«Дуслык» возёс паймытэ

Октон-калтон йылпумъяськемын, сӥзьыллэн шундыё, яркыт нуналъёсыз, берпуметӥ тылсиосызлэсь шунытсэ сётыса, гурт возёс удысын ужасьёс понна вуоно арлы дасяськон дыр кузьмало.

Ӟаны, Кисаль, Тюнтер, Кутэш гуртъёсты огазеясь «Дуслык» возёс ассэ котькуд ар умоен возьматэ. Вакчи дыр куспын соослэн ужъёссы но возьматэмъёссы (показательёссы) адскымон вылӥе ӝутскизы. Вожвылъяськонъёсы пыриськыса, котькуд удысын призо интыосын пусйисько, ужзэс азинтыны, выльзэ утчаны тыршо, луэмзэ утё. 4 ар ӵоже ини та возёсэн быгатыса кивалтэ Николай Колоколов. Солэн кивалтэмез улсын музъем, пудо вордон, выльдӥськон, лэсьтӥськон ужъёс ялан азьлань гинэ вамышто. Ачиз но гуртын вордӥськемын но будэмын бере, Николай Григорьевич гурт возёс ужъёсын ассэ быгатӥсен возьматэ.

Бусыосысь урожай дыраз люкамын, музъем обработать каремын. Возёслэсь котыр территоризэ учкыса, валамон луэ: татын котькуд ужасьлэн тыршемез юнме ӧвӧл, котькудӥз интыяз. Туала улон трослы автоматизация пыр ортчемын ке но, музъем ужын адями киостэк нокызьы уг луы.

«Дуслык» возёслэн кивалтӥсеныз – Николай Колоколовен – вераськонмы огъя выльдӥськонъёсынызы, йылпумъянъёсынызы тодматскон но вуоно октон-калтонлы дасяськон сярысь луиз.

– Николай Григорьевич, октон-калтонлэсь йылпумъянъёссэ кызьы дунъясалды?

– Инкуазь условиосты лыдэ басьтыса, урожаез урод шуыны уг луы. Куазь пӧсь улӥз ке но, тысё культураос умой будӥзы. Асьмеос но туж паймемын вал, возьмамтэ шорысь шумпотон луиз. Зор луытэк но котькуд гектарысь ӟеч урожай басьтыны быгатӥмы. Кылем арен ӵошатӥд ке, тросгес но луиз на.

– Пудо сиён дасян паласен мар вераны быгатысалды?

– Пудо сиён дасямын, кылем арлэн запасъёсыз но вань. Ваньзэ лыдэ басьтыса, одӥг ар но ӝынылы тырмымон. Пудоез тырмыт сюдыса, пайдаез но трос, соин запас луыны кулэ. Та понна силос дасяськом.

«Дуслык» возёс азьмынӥсь луэ на пӧртэм выль техникаосты уже кутэменыз но. Машина-трактор парказы кыӵе  техниказы но ӧвӧл! Дыраз подкормка лэсьтыны но кизён ужъёсты быдэстыны юртто туала «Фиат» кизён комплекс, выль «Туман» агрегат, пӧртэм тракторъёс, музъемез обработать карон ужъёсын юрттӥсь агрегатъёс.

– Валтӥсез – музъемез обработать карон технологиосты чаклан. Кылем арын кын улэ чизель герыен 2600 гектар музъем обработать каремын вал. Туэ 16 куарусён нуналлы 2800 гектар обработать каремын ини, 100 гектар кылемын. Гырон ужъёсын туэ кык смена ужаз. Татын 2 трактор кутэмын вал но соосын 4 механизаторъёс ужазы. Нуналаз 120 гектар пала музъемез обработать карыны быгатӥзы. Ужез тазьы радъяммы пайдаё луиз: гырон ужъёсты дыраз, зоръёс кутскытозь быдэстӥм.

– Мукет возёсъёсын ӵошатыса, тӥляд ужасьёсты но трос. Тае кызьы валэктыны быгатоды?

– Ужасьёс мултэс уг луо. Котькуд ужась понна коньдон уксёен премия сётӥське. Шутэтскон интыосы но лэзиськом. Ужан дыръёссы но тупамон луо, ужан условиос кылдытэмын. Котькуд ужан интыын кадь ик кин ке лыктэ, кин ке кошке. Тани, кылсярысь, пӧсь нуналъёс сылыку, 2 дояркаос гинэ кылизы, басьтоно луим ужасьёс, трос сюлмаським ке но, та пумысен кышкытлык ӧз кылды.

Возёсын агрономлэн но ужез туж кылкутымон луэ. Солэн киосаз возёслэн азинскон сюресэз. «Дуслык» возёсын та ужез 10 ар ӵоже ини быдэстэ Сергей Чириков, 2018 арысен со валтӥсь агроном луэ. Ас ужзэ валась агроном ӵапак возьматэмъёссэ учке вал. «Тани 2020 арысь урожаен ӵошатӥсько но, соку шорлыдын 40 центнерлэсь улӥ басьтэммы ӧй вал» – шуэ Сергей Геннадьевич.

