Элькунысь – бадӟымесь шумпотонъёсын

Арысен аре дышетскон удысын куронъёс юнгес но чурытгес луо. Выль амалъёсын тырмем дышетскон процесс секытгес йӧтэ ваньмызлы: дышетӥсьёслы но, дышетскисьёслы но. 

Но, шуг-секытъёсты палэнэ кельтыса, котькуд аре дышетскисьёсмы ёрослэсь данзэ элькунын утё, вормонъёсы вутско.

Паймымон кадь, дышетскон сяна, соос пӧртэм ужрадъёсы но пырисько, доразы но семьязылы юрттыны вуттӥсько. Гуртысь нылпи трослы чидась но шуг учыръёсысь потыны быгатӥсь. Соин олимпиадаослы но нылпиос рос-прос дасясько.
Выль арозь всероссийской олимпиадаослэн ёрос этапъёсыз йылпумъяськизы. Пиналъёслэн тыршемзы юнме ӧз луы: нылпиос яратоно предметъёссэс эшшо но мургес эскеризы, мукет школаосысь дышетскисьёсын визьзэс мертазы. Котькуд дышетскон предметъя усточиос шараяськизы. Соос азьын бадӟым ужпум сылэ: ёрослэсь данзэ элькун этапын утёно. Со туж кылкутӥсь ужпум: вылӥ дышетскон интые пырыны школаысен ик туж трос дышетсконо, пӧртэм ужрадъёсы, научно-практической конференциосы пыриськоно.
Гуртысь но городысь дышетон сӧзнэтъёс шӧдскымон висъясько. Городын практической занятиослы тросгес саклык висъяське, нош гуртысь нылпи понна дышетскон ӵемысь школаен но интернетэн гинэ герӟаськемын. Пӧртэм интыосы потан луонлыкъёс вань ке но, соос туж шер луыло.
Ӵапак городысь но гуртысь нылпиосты висъян понна валтӥсь элькун олимпиадаослэн йылпумъян этапсы сяна, 2020-тӥ арысен «Путь к Олимпу» шуэм ватсам элькун олимпиадаос ортчытӥсько. 
9 толшорысен нырысетӥ олимпиадаос кутскизы ни. Праздник нуналъёсы шутэтскон адӟымтэ нылпиос, мыло-кыдо пыриськизы англи кылъя элькун олимпиадалэн йылпумъян этапаз. 4 школаысь нылъёслы оскемын вал ёросмылэсь данзэ утьыны. Шумпотымон, Покчи Лӧзя шоръёзо школаысь 11 классын дышетскись Дарья Артемьева призёр луиз. Дышетӥсез — Покчи Лӧзя шоръёзо школалэн директорез Нияз Филсурович Хакимов. 
Таин гинэ дышетскон удысын шумпотонъёс уг быро. Та нуналъёсы Ӟаны шоръёзо школаысь Родион Исаев историяя элькун олимпиадаын призо интыен пусйиськиз. Егит пилэн дышетӥсез — Надежда Александровна Спиридонова — аслэсьтыз предметсэ юн тодыса, дышетскисьсэ призо интые вуттӥз.
Дышетскисьёсты сюлмысь ӟечкыласьком но азьланяз сыӵе ик бадӟымесь азинсконъёс сӥзиськом! Вылӥ лёгетъёсы вутскем дышетскисьёсты дасямзы понна дышетӥсьёслы но тау кариськом. Азьланяз но дышетскисьёсты вормонъёсынызы мед шумпоттозы, тыршемды пайдаё мед луоз!