Героймы котьку вӧзамы улоз!

Куректон, ӝож, кайгу, ыштон... Шуг шедьтыны кылъё, кудъёсыз быгатозы шараяны мылкыдъёсты, куке матысь адямиед пыраклы синъёссэ кыне, кошке мукет дуннее... Озьы ик уг тырмо кылъёс валэктыны, кызьы со бадӟым яраез бурмытоно, кызьы улыны кужым шедьтоно...

Олег Николаевич Исаев — та нимез ёросын тодӥсьтэм адями ӧвӧл.

Трос йӧскалыкъем ёросын солэн нимыз котькуд гуртын чузъяське Геройёслэн нуналаз, Вормон нуналэ, Вуж Кушкет гуртлэн праздниказ. Майор, нырысетӥ Чечен войнае пыриськем ожгарчи, старшой лётчик, Россилэн Героез, яратӥсь кузпал но атай, сюлмаськись пи но агай, оскымон эш — ваньмыз та со сярысь. Аслаз 32 аресаз со ваньзэ лэсьтыса вуттӥз, вань ужъёссэ сюлэмзэ поныса быдэстӥз.
Кышкасьтэм но Атыкай музъем понна юн сюлмаськись пиосмурт улонзэ сётӥз асьме чагыр инбаммы но яркыт шундымы, нылпиосмылэн югыт азьпалзы понна. 
Туала дуннеысь югдурмес учкыса, туж шуг вераны, кыӵе малпанъёс кылдысалзы меда Геройлэн йыраз. Туннэ нуналэ улысал ке, пыриськыськысал меда со нимысьтыз ожгар операцие? Воргоронъёслы кыӵе индылонъёс сётысал? Малпасько, палэнэ ӧй кыльысал, аслэсьтыз кышкасьтэм луэмзэ одно ик возьматысал. 
Герой сярысь малпаськыны кутскид ке, туж кыдёке вуиськод. Туала улонэз ӵошатӥськод, тыршиськод ваньзэ сэрттыны-пертчыны. Сыӵе кужмо сямо но юн мугоро пиосмурт ӧз пегӟы секытъёслэсь, кулонлэсь но ӧз кышка, данлыко быдэстӥз аслэсьтыз ужзэ, анткылэзлы (присягаезлы) оскымон кылиз. Аръёс ортчыса, та югдур нош ик вань адямиослэсь сюлэмъёссэс пужмерен шобыртӥз но позыртӥз.
Янгыш уз лу вераны: котькуд адями дунне вылэ кыӵе ке ужпумен вордӥське. Кин ке ас калыкезлы синмаськытэ лулчеберет пыр, кин ке семьяяз ас шудбурзэ шедьтэ, кин ке вань кужымзэ уж ӧнерезлы сётэ, нош кин ке шаермес уте, таиз адямилэн улоназ самой кышкытэз. Туала дырлы туж асдыръем (актуальной) тодмет луэ.
Дауръёс ӵоже адямилэн самой бадӟым узырлыкеныз лыдъяськиз улон. Олег Исаев аслэсьтыз та улонзэ шаермес утёнлы сӥзиз. Оло, сыӵе адямиос ик быдэс кунмылы пыкет луо, соослы луыса улонмы но яркыт шундыен, сайкыт инбамен но ыркыт тӧлэн пачылмемын.
Воргорон — со кужым но оскон, со семьялэн валтӥсь пыкетэз.Калыкын верало, ас улоназ воргорон 3 уж лэсьтыны кулэ: писпу мерттоно, корка пуктоно но пи вордоно. Олег Исаев та ужъёсты но быдэстыса вуттӥз. Вакчи дыр куспын солэн улоназ ваньмыз пӧрмиз, ваньмыз ас дыраз луиз.