– Зэмзэ вераса, октон-калтон кутскон дыръя туж сюлмаськи. Нырысетӥ бусые потыса азьло ӧй но оскы, комбайнлэн бункерез чаль тырмоз шуыса. Комбайн потӥз, ортчиз, учкисько: бункер тырмемын, чаляк гинэ калькуляторме киям басьтӥ но лыдъяны кутски, кӧня урожай та бусыысь октыны быгатомы шуыса. Малпасько вал, 30 центнер но басьтыны ум быгатэ. Йыды кылем арын кадь ик урожай сётӥз. «Бейсик» сортэз быръеммы шонер луиз, со пӧсьлы уг сётскы, уг но выды, гектарысь 45 центнер басьтӥм. «Раушан» сорт но осконъёсты зэматӥз – 35 центнер та сорт понна туж умой. Валэс чабей сярысь верано ке, со 40 центнерлэсь ӧжыт ӧй вал, куд-ог бусыосын 50 центнерен но вал. Пуртэсо культураос сярысь верано ке, татын кӧжылэн «Ульяновец» сортэз ассэ умой возьматӥз. Огъя, 194 гектарын будэм ӟеглэн шорлыдын урожаез 29,9 центнер луиз, 180 гектарысь озимой чабейлэн – 30,4 центнер, 1017 гектарысь йыдылэн – 35,1 центнер, 300 гектарысь валэс чабейлэн – 38,6 центнер, 110 гектарысь сезьылэн – 30,6 центнер, 100 гектарысь кӧжылэн – 21,8 центнер. Октон-калтон вакытэ куинь КЗС-812, одӥг CLAAS Tucano но туэ басьтэм CLAAS DOMINATOR комбайнъёс ужазы. Соосын тыршизы Овчинников Алексей (юрттӥсез – Якупов Даниф), Степанов Сергей (юрттӥсез – Яковлев Артём), Петров Семён (юрттӥсез – Петров Илья), Хакимов Раузит (юрттӥсез – Гарифуллин Фидан) но Кашапов Расих (юрттӥсез – Кашапов Рафис). Тыршемзы уж вылын адӟиське, ваньмыз дыраз октэмын.

– Ужасьёс пӧлысь кинэ висъясалды?

– Нокинэ нимысьтыз висъяны уг быгатӥськы. Ваньзы асьсэ ужзэс валаса, тыршыса быдэсто. Шумпоттэ егитъёслэн уж борды юн басьтӥськемзы. Опыто механизаторъёс пӧлысь Геннадий Ефремов егитъёс кадь ик ужзэ валаса, рос-прос быдэстэ. Озьы ик Виталий Шадров ужзэ сюлмысь лэсьтэ. Егитъёс пӧлысь висъяны луэ Пётр Трофимовез, Евгений Петровез. Тросэз егит ке но, опыто механизаторъёслэсь бере уг кылё. Тулыс кизёнэз «Фиат» комплексэн быдэстэм бераз Евгений Петров «Туман» агрегатэ пуксиз: кизёно площадьёсын подкормка кариз, нымы-кибыослэсь обработка лэсьтӥз. Олег Яковлев вазь тулысысен бер сӥзьылозь бусыын гусеничной тракторен тыршиз, пудо сиён дасян дыр кутсконысен CLAAS JAGUAR пудо сиён комбайнэн кукуруза бусыын тыршиз. MacDon агрегатэн Гадель Хакимов но Алексей Усманов ӵошатскыса ужзэс быдэстӥзы. Куинь пол басьтэм «Верко» сорт люцерна оглом пудо сиён дасянэ кутӥськиз. Туннэ нуналлы 140 гектарын «Подарок» сорт ӟег но 107 гектарын «Льговская-4» сорт чабей киземын. 500 гектарысь кукуруза октэмын, та пӧлысь 200 гектарез кидыслы кельтэмын, мукетыз силос карыны кутэмын, огъя 8771 тонна силос дасямын.

«Дуслык» возёсысь выльдӥськонъёсты лыдэ басьтоно ке, Тюнтер гуртысь амбарын кидыс куасьтонни лэсьтӥськиз. Огъя 21 миллион 500 сюрс тыр луиз. Амбарен «Балтась ёрослэн сӥё-дано кунмуртэз» Шарифулла Гарифуллин кивалтэ. Выль техникалэн ужамез трослы октон-калтон вакытэ ужез капчиятӥз. Табере 2 сменаен ужано нормаез 1 смена быдэстыса вуттэ.

Агрономен вераськыса, возёсысь Субаш гурт палан интыяськем бусы пала сюрес кутӥмы. Кукуруза бусыын CLAAS Axion 940 тракторен бусыосты гыре вал механизатор Виталий Кешишев. Солэн ужан стажез 17 ар пала, ужамезъя ик адӟиське воргоронлэн тыршемез но быгатонлыкез. Кивалтӥсьёсыз но сое примере пукто, ушъяло. Ужзэ пумозяз вуттэмез адске.

Кисаль гурт палан интыяськем бусыын «Кировец» тракторен ужзэ быдэстэ вал Семён Петров. Ужась адямилы люкетыны умойтэм, соин ик трос дырлы ӝегатоно ӧй кариськы. Туннэ нуналлы солэн ужан стажез 34 ар луэм ини, ваньмыз ик гурт возёсэн герӟаськемын вылэм. 11 арзэ вал сюдӥсь луэм, нош собере ини техникалы сюлэмзэ но кужымзэ сётэм. Зэмос гурт возёс удысысь ужась! Евгений пиез озьы ик «Дуслык» возёсын тырше, Илья пиез татын ик практиказэ ортче, гужемзэ комбайнёрлэн юрттӥсез луыса ужаз.

 «Дуслык» возёс аслэсьтыз нимзэ зэматэ. Кивалтӥсьлэн ужасьёсыныз кылыз тупа, ог-огзэс кылыса, гажаса ужало. Ужамзылэн бервылъёсыз но шӧдскымон: ёросын огез вылӥ возьматэмъёсын возёс котькуд удысаз тырше, ужасьёссылы пӧртэм мылкыд сётӥсь ужрадъёс лэсьтэ. Азьланяз но котькуд ужады емышъёсты бадӟымесь, нош ужъёсты пайдаё мед луозы!