«Даур куара» музей: нылпиослы удмуртлыко вӧлмытлык кылдытон амал

1982-тӥ арын, СССР-лы 60 ар тырмон азьын, котькуд Совето Союзысь вынлыко республикаосы улэм-вылэменызы тунсыкъяськон вылысь гожтэтъёс ыстӥм. Беренвазёнъёс Белоруссиысь но Украинаысь октябрёнокъёслэсь гинэ басьтӥмы. Гожтэтъёс но праздникъёслы ӟечкылан открыткаос гожъян сяна, ог-огенымы книгаосын, газет-журналъёсын, ас киынымы лэсьтэм арбериосын, сяська кидысъёсын вошъяськылӥмы. Озьы кусыпмы 1991-тӥ арозь кыстӥськиз. Вань люкаськем арбериосты радъяса, школаямы «Калыкъёслэн эшъяськонзы» нимо сэрег усьтӥм.

Сэрегмы ялан паськытаз но паськытаз, вашкала арбериосын узырмиз. Узыр сэрегмес музей шуыны кутским. Ёросамы шаертодон музейёслы сӥзем вожвылъяськонын кыкетӥ инты басьтӥмы. 2011-тӥ арын школамес ворсазы, музеймес О.Н. Исаев нимо Шор Кушкет шоръёзо школае выжтӥмы. Шаертодон музейлы «Даур куара» ним сётӥмы.

2016-тӥ арын южтолэзе, нимысьтыз комиссилэн эскеронъёсызъя, музейлы «Школьный музей» ним юнматӥзы. Музейлы нимаз висъет но висъязы. Музей бордын актив кылдытэмын, кытчы школаысь мыло-кыдо дышетскисьёс быръемын. Активе сюрем нылпиос ивор, пӧртэм арбериос люкало, музейлэсь котькуд сэрегъёссэ радъяло. Озьы ик котькуд люкет борды экскурсовод юнматэмын, экскурсиез дышетскисьёс удмурт но ӟуч кылын нуо.

Музее пырыса, нырысь ик лыктэм куноос Олег Николаевич Исаевлы сӥзем стендэныз тодматско, кытын солэн вакчи но дано, геройлыко улонэз возьматэмын. Татын геройлэн тетрадьёсыз, куд-ог документъёсыз, офицер дӥсез интыямын. 2004-тӥ арысен арлы быдэ геройлэн вордскем нуналаз (14-тӥ толшоре) спорт ӵошатсконъёс радъясько. Та ӵошатсконъёсы нылпиос сяна, одно ик ёрос кивалтэтысь адямиос пырисько, Арск педколледжысь дышетӥсьёс но итӥсько.

Озьы ик, героймылэсь анай-атайзэ ӧтьыса, бадӟым пумиськон-вераськонъёс ортчыло. Пумиськон азьын дышетскисьёс урокын геройлэн улон-вылонэныз но геройлыко лэсьтэм ужъёсыныз пыр-поч тодматско. Пиналъёс атаезлэсь но ӧтем куноослэсь верамъёссэс, тодэ ваёнъёсэс сак кылзо, урокын дасям юанъёссэс сётъяло.

Мукетыз стенд — прозаик но кылбурчи Николай Михайлович Никифоровлы сӥземын. Татын нылпиос гожтэм книгаосыныз, печатлан машинкаеныз, киын гожтэм тетрадьёсыныз тодматскыны быгато. Николай Михайловичлы сӥзьыса, музей кылем дышетскон арын улоскуспо конференция ортчытӥз. Ужрадын удмурт кылъя но литературая дышетӥсьёс писательлэн творчествоез, соин нылпиосты тодматон амалъёс сярысь вераськизы. Ципья школаысь И.А. Черноваен но М.Е. Васильеваен гожъяськисьлэн кылбуръёсыныз книга но дасямын вал. Бичетэ витьтонлэсь ятыр Н. Никифоровлэн кылбуръёсыз пыртэмын вал.

Нылпиос поэтлэсь кылбуръёссэ вольыт лыдӟонъя быгатонлыкъёссэс возьматӥзы. Озьы ик Ижкарысь вуэм куноосын (В. Шибановен, В. Михайловен, П. Захаровен) пумиськон но тунсыко ортчиз. Пумиськон бере нылпиос куноослы кылдэм юанъёссэс сётӥзы, ас малпанъёссэс шараязы. Та выллем ужрадъёс пиналъёсты удмурт дуннее кыско, удмурт луэменызы данъяськон мылкыд пыӵато.