Вуж Кушкет гуртын котькуд нылпи пичи дырысеныз ик тодэ, кин со Олег Николаевич Исаев: гуртлэн кутсконаз ик синмаськымон нимпул интыямын, вордӥськем юртаз но нимысьтыз мемориал пул вань, покчиёзо школалэн борддораз но Олег Николаевичлы сӥзем мемориал пул шуккемын, нош школалэн пушказ нимысьтыз вунэтонтэм вылысь сэрег кылдытэмын. 
Вуж Кушкет гуртысь покчиёзо школаын ик кутскиз Олег Николаевичлэн дышетскон сюресэз. Татын со басьтӥз дышетсконлэсь инъетсэ, татын ик улонлэсь самой валтӥсь тодметъёссэ пусйиз. Паймымон: пичи гуртысь пияш пичи дырысеныз ик шонерлык но ӟечлык понна сылӥз, сюлмысь тыршиз анай-атаезлы, семьяезлы юрттыны. Олег Исаев кадь сюлмо, ас калыкез понна тыршись но кужмо адямиез туннэ нуналэ туж шуг шедьтыны. Ожгар удысысь адямиос тросгес физической нагрузкаослы саклык висъяло ке, Олег Николаевич дышетсконлы но трос дырзэ сӥзиз. 

Азьпал сюрессэ но Арча карысь педагогикая училищеен (туннэ нуналэ — колледж) герӟаз, нылпиосын ужан ӧнерез бырйиз. Татын но ассэ рос-прос дышетскисен возьматӥз. Малпасько, дышетӥсь луыса но, Олег Николаевич нылпиослы трос пайдаё визь-кенеш сётыны быгатысал. 
Шумпотымон, вордскем гуртаз но дышетскем школаосаз со сярысь уг вунэто. Анай-атаез — Вера Петровна но Николай Степанович — гажамон куноос луо ёросын ортчем котькуд ужрадъёсын, сыӵе батыр пи вордэмзылы ваньзы тау каро, данъяло элькунын но, быдэс Россиын но.
Арлы быдэ, Геройлэсь данзэ утьыса, пӧртэм ужрадъёс ортчо. Отчы лыкто ёросысь кивалтӥсьёс, мылкыд карисьёс, удмурт гуртъёсысь «афганецъёс», Геройлэн ӵыжы-выжыосыз, эшъёсыз. 
Туэ Олег Николаевичлэн вордӥськем нуналэз азьын, 13 толшоре, Арчаысь Г. Тукай нимо педагогикая колледжын пневматической винтовкаен ыбылӥськонъя ёроскуспо ӵошатсконъёс ортчизы. Ӵошатсконъёсы огъя 47 мурт пыриськиз, 12 команда люкаськиз: Арча педагогикая колледжысь дышетӥсьёс но студентъёс, Арчаысь агропромышленной ӧнерлыко колледжысь дышетӥсьёс но студентъёс, Атняысь гурт возёсъя техникум, Ӟаны шоръёзо школаысь дышетӥсьёс, ожгар действиосысь ветеранъёс но Олег Исаевлэн колледжын ӵош дышетскем эшъёсыз.
Торжественной люкетэз колледжлэн фойеяз, Геройлы сӥзем мемориал пул дорын ортчиз. Татын Россия Федерацилэн но Татарстан Элькунлэн кункрезьёсыз (гимнъёсыз), патриотизм мылкыдэн пыӵам кырӟанъёс чузъяськизы. Озьы ик мемориал пул доры сяська понӥзы, знамя пыртӥзы. 
Ужрадын педагогикая колледжлэн азьвыл директорез Ильдус Сагдеев, Олег Исаевен ӵош дышетскем эшъёсыз но мылкыд карисьёс тодэ ваёнъёссэс веразы. Котькудӥзлэн малпанъёсыз шуныт кылъёсын но ӝож мылкыдэн пыӵамын вал. Зэмос дышетскись но оскымон эш — огшоры кылъёс ӧвӧл, трос аръёс ӵоже умой ужъёсыныз юнматэм фактъёс. 
