёсын пусъемын. Кык «За отвагу» медаль но 1945-тӥ арын «За Победу над Германией в Великой Отечественной войне 1941-1945 г. г.» медальёс.

«Память народа» сайтэз учкыса, адӟимы архивъёсын утиськись приказъёсысь выпискаосты. Та гожъямъёсты лыдӟыса, кышкыт луэ, кӧня куректон усиз пересь ӵужатаелы. Но огдыре ик мон соин данъяськисько, угось со сыӵе сэзь но кышкасьтэм луэм.

Одӥгзэ «За отвагу» медальзэ со басьтэм 1943-тӥ арын шуркынмонэ кужмо тыл улын ляб адӟиськись электро котыртэт пуктэмез понна.

Война бере Александр Степанович бертэ семьяез доры, кытын соку будэ вал ини 8 аресъем Василий пиез. 1948-тӥ арын вордӥськем мынам песятае, Пётр Александрович, кудӥзлы пересь песятае бырем вынызлэсь нимзэ сётэ, собере — песятаелэн Пелагия сузэрез.

Пересь ӵужанае но пересь ӵужатае бускель гуртъёсын улӥллям. Пересь ӵужанае фельдшер луыса ужам, нош пересь ӵужатае — колхоз председатель. Соос но, шаерамы вань улӥсьёс сямен ик, куашкам бервылысь ӝутӥзы вордскем шаерзэс. Мон данъяськисько соосын.

Пересь ӵужатаелэн выныз, Степанов Пётр Степанович, вордскемын 1913-тӥ арын. 8 классэз йылпумъям но МТС-ын ужам. 1937-тӥ арын кышнояськем, нош 1938-тӥ арын Иван пиез вордскем.

1939-тӥ арын Пётр Степанович финн оже кошкем, ар ортчыса, берытскем. Ӝоген Марфа нылыз вордскем. Но, жаляса верано, 1941-тӥ арын Быдӟым тылож кутске но со нырысетӥ нуналъёсысеныз ик со фронтэ кошке. Нош 1941-тӥ арын коньывуонэ ӵыжы-выжыосызлы ивор вуэ, со ивортэк ышиз шуыса.

«Память народа» сайтын одӥг гинэ документ кылемын, отын гожтэмын, ку сое оже басьтӥзы — 1941-тӥ арын 26-тӥ инвожое 97-тӥ стрелковой полке.
«POISK. RE» сайтын вань сыӵе чуръёс: войнаысь бертэм ӵош служить карем эшезлэн Иванов Алексейлэн кылъёсызъя: «концлагерьын луыса но немец офицер дорын ужаса, со милемлы сиён вайылӥз, туж кышкыт вал ке но, угось фашистъёс туж лекесь вал, котькыӵе вакытэ сое кутыны но ыбыны быгато вал. Оло, солы луыса гинэ мон улэп кыли».

Мон туж данъяськисько ӵыжы-выжыосыным. Кызьы шапык зарезьын, кызьы луо пыры пустыняын, озьы ик мынам семьяе но — со Россилэн Историез нимо миллион бамъем книгалэн одӥгез туж тунсыко бамыз.

Покчи Лӧзя шоръёзо школаын
дышетскись Гараев Русланлэн
проектной ужез

Туспуктэмъёс: семья архив