Одӥг гуртын кык сюан!

Одӥгаз сюанын ветлыны мыным но шуд кылдӥз. Пумтэм тау карисько, паймисько но шумпотӥсько асьме Шушмо палась сямъёсты тодыса-валаса сюан карись анай-атайёслы.
Сырья гуртын туннэ кык сюан! Инкуазь но шӧдэм кадь туннэ: яркыт шунды пиштэ, чагыр инбам, вазь ӵукна атасъёс чоръяло, машинаос гурт кузя гужгетыса отчы-татчы ветло. Коркалы быдэ агайёс но апайёс туж чырткем, ури-бери бызьыло, кин пудо уте, кин ӝӧк котыр берга, мызганэз но дасяно, машина чеберъяно, нош апайёс синучкон азьын ӟабыльто, вуюись кадь дэрем-айшет дӥсяса, камалиосын жингырто.
Кема малпаськыса улыны дыр ӧвӧл, Ӟаны гуртэ «сяськамес» басьтыны вуимы.
Голькыт сяськаез утчаса, ай кай,
Вуимы Шушмо возь вылэ, ай кай!
Визьмо нылъёсыз утчаса, ай кай,
Вуимы дас вить иськеме, ай кай!
А-а-айдыр гинэ мед ай дон, ай дон!
Милемыз пумитазы туж мыло-кыдо тӧр пукисьёс, нянен-сылалэн но «черыге понэм ческыт аракен». Жӧктыр сиён, асьсэос каньыл, корказы шулдыр — кызьы уд лыкты тӥ доры! Туж сабырлы, вань кадь сюан сямъёсыз валась Тоня апаймы кыл поттыса лэзе. Сюанчиос устоесь, кырӟась но эктӥсь тупаллям, нош мызганчимы кыӵе капчи шудыны быгатэ, ачиз но эктэ, кырӟа. «Усто мызганчи — ӝыны сюан», — шуэм калык, тӥни сыӵе милям егит Юрамы! Кубомы бен милям кыӵе? Нылкелянэ ӵыжы-выжыос но бускельёс гажаса кузьымен лыктӥллям, табере кубомы ӝутыса вормонтэм узыр!
Озьы тупатэм улон, анай-атай юртысь тылобурдо сямен лобӟыса кошкыны тупа нылпиослы но. Тани чебер «сяськамес», шумпотыса но, бӧрдыса но, сьӧрамы басьтӥм. Выль эмеспи но вылькен парен юсьёс сямен ог-огзэс шедьтӥллям, сюанэз — Мишалэн, шулдырез — Людалэн!
Ӝоген Сабантуй майданэ вуим, пумиськизы ведь Сырья гуртысь сюанчиос! Ма кызьы ӵош юмшатэк, кык сюан огазе: шарт каро, йыг каро, карс каро! Апайёс камалиосын жингырто, питыран кадь бергало, мызганчиос вожмаськыса шудо! Паймод эке та Сырьяослы: ужан дыръя ужало, юмшан дыръя юмшало — ваньзэ радэн, мылысь-кыдысь карыны быгато.
Тани ЗАГС-э но пыримы, кык «дыдыкъёс» одӥг сюрес бырйыса вамыштозы выль улонэ, Люда но Миша кузпал луизы, нош анай-атайёс — кудо-туклячи. Ӟечкыласькомы тӥледыз сюлмысен, шуд но юн тазалык ваньдылы.
Нуналлэсь ортчемзэ шӧдытэк ик кылимы, ӝоген ӝыт но вуиз. Туж чебер но бадӟым залэ сюанчиос но аськисьёс огазе люкаськизы: сиимы но юимы, кырӟамы но эктӥмы, серекъямы но бӧрдӥмы, пумиськимы но тодматскимы, шулдыръяськимы но эшъяськимы!
Уйшорозь чузъяськизы пӧртэм калык эктон гуръёс, быгатэмзэс возьматӥзы выль кузпалъёс но: асьсэос чебер, эктыны но кырӟаны устоесь.
Жингыртыса лыктӥз милям сюанмы, гурласа бертӥз ас дораз — Пильмон Сандырлы кен вайимы!
Турын турнаны ӧм ке но тодэ, ай кай,
Мажтаны ке но быгатӥм, ай кай!
Сюан карыны ӧм ке но тодэ, ай кай,
Сяськаез вайыны быгатӥм, ай кай!
А-а-айдыр гинэ мед ай дон, ай дон!
Сырья гуртысь выль семья кылдытэм кузпалъёс! Улон сюресъёсты кузь, паськыт, югыт, вольыт, мылкыдъёсты котьку но дун ошмес кадь чылкыт, яратонды пӧсь шунды кадь ӟырдыт мед луоз!

Нина Андреева
Нолинск, Киров улос