Калыкысь потэм чуръёс — дунъянтэм ваньбур

Вуы мыныса вутэк бертӥ, 
Кобые эбуись.
Огпол пуксьыса мон бӧрдӥ,
Кылкымесэ килемись.

Сьӧд нюлэслэн шораз будэм
Одӥг кизьпуэд — Лельвиж.
Гуртлэн шораз будэм
Одӥг шудтэм — ныл.

Сьӧд нюлэстэ потыкы,
Паллян пала кожем бере
Эй, туганъёсы ӟеч луэ
Мынэськым люкиськем бере.

Ву дюись вож бадьпу ке мон луысал,
Ву кисьтатэк будысал,
Шудо ныл ке луысал мон,
Анаен-атаен будысал.

Чиньыяд понэм азвесь зындэсэд,
Тямстон тямыс номеро,
Тямстон тямыс ар улӥ ке,
Уг вунэты тӥледыз.

Эн вунэтэ турынэз,
Эн вунэтэ сяськаез,
Уг вунэты мон тӥледыз,
Эн вунэтэ тӥ монэ.

Лыз-пурись валлэн пыдаз,
Бугор вань бугорез вандӥз.
Вань ум сюлмаське, ум бӧрдэме, 
Сюлмаськонэз буйгатӥсь Иньмар вань.

Эмезь бичаме потыса,
Чебер гужемме ортчытӥ.
Анай-атайлы вожъяськыса,
Даурме ортчытӥ.

Укно улам улмопу мертӥ
Куарезлэсь уно сяськаез.
Ньылэз-пиез вордэм бере,
Ӟечезлэсь уно бӧрдонэз.

Нюлэс дурын папа кырӟа,
Кырӟамъяз пыдло пыре со.
Анайтэ-атайтэк будэм нылпи
Улэмъяз ӝоже усе.

Ми кулӥмы ке, дунне килёз,
Ми вылэ вож бадьпу ӝужалоз.
Со бадьпу вылын кикы силёз,
Милемыз налпасез бӧрдоз.

Кезьыт куазед, кезьыт гӧпэд
Шобырськон шуба кинь сётоз.
Анае ӧй ло, атае ӧй вал,
Кенеш сётӥсе но ӧй вал.

Чияк шултэ уӵы папа
Ӱйшор вуон вадескын.
Эн киль анайтэк, эн киль атайтэк,
Мугорысьтым ӝужан вадескын.

Кузь урам кузя мон ветлӥсько, 
Шильтыртысь емыш сийыса.
Шильтыртӥсь емыш дуно эбу,
Анаен атай туж дуно.

Милям мыноно сюресмы,
Кык палаз ик канало.
Ми ум кырӟалэ, кинь кырӟалоз,
Милям нуналмы лыдӟемын.

Кизьпу куар векчи ӝужа,
Векчи ӝужа, вож ӝужа
Куарлэсь вожзэ пужмер басьтоз,
Милеськым ӝожез кинь басьтоз.

Сьӧд нюлэс медам, гыль сяська медам,
Солэн шораз ву медам,
Аськомы медам, ум аське медам,
Оло вань аськем та медам.

Тэтэ сяськадэ бичатэк кили,
Али уз тӧлӟы шуыса,
Верано кылме вератэк кили
Али ум люкиське шуыса.

Ум люкиське шуыса,
Бур киме ӧй сёты.
Люкиськонмы арен ӧз лу
Часэн минутэн луиз.

Ӟеч лу но ӧз шуы,
Потыса кошкиз машинае.
Пуксьса монэ огнам кельтиз,
Капка выжые гуньдытыса.

Пурак-пурак сӧсыпӱэд
Чырдэ уӵы папаед.
Чырдэ уӵы папаед но,
Бӧрдэ мынам сюлэмы.

Анае монэ эн кырӟа шуиз,
Кырӟад ке, бӧрдод шуиз.
Анайлӥсь верамзэ пелям ӧй поны,
Соин мон кырӟай ке, бӧрдӥсько.

Кыӵе тӧдьы сяська медам со,
Турлы кезьытлы со чида.
Кыӵе анай сюлэм медам со
Турлы кужмолы со чида.

Чагыр сяськаё кышетме
Кертэме потыса улӥсько.
Тӥ мусо туганъёсме
Адӟеме потыса улӥсько.

Сьӧд сюё гурезь пудэн
Сюрес гуждор уг ӝужа.
Пальмисько аслым ачым.
Пальмисько мылкыды тӥледыз яратэ.

Атае мынам виль минчо лэсьтэм,
Пырем медам анае?
Одӥг шудтэм ныл вордӥ шуыса,
Ӧкынэм медам анае?

Шудэ эбу, шудэ эбу,
Шудэ эбуись бӧрдӥсько,
Тушан шудо луиз ке гынэ,
Мед вордӥськоз ныл нуны. 

Чай пӧсьтӥд ке, сакыр кулэ,
Сур ке луысал, ярасал,
Нылэз-пиез вордэм бере,
Ӟеч кыл ке но, ярасал.