Ӟаны шоръёзо школалэн командаяз 4 дышетӥсьёс пыризы: крезьгуръя дышетӥсь, Олег Исаевлэн ӵош дышетскем эшез Виктор Камаев, физической культурая дышетӥсь Руслан Михайлов, визьноданъя кенешчи Анна Смердова но директорлэн визьноданъя воштӥсез Лилия Чирикова. 
Шумпотымон, воргоронъёс пӧлын ӵошатсконъёсын 25 мурт пӧлысь Руслан Михайлов 1-тӥ интые потӥз. Геройлэн дышетскем школаезлэсь данзэ утиз! Ӟечкыласьком но азьланяз эшшо но тросгес вормонъёс сӥзиськом, Геройлэсь нимзэ нуллӥсь школалэсь данзэ кема аръёс ӵоже утьыны мед быгатоды на!
Огъя командаосты лыдэ басьтӥд ке, 1-тӥ интыын Арча педагогикая колледжлэн командаез, 2-тӥ интыын Олег Николаевич Исаевлэн ӵош дышетскем эшъёсызлэн командаез, 3-тӥ интыын Атняысь гурт возёсъя техникум.
Ӵошатсконъёсы пыриськисьёсты озьы ик «Алифба» музеен тодматӥзы, вормисьёсты но призо инты басьтэмъёсты грамотаосын, нош вормисе потэм командаосты кубокъёсын пусйизы.
«Бускельёсмылэн» аспалмес дано каремзы туж паймымон. Ёроскуспо ӵошатсконъёс радъяса, Геройлэсь нимзэ пыраклы историе кельтэмзылы бадӟым тау шуэме потэ Арчаысь Г. Тукай нимо педагогикая колледжлэн коллективезлы но юрттӥсьёссылы. Асьме ёросмылы та бадӟым мылкыд ӝутон (стимул) луэ. 
Кыкетӥез бадӟым ужрад ортчиз ни асьме ёросамы — Ӟаны шоръёзо школаын. Котькуд ар школалэн коллективез юн тырше ас Героезлэсь данзэ утьыны но дышетскисьёсты батырлыко подвигъёсыныз тодматыны.
Туэ сяме пырем ужрадэз дыраз ортчытыны инкуазь люкетӥз ке но, вань пуктэм ужпумъёс быдэсмизы. Героез тодэ ваён ужрад туж пуштросо но сюлмо ортчиз.
Покчи классъёсысен ик вуоно Героймы капчи атлетикаен но куасэн бызьылонэн тунсыкъяськем. Али но татын физической культурая дышетӥсьёс нылпиослы покчи классъёсысен ик лыжной спортэз яратон мылкыд пыӵатыны тыршо. 
Ӟаны шоръёзо школаын Геройлэн вордскем нуналэзлы сӥзем ужрадъёс 2 нунал ӵоже кыстӥськизы. 25 толшоре дышетскисьёс пӧлын куасэн бызьылонъя ӵошатсконъёс ортчизы, нош 26 толшоре школалэн спортзалаз пумиськизы волейболъя командаос: Ӟаны шоръёзо школаысь нылкышноослэн но воргоронъёслэн сборной командаоссы (татчы пыризы дышетӥсьёс, дышетскисьёс но выпускникъёс), Ӟаны шоръёзо школаысь нылъёслэн но пиослэн командаоссы но ӧтем куноос — Ципья шоръёзо школаысь нылъёслэн но пиослэн командаоссы. 
Та нуналэ школалэн борддоръёсыз но ӵошатскон мылкыдэн пыӵамын вал кадь. Покчи классъёсысен кутскыса, дышетскисьёс но, дышетӥсьёс но интыязы пукыны ӧз быгатэ: ваньзы спортзалэ асьсэ командазылы вормон сӥзьыны дыртӥзы.
