Ӟеч лу, тол! Ӟечбур, тулыс! (2-тӥ люкет)

Та ласянь Покчи Лӧзя гурт азьветлӥсь луэ ни. Отын толэз келян, Вӧйдырез пусъён — традиционной ужрадлы пӧрмемын.

Озьы туэ Покчи Лӧзя гуртын Вӧй шулдыръяськон ортчиз тулыслэн нырысетӥ нуналаз — 1 южтолэзе. Вераны кулэ, сое котькуд аре туж шулдыр карыса пусъё. Туэез но праздник вань люкаськем адямиослэн сюлэмъёсазы сайкыт но вунонтэм тодэ ваёнъёс кельтӥз, дыр, шуыса малпасько. Котьку сямен, калыкез шумпоттӥзы шулдыр крезьгурен, ческыт табанен но пӧсь чаен, тунсыко шудонъёсын но аспӧртэмлыко вожвылъяськонъёсын. Кылсярысь, горшок пыргытон но канат кыскан кадь сяме пырем шудонъёсын артэ тунсыко вал адӟыны быдэ вуэм адямиослэсь миндэрен жугиськемзэс. Пичи дыразы берытскем кадь луизы, вылды, соос.