Озьы ке но уло шуисько вал,
Тазы ке но уло шуисько вал.
Нылэз пиез вордэм бере,
Кадырлы луо, дыр, шуисько вал.

Пукон вылады мон но пуксьысал,
Уксё куремдылэсь кышкасько.
Сётэм гинэ аракдэс дюысал но,
Визьмы ышемлэсь кышкасько.

Мынам туганъёсы мар каик,
Кесмег пыдэсысь му каик,
Туганъёс аркаин мон пукисько
Горшоке пуктэм гыль каик.

Анае монэ вордытозь,
Ворды вал пуныен коӵыштэ,
Коӵышед шырдэ кутысал,
Пӱныед дордэ возьмасал.

Кыӵе писпулэн куарез медам
Шундылы пумить со пиштэ.
Кыӵе музъемын ветло медам,
Тыр толэзь кадь пиштыса.

Нюлэске мынӥ пу кораны, 
Корам пуэ туж токмо.
Ӵукна вырӟи ке, ӝытозь кырӟасько,
Мынам шудтэме туж токмо.

Кубыстаяды ву кисьталэ,
Кубыста ву яратэ.
Анайлы ӟеч кыл вералэ,
Анай ӟеч кылэз яратэ.

Зороно куазед мед зороз,
Валлэн пыд бер ышытозь,
Верась муртъёс мед вералозы,
Ӝужам шунды пуксьытозь.

Ой, туганъёсы, мусоосы,
Тӥ ваньды но мак сяська.
Мон гынэ огнам будӥськем,
Ӟег пушкись лыз сяська.

Сизьымо лампы люгыт ӝуа,
Пушказ вӧйыз луиз ке,
Монэ нылпиосы уз куштэ али,
Сюлмазы яратонзы луиз ке.

Озьы шуыса ӧй налпа,
Тазьы шуыса ӧй налпа,
Пинал дауры мак сяська вал,
Орчоз шуыса ӧй налпа.

Мак сяська тӧлӟыса кошке,
Киньлы кулэ модосэз?
Нылпиёс будо, потыса кошко,
Киньлы кулэ анай мурт?

Гожтэт гожтӥ тӥледлы,
Азь чиньые жадьытозь.
Уг вунэты тӥледыз,
Иньмар лулме басьтытозь.

Пушнер выжыяд ӝуйы,
Уз поты пушнерез нюлэс,
Уз шу аслам туганэ,
Аслым мусо со муртлы мусо уз поты.

Бадӟым сюреслэн тузоназ килиз
Лёгам пыд беры ортчыса.
Кошкиз, шӧдытэк кили
Пинял даурлӥсь орчемзэ.

Ойдо, мынӥм ке, мыныса бертом,
Гурезь бамад борылы.
Со борыез «дару» шуо,
Тылтэк ӝуась сюлэмлы.

Куазед ӝыт лӱэ
Шундыед пуксе — кышкасько дятлэн музъемаз,
Дятлэн музъемаз мон ыши ке,
Монэ утчасез кин луоз?

Сари валэд кӧй эбу,
Пыдыз но тямыс эбу.
Ой, туганъёсы ум салляське,
Чиньы но тэгыз эбу.

Дунне вылын улон дыръя,
Яратон муртыд мед луоз.
Яратон муртыд тонэ мед яратоз,
Тон но сое мед яратод.

Ой, атас чоръя, атас чоръя,
Пальмисько атас чоръямлы.
Атас чоръямись уг паймиськы,
Даур орчемлы пальмисько.

Мынам пыды марлы кынме?
Тӧдьы чулкое эбуись,
Мынам кӧты марлы бӧрдэ?
Корка пушкын яратон эбуись.

Шундыберганлэн сяськаез,
Огпол но голькыт уз луы.
Пинал даур орчем бере,
Огпол но пинал ум луэ.

Кам дурады уӵы кырӟа,
Уӵы эбу, ваёбыж.
Огмы уӵы, огмы ваёбыж,
Медам люкиське шуисько.

Ой, эсьмаса, эсьмаса,
Сизьым палэзь кисьмаса.
Бертэ вал ини нуныкаос,
Жади ини витьыса.

Дӥсян кызь дэреме,
Мед ӵужоз со урамдэ.
Монэ туган тустэм шуиз,
Мед утчалоз моторзэ.

Анае монэ вордӥськем берам,
Тӧдьы кышетэн бинялтэм.
Тӧдьы кышетэн бинялтэм бераз,
Шудо медло шуыны вунэтэм.

Толэзь люгытлэн люгытэз,
Нунал люгытлэн ӝыныез.
Ӵужанай анайлэн ӟечлыкез,
Аслам анайлэн ӝыныез.

Гурезь бамад боры кисьма,
Шунды пӧсьлы шумпотыса.
Тӥ ӧтиськоды, мон мынӥсько,
Ӧтемдылы шумпотыса.

Озьы но шуэмзы потэ,
Тазьы шуэмзы потэ.
Музэ усем куарез лёгам кать,
Лёгаса кошкемзы потэ.