Волейбол шудонъя ӵошатсконъёс йылпумъяськем бере, праздниклэн сӥё-дано люкетэз кутскиз. Татчы люкаськизы куноос, геройлэн анай-атаез, дышетӥсьёс, дышетскисьёс. Праздниклэн кутсконаз дышетскисьёс Россилэсь но Татарстан Элькунмылэсь куншетъёссэс (флагъёссэс) пыртӥзы.
Сӥё-дано ужрадэ озьы ик пыриськизы Балтась муниципал ёрослэн Дышетонъя управлениезлэн начальникез Ренат Мухарлямов, Ӟаны гурт поселенилэн главаез Юрий Перфилов, Балтась ёросысь гражданъёсты ожгар службае басьтонъя но дасянъя ёзэтлэн начальникез Рифат Закиров, Олег Исаевлэн Арча педагогикая колледжын ӵош дышетскем эшъёсыз Виктор Камаев, Фаннур Галимов, Шамиль Саляхов, Зиннур Сагитов. 
Вера Петровна, пизэ буре вайыса, сюсьтыл ӝуатӥз. Батырлыко бырем пиезлы аслэсьтыз сюлэм шунытсэ сётыса кадь, небыт тылын ӝуась сюсьтыл пыр Олег Исаевлэн синъёсыз эшшо но яркытгес ӝуаны кутскизы кадь. 
Бугырскем мылкыдзэс ӵош дышетскем эшъёсыз но пушказы возьыны ӧз быгатэ. Адӟиськиз: сюлмазы бадӟым ыштонэн герӟаськем яра. 
— Ми Олеген ньыль ар ӵош дышетским но, общежитиын но улӥм. Со югыт адями вал, спортсмен, эш, котьку луэмзэ сётыны, юрттыны дась пияш. Солэсь анай-атайзэ туж валасько, кыӵе соослэн мылкыдъёссы сюлмазы, кыӵе соослы вӧсь... Но соос понна та туж бадӟым данлык: соос вордӥзы сыӵе батыр пиез. Тӥ но данъяськыны кулэ соин, тӥ дышетскиськоды школаын, кудӥз дано нуллэ Геройлэсь нимзэ. Мон понна со аспал кадь луэ, малы ке шуоно Арча но Балтась кемалась матысь кусып возьыса уло. Быдэс Россия понна Татарстанын улӥсьёс ваньзы аспалъёс луо. Тани тодамы вайимы, экранын но адӟимы солэсь улон сюрессэ, солэсь подвигъёссэ. Солэн серекъямез котьку асьме син азьын улоз. Со быдэсак ассэ Атыкай музъемез утён ужлы сӥзиз. Мазэ веранэз, со валаз, кытчы мынэмзэ: со ожгар уж, соос анткыл сёто калык но, шаермы азьын но. Со — офицер, кудӥз пыраклы кыл сётӥз шаермес утьыны. Зэмос офицер луыса ик кылиз! Мон туж данъяськисько, мынам ӵош дышетскем эше Герой шуыса. Та нуналъёсы, ваньды тодӥськоды, нимысьтыз ожгар операци мынэ. Асьме пиосмы отын вордскем шаермес утё. Соос но ваньзы Геройёс. Соосын данъяськыны кулэ.
Али сыӵе тенденци кошкиз: интернетын кыӵе ке блогеръёс кӧня сюрс гожтӥськисьёсты люкало, нош соос дуннее, улонэ кыӵе ке пайда пырто-а? Соослэсь адӟем кароно ӧвӧл, данъяськоно асьме ожгарчиосынымы, кудъёсыз асьсэлэсь службазэс нуо, данъяськоно асьме Героенымы. Гажамон адямиос луэ, Геройлэсь нимзэ данэн нуллэ. Тӥ пӧлын но, оло, сыӵе Геройёс будо, кудъёсыз улонзэс шаермес утёнлы сӥзёзы. Тау шуэме потэ школалы, соос арлы быдэ Героез тодэ ваё, уг вунэто. Вера Петровна, Николай Степанович, тазалык сӥзисько тӥледлы, эшшо трос аръёс ӵоже улоно на тӥледлы пиды понна но. Ваньдылы тазалык сӥзисько, тынӥсь улон, — таӵе кылъёсын вазиськиз ужрадэ пыриськемъёслы Олег Николаевичлэн Арча педколледжын ӵош дышетскем эшез Шамиль Саляхов.
