Гуртаз сое гажало, дораз утё, ярато но бадӟым каро

— Мон улонэ сярысь мар вераны но уг тодӥськы, зэмзэ верано ке, — мадёнзэ кутскиз Ольга апай. — Вордски 1942-тӥ арын Пор-Кутеш гуртын. Улонмы туж секыт вал, туж. Пичи дырысен тэльмырыса, сютэм улонэз адӟыса будыны тупаз. Анай-атаймы кыкназы но огшоры крестьянъёс вал, гумыразы колхозын ужазы. Милемыз, вить нылпиоссэс, пыд йылазы султытӥзы. Одӥг апаймы висьыса кулӥз. Ма, зэмзэ верано ке, мынам аслам но пичи дырысен тазалыке лябгес вал, ӵем висьылӥ. Пичи дырысен ик монэ анае ныпъяса сьӧраз араны ветлытэм — нокин возьмась ӧвӧл ук, атае оже кошкемын. Тӥни сыӵе аръёс вал со — секытэсь, сютэмесь. Ваньзы озьы улӥзы, нокин нокинлы ӧз ӝожтӥськы. Чидамы, ӧм сётске.

Жугиськон аръёсты Ольга апай уг тоды ке но (со соку туж пичи вал али), ожмаськон бере луэм аръёсты со ноку но вунэтыны уз быгаты. Поттурын сиыса улэмез (созэ но котьку шедьтыны луымтэ), пичи дырысен секыт ужъёсты быдэстэмез — сое вунэтыны луоз шат? 

— Тазалыке лябгес луэмысь, школаын но кема дышетскыны ӧй быгаты мон. Озьыен, Ӟаны гуртысь школаын вить классэз йылпумъяса, ужаны кутски ини. Со дырысен ужай но ужай, ужай но ужай, дышетскон сярысь малпанъёсы но ӧй вал ини, — маде Ольга Евдокимовна.

Дас кык аресъем Ольга гуртысьтыз колхозэ ужаны интыяське. Мугореныз пичи луымтэ бере, Ольгалы котькыӵе секыт ужез кышкатэк оско, нюлэскы но ужаны лэзьяло. Озьы, висемез сярысь вунэтыса, солы ваньзэсын огкадь тыршоно луэ. 16 аресэз тырмем бере, егит ныл Шеморданэ фуражлы тракторен ветлыны кутске, гужемзэ кутьы возьма, пудо котырын трос ужа.

1962-тӥ арын Ольга Евдокимовна Тагашуре картлы кошке. Вуоно кузпалэз Дмитрий (гуртазы сое «Тукай» шуиллям) Ольгалы соку ик синмаськем. Нош Ольга нырысь пумит луэм, кема малпам. Собере валам: Дмитрий сое зэмзэ но яратэ.

— Татын, Тагашурын, вуоно кузпалэлэн коркаез пичи, мунчо быдӟа гинэ вал. Кузпалэ тыршыса корка ӝутӥз, трос ужаз. Мон лыктыку, Дмитрий анаеныз гинэ улэ вал, атаез ожын кулэмын. Озьыен, куиньнамы улыны кутскимы, — вера Ольга Евдокимовна. — Капчи ӧй вал, но ми ваньзэ чидамы, ваньзэ ортчимы.   

Тагашуре улыны лыктэмез бере, кӧня ке дыр ӵоже Ольга Евдокимовна Ципья гуртысь мех фабрикаын ужа. Дукерья нимо кышномуртэн ӵош соос пӧсен но, кезьытэн но, зорен но, лымыен но ужзэс кельтытэк, бускель гуртэ ужаны ветло. Но Ципьяын Ольга Евдокимовна кема уг ужа — нырысетӥ нылпизы вордскем бере, со гуртысьтыз фермае ужаны интыяське.

— Нылпи вордскем бере, мукет гуртэ ужаса ветлыны ӧз луы ни. Соин фермаямы интыяськи. Со уж мон понна тодмо вал ини, соин кышканэ ӧй вал, — валэктэ со.

Ольга Евдокимовна пенсие потытозяз фермаын ужа. Ыжъёсты, кунянъёсты, скалъёсты сюдэ. Нокыӵе ужлэсь уг юрды.

— Игорь вордскем бере кык толэзь но ортчытэк, ужаны потӥ. Валэн кыед куяны пыри. Нуныме кельтон инты ӧй вал, мон сое пичи уробое поныса сьӧрам ветлытӥ. Ачим кыед куясько, ачим пие сярысь малпасько. Озьы но тӥни ужано вал, кызьы анае монэ пичи дыръям сьӧраз ветлытӥз, мон но аслэсьтым пиме озьы ик ветлытӥ.., — тодаз вае Ольга апай фермаын ужам аръёсыз сярысь.  

Дмитрий кузпалэз но ужась, тыршись воргорон луэм, гумыраз колхозын тракторен ужам. Жаляса верано, 2010-тӥ арын со кулэм ини. Со дырысен Ольга апай Иван пиеныз улэ.

— Пичи дырысеным ужез тодыса будӥськем вал бере, 2002-тӥ арын пенсие потэме бере но, ужтэк ӧй пукы — тямыс ар ӵоже гуртамы почтальон луыса ужай али. Тазалыкед луиз ке, ужлэсь кышкано ӧвӧл. Табере тани ужаны уг луы ни, дорын пукисько. Яра али пие вань, соин кыкнамы улӥськомы. Нылпиосы, внукъёсы куное бертыло, — шуэ песянай. — Вить нылпиосы вань — Светлана (Ӟаны гуртын улэ), Олег (Ципьяын улэ), Ираида (Шеморданын улэ), Игорь (Ципьяын улэ), Иван (анаеныз ӵош улэ), — шумпотыса вера кышномурт.

Туннэ нуналэ Ольга апай шудо но узыр песянай но ини. Солэн дас внукез, тямыс правнукез вань. Соосты со котьку чидатэк куное вите. 

— Мон шудо анай но песянай, ӵужанай. Нылпиосы, внукъёсы монэ уг вунэто, бадӟым каро, куное бертылыса уло. Шудо луон понна пересьмон даурын нош мар кулэ на? Тазалыкед мед луоз но матысьёсыд мед яратозы. Мукет номыр но кулэ ӧвӧл, — йылпумъяса вераз Ольга апай.

Нош ачиз, синкылиоссэ ватыса, Даша внучкаезлэсь ваем сирень сяськаоссэ кияз кутӥз но, пальпотыса, аслаз малпанъёсаз выйиз.