Кыкетӥзэ Балтась ёросын ортче

Котькуд аре Татарстанын «Гырон быдтон» праздник улсын ортче удмурт лулчеберетэн тунсыкъяськись егитъёслэн улосвылкуспо «БиГерд» форумзы. Туэ со 26-28-тӥ инвожое Балтась ёросысь Ӟаны гуртын ортче. 

Тодады вайытӥськом, форум 2017-тӥ арын кылдӥз но нырысетӥзэ аслэсьтыз ужзэ радъяз Менделеевск ёросын ортчем Элькун «Гырон быдтон» улсын. Балтась ёросын со кыкетӥзэ ортче ини, нырысьсэ асьме дорын форум радъяськиз 2018-тӥ арын Покчи Лӧзя гуртын. 

Ужрад егитъёсты удмурт калыклэсь лулчеберетсэ но кылзэ улӟытон, утён, азинтон но сям-йылолъёссэ вӧлмытон уже кыскон, ог-огдэ гажан принципъёс вылэ пыкиськыса, пӧртэм йӧскалыкъёслэсь но лулчеберетъёслэсь кусыпъёссэс юнматон но азинтон выльысь радъяське. Озьы ик форум мыло-кыдо егитъёс пӧлысь азьветлӥсьёсты шараян, егитъёслы ужбергатӥсьёсын, мерлыко азьветлӥсьёсын, кивалтон ёзэсъёсысь ыстэм муртъёсын кенешон понна площадка но луэ. 

Котькуд аре форум аслэсьтыз ужзэ кӧня ке ӧръёсъя нуэ. Туэ егитъёс «Фольклор», «Вершители» но «Театр» ӧръёсъя ужало.