Дышетскисьёс люкаськем калык азьын пуштросо кылбуръёсты лыдӟизы, чебересь кырӟанъёсты кырӟазы, шулдыр эктонъёсты эктӥзы. Школаысь «Егит армеецъёс» чебер формаен асьсэ ужзэс нуизы. 
Ужрадлэн самой шумпотымон вакытэз ӵошатсконъёсысь призо инты басьтэмъёсты нимысьтыз грамотаен но медальёсын пусъён луиз. 
Куасэн бызьылонъя ӵошатсконъёсын:
«Мыло-кыдо пыриськемзы понна» грамотаен пусйиськизы 1 классысь дышетскисьёс Игнат Игнатьев, Лия Трофимова, Елизавета Петрова.
2-4 классъёсысь пиос пӧлын:
1 инты — Роман Григорьев (4 класс);
2 инты — Максим Михайлов (3 класс);
3 инты — Ярослав Петров (4 класс).
2-4 классъёсысь нылъёс пӧлын:
1 инты — Анастасия Шадрова (4 класс);
2 инты — Софья Туктарова (4 класс);
3 инты — Валерия Чирикова (4 класс).
5-8 классъёсысь пиос пӧлын:
1 инты — Арсений Михайлов (5 класс);
2 инты — Даниил Троцианский (7 класс);
3 инты — Ярослав Смирнов (6 класс).
5-8 классъёсысь нылъёс пӧлын:
1 инты — Лиана Апакова (7 класс);
2 инты — Рузия Гафетдинова (5 класс);
3 инты — Диана Шишкина (5 класс).
9-11 классъёсысь пиос пӧлын:
1 инты — Яков Евдокимов (8 класс);
2 инты — Константин Исаев (9 класс);
3 инты — Денис Яковлев (8 класс).
9-11 классъёсысь нылъёс пӧлын:
1 инты — Ульяна Евдокимова (11 класс);
2 инты — Ангелина Кешишева (9 класс);
3 инты — Юлиана Кешишева (11 класс).
Волейболэн шудонъя йылпумъянъёс:
Нылъёс пӧлын:
1 инты — Ӟаны шоръёзо школа;
2 инты — Ципья шоръёзо школа;
3 инты — Ӟаны шоръёзо школалэн сборной командаез.
Пиос пӧлын:
1 инты — Ципья шоръёзо школа;
2 инты — Ӟаны шоръёзо школалэн сборной командаез;
3 инты — Ӟаны шоръёзо школа.
Вормисьёсты но призо инты басьтэмъёсты сюлмысь ӟечкыласьком, азьпалан вормонъёсты эшшо но тросгес мед луозы. 
Геройёсмы улэп соку, куке асьмеос соос сярысь малпаськом но тодамы возиськом. Соосты, соослэсь подвигъёссэс, улон сюрессэс вунэтыса, асьмеос вунэтӥськом быдэс шаермылэсь историзэ но юнматскон сюрессэ. Геройёсмы котьку вӧзамы мед улозы! 
Герой луыны котькуд адямилы ӧз кылды ке но, ас калыкедлы, ас ужедлы кулэ луись но шонерлыко мед луод. Азьпалан но Героймылэсь данзэ утисьёс трос мед луозы! Улонысь пыраклы кошкем Геройёсмылэн сопал дуннеын улонзы тынӥсь но сяськаяськись медло!