Музейлэн активеныз трос уж лэсьтӥське. Кылсярысь, Быдӟым ожысь орденэн бертэм улосчиосмес эскеримы-тодӥмы. Гуртоослэсь но ӵыжы-выжыоссылэсь юалляськыса, нимысьтыз стенд дасямы. Соос ог 30 пала люкаськизы. Стендэ ожчиослэн туспуктэмзы, наградной листсы интыямын. 12-ез сярысь статьяос дасямы, удмурт кылын потӥсь «Азьлане» ёрос газетын печатламы. Дышетскисьёс но дышетӥсьёс «Ож мышкысь батыръёс», «Соос война нылпиос», «Нокин уз вуны, номыр уз вуны» но трос мукет проектъёс бордын туж тыршыса, мыло-кыдо ужазы, войнае ветлэм песятайёссы сярысь сочинениос гожъязы. Сочинениосазы секыт улонэз, войнаысь бертымтэ ӵыжы-выжыоссы сярысь мадизы.

Одӥгез люкет школа улонлы сӥземын. Татын школалэн историеныз, 60-70-тӥ аръёсысь удмурт кылъя дышетскон книгаосын, удмурт, ӟуч, бигер, пор, белорус кылын букварьёсын тодматскыны луэ. Татчы ик инты шедьтӥзы: пионер галстук, вымпелъёс, барабан но горн; октябрёнок, пионер, комсомол значокъёс; чернильница, пероос, ручкаос но 70-80-тӥ аръёсы кутӥськем ТСО но трос мукет тунсыко арбериос. Ваньзэ тае адӟыса, пиналъёс амалтэк азьлозэ но туалазэ ӵошато, со вакытлэсь умойзэ адӟо.

Мукетаз сэрегын гуртоослэн ужан тӥрлыкъёссы интыямын. Кылсярысь, сэрегын вашкала арбери — каб шуккон станок — сылэ. Вань люкетъёсыз интыяз: кись, колтрес, шуккон пурт, бун, ог 60 ар талэсь азьло шуккем каб. Музейлэн мукетыз бадӟым экспонатэз — куиськон станок. Со котырын куэм, керттэм дӥськутъёс интыямын. Нылъёс татын черсӥськон, куиськон амалъёсын тодматско, асьсэос но куиськыса утчало. Нош пияшъёс кизён тӥрлыкъёсын, кут кутан но сапег лэсьтон амалъёсын тодматско.

Тужгес но тунсыко, яратоно сэрег — вашкала удмурт корка пуш. Гурын тыл ӝуа, гур азьын ухват, табапуд, кык пӧртэм вӧйшуккон, нянь тырон пу, лопатка, пызь дуско, керосинка но трос мукет корка пушкын кутӥськись арбериос интыямын. Ӝӧк вылын самовар гужгетэ, вылын керосин лампа югдэ.

Пу койка урдсын керттэм кӧкы. Со вадьсын пу сюры, нош вылын пӧртэм дӥсьёс. Татын ик сьӧд но горд сюлык, вылькышно дэрем. Камалиен дӥсяськем «нылмурт» но коркаез шулдыртэ. Койка улын турлы кутъёс. Та сэрегын нылъёс гурын табань пыжемъясько, нош пиос веттэтэн табань сиемъясько. Куддыр нош пиналъёсты вашкала дӥсе дӥсяса, шулдыръяськиськом, вашкала эктонъёсын но шудонъёсын тодматӥськом, котькуд тӥрлыклэн кулэлыкез но улонын кутӥськемез сярысь мадиськом.

Заллэн шораз шкаф но ӝӧк сылэ. Отын удмурт калыклэн историезъя книгаос, проектной ужъёс, газет-журнал бамъёсысь материалъёс, финн-угор калыкъёс сярысь газетъёс. Одӥгаз ӝажыын белорус но украин октябрёнокъёслэн гожтэтъёссы кыллё, нош ӝӧк вылын — вашкала но XX  даурысь коньдонъёс, заёмъёс. Та сэрегын дышетскисьёс вакчияк финн-угор калыкъёслэн историенызы тодматско, соослэсь гуръёссэс кылзо но дӥськутсэс учко. Украин но белорус кусыпъёсын тодматыку, одно ик ог-огеныд тупаса улон но солэн кулэлыкез сярысь валэктӥськом.

Милям музеймы куштэм вашкала арбериосты возён инты гинэ ӧвӧл. Со пиналъёслы ватсаса тодон-валан сётон инты но луэ. Музее школаын дышетскись пиналъёс котьку но шумпотыса вуо. Экскурсие удмурт кылъя но литературая урокъёс дыръя гинэ ӧвӧл, география, история, физика, математика, технология но искусство урокъёсты ортчытон вылысь но ветло.

Музеймы пиналъёсты удмурт калыклэсь чеберлыксэ адӟыны дышетэ, ас шаердэ но калыктэ гажан мылкыд пыӵатэ.

Ортчозы аръёс. Туннэ пиналъёс будозы, соос асьме шаермес азьлане нуисьёс луозы. Но музейын ортчытэм экскурсиос, пӧртэм пумо урокъёс, вераськонъёс пырак соослэн тодазы но сюлмазы кылёзы.

Василий Петрович Никитин,

Шор Кушкет шоръёзо школаын азьвыл ужам дышетӥсь.