Ой, туганъёсы, мусоосы,
Гымырмы кык пол уз лыкты.
Гымырмы кык пол лыктысал но,
Ачимес улыны ум тодӥське.

Ой, толэзе, ӝужыт ой, толэзь,
Ӝужыт толэзе тубем потэ ук.
Толэзе пуксьыса уллань уськыса,
Тӥледыз адӟеме потэ ук.

Умопу мерттӥ, бадьпу мерттӥ,
Кудӥз мерттӥськоз шуыса.
Нылме вордӥ, пиме вордӥ,
Кудӥз утёз шӱыса.

Уг пальмиськы, уг ёрмиськы,
Тӧлтэк тузон пурӟемлы.
Уг пальмиськы, уг ёрмиськы,
Монэ верало шуыса.

Налпаськод медам тон, туганэ,
Ӝытазе валче пукемдэ.
Ӵукна шунды ӝужакы
Люкиськыса кошкемдэ.

Бадьпуэн пуньы лэсьтысал,
Будьпулэн выжыез туж небыт.
Пинал даурме сяська карысал,
Сяськалэн гымырыз туж вакчи.

Уӵы чырдэ, чин медам,
Куаклы быдэ вань медам?
Тӥ кадь яратон туганъёс,
Весь син азям медло вал.

Ӟичы пась дӥсяй кынмонтэм,
Дӧдьые пукси усёнтэм,
Милям та сямен сием-юэм,
Гымырын ӵоже вунонтэм.

Веник дасяй, веник дасяй,
Толалтэлы мон дасяй.
Кырӟан кылъёсме гожъясько,
Монэ налпаса кырӟалэ.

Изиськод медам, бабиськод медам,
Киостэ кияд поныса.
Киостэ кияд понэм берад,
Налпаськод медам тон монэ?

Мызгандэ каллен тон шыды,
Кырӟам куара мед кылӥськоз.
Тынад шудэмед мынам кырӟаме,
Мӧзмыса вераны мед килёз.

Турлы сяська усьтӥськытэк гынэ,
Ум тодиське гужемлӥсь вуэмзэ.
Ачимес гинэ анай луытэк,
Анайлэсь кадырзэ ум тодӥське.

Ой, вукое, ой вукое, 
Нынал потэм изэ медам?
Мынам сюлмаськонэ
Нынал потэм будэ медам?

Дыдыке-мусое, одӥг 
Тылыед кеськем ук.
Одӥг мон гынэк-а ма
Туганлӥсь люкиськиськем ук.

Нюлэскын писпу туж уно,
Шупуысь ӵашкытэз чик эбу.
Гуртын калык туж уно вал но,
Мынэськым ӝожез чик ӧй вал.

Гужемен толэн вож будӥсь —
Одӥг ньылпуэн кыз гынэ.
Турлы паласен ӝожен будӥсь —
Нылъёс пушкысь мон гынэ.

Укно выжыям куинь марӟан вань 
Киньлэн синмаз со детоз.
Эбу мынам апай-сузэре,
Киньлэн сюлмаз мон дето.

Тон но уӵы пи, мон но уӵы пи,
Кытцы мыныса чирдомы?
Агай-вынъёсы эбу мынам,
Киньлы вералом кӧтӝожме?

Сьӧд нюлэс сьӧрад боры уг кисьма,
Бичасез уно шуса.
Кӧтӝожме муртлы уг вераськы,
Басьтӥсез уз ло шуса.

Лымы лымые, со но бытмоз
Ваёбыж лыктоз кырӟаса,
Ваёбыж лыктоз арлы быдэ,
Ми ум луэ огпол но.

Гожтэт гожтӥ мон тӥледлы,
Гожтоды медам тӥ мыным.
Уӵы каик тӥ мыным,
Кыӵе медам мон тӥледлы.

Озьы шуыса кырӟасько,
Тазьы шуса кырӟасько,
Кырӟан кыл ӧй дышеськы,
Улон дышетӥз кырӟаны.

Сиеме потэ, дюэме потэ,
Сакырен дёмыш сиысал
Аськем потыкы, вераськем потыкы, 
Бубыли луыса мынысал.

Тубыса гынэ вуон дыръя,
Ӝужыт луиз гурезед.
Будыса гынэ вуон дыръя,
Секыт луиз аръёсыд.

Ӵукна ӵынкыт ӝыт но ӵынкыт,
Мар сайкиськонтэм та ӵынкыт.
Ӵукна кӧтыӝож, ӝыт но кӧтыӝож,
Мар сайкиськонтэм та кӧтӝож.

Ӵукна вырӟыса вуы васькисько,
Лысвуэн миськисько пыдъёсме.
Нылэз-пиез вордыса,
Синвуэн миськисько бамъёсме.

Капка азям кинь кенер вань
Ӵукна ик васькоз ӵанаед.
Огмес огмы гажамы ке,
Шулдыр орчоз даурмы.

Урамтӥды орчон дыръя,
Вылам канзолэ вал медам?
Тӥледын туган луонэ
Уйин вӧтам вал медам?