«Гудыри» газет потыны кутскем дырысен 105 ар тырмиз

31 коньывуонэ «Гудыри» (туала «Удмурт дунне») газетлэн нырысетӥ номер потэмез дырысен 105 ар тырмиз. Сюлмысь ӟечкыласьком! Зэмзэ но, туж сӥё-дано пуслык. Арысен аре газетлэн вылтусэз, пуштросэз вошъяськиз ке но, зэмос лыдӟись понна со сыӵе ик валтӥсь удмурт газет кылиз. 

Туала «Удмурт дунне» газетлэн валтӥсь ужпумез — лыдӟисьёсты Удмуртиын но элькунысь гуртъёсын ортчись ужрадъёсын тодматон. Озьы ик со дунне вылын удмуртъёсын герӟаськем ужрадъёсты но югдытэ.

Удмурт Элькун понна «Удмурт дунне» газет самой сӥё-дано но бадӟым влияни сётӥсь луэ. Солэн историез 90-тӥ аръёсы выйе, та дыръёсы ик элькунын дырын-дырын потӥсь газетъёс вӧлмыны кутско. 2005 арысен «Удмурт дунне» газет кылдон сюрессэ мукет сямен лыдъяны кутскиз: 1915 арын — «Войнаысь ивор», 1917–1918 аръёсы — «Удморт», 1918 — «Виль син», 1918–1930 — «Гудыри», 1930–1940 — «Удмурт коммуна», 1941–1943 — «Удмурт правда», 1944–1992 — «Советской Удмуртия». Туала газетлэн нимыз 1992 арысен пуктэмын. 
«Гудыри» газетлэн нырысетӥ номерез печатламын вал Алабгоын, редакторез Трофим Кузьмич Борисов луиз.

Со дырысен газет кузь но секыт сюрес ортчиз. Пӧртэм шуг-секытъёсты ортчыса, секыт югдуръёсысь потыса, эрико луэмзэ но зэмлыксэ ӧз ышты. Туннэ нуналэ газет туж юн медиа-ресурс луэ, лыдӟисьёсыз понна асдыръем пайдаё иворъёс сётӥсь но ужрадъёсты синйылтӥсь.
Изданилэн валтӥсь тодметэз — мерлыко малпан кылдытон но лыдӟисьёсыныз кусып возён. «Удмурт дунне» пӧртэм огазеяськонъёсын мылысь-кыдысь валче ужа, вакчи кусып возёнъя но информациен вошъяськонъя форумъёс, конференциос, пӧртэм ужрадъёс ортчытэ. 
Удмурт калыкен герӟаськем ужрадъёсты, вормонъёсты но палэнэ уг кельто. Туала интернет ресурсъёс вакчи дыр куспын иворъёсты сётыны быгато ке но, газет аспӧртэмлыко луэ. Татын яркыт буёло туспуктэмъёсын матынгес тодматскыны луонлык вань, ӟучъёс верамъя, «на ощупь» шӧдыны быгатӥськом. Туспуктэмез рос-прос учкыны но луэ, текстъёсты но дыр ортчыса вакчи дыр куспын шедьтыса лыдӟыны капчи. 

Котькуд газет — иворъёсты эскерыса но чакласа поттӥсь ресурс. Лыз экран пыр котькуд адями зэмлыко-а, зэмлыктэм-а информациез ас сяменыз сётыны быгатэ, нош лыдӟисьёс доры рос-прос малпанъёс вуо. 

Азьланяз но бускельысь удмурт газетлы азинсконъёс сӥзиськом, тунсыко шумпотымон иворъёс но малпанъёс!