«Кырӟалэ, эшъёс, кырӟалэ!» книгалэн презентациез ортчиз (фоторепортаж)

18-тӥ инвожое Сырья гурлаз — гуртысь клубын сырьяос асьсэос, бускель гуртъёсысь удмуртлыкез утён сярысь сюлмаськись адямиос, Киров улосысь но Удмуртиысь Семык празднике но нимысьтыз та ужрадэ бертэм куноос «Кырӟалэ, эшъёс, кырӟалэ!» шуыса нимаськись книгаен тодматскон ӝытэ люкаськизы.

Та ужрадэ люкаськонлэн валтӥсь мугез книгаен тодматскон вал ке но, со кемалась адскымтэ гуртоослэн, ӵыжы-выжыослэн но эшъёслэн туж шуныт пумиськонзылы пӧрмиз. Котьку кадь ик, сырьяос, ужрадлы пыр-поч дасяськыса, сое вылӥ радлыкен ортчытӥзы. Со ӝытэ югыт клубын чузъяськизы адямиослэн серекъям куараоссы, мызган гуръёс, дугдылытэк кылӥськизы Леонид Дмитриевичлы верам таукарон кылъёс но…

Концерт кутскиз Николай Жуковлэн «Пумиськон» кырӟанэныз.  «Та кырӟан пумиськонмылэсь пуштроссэ сэрттэ-пертче, возьматэ», — пусйиз Леонид Сапожников.

Ужрадэ вуэм сӥё-дано куноос пӧлын луизы Балтась ёросысь исполкомлэн кивалтӥсезлэн воштӥсез Ильгам Гайнутдинов, Ципья гурт поселенилэн тӧроез Азат Нотфуллин, Балтась ёросысь удмуртъёслэн «Кенеш» автономизылэн правлениезлэн тӧроез Ольга Пчельникова но мукетъёс. Та ӝытэз шулдыртӥзы «Сырья зоутъёс» ансамбль, Дургаысь Фирдания но Николай Алексеевъёс, Татарстанысь культура удысысь сӥё-дано ужасьёс но Геннадий Кузнецов, тодмо аспалмы, Россиысь сӥё-дано артист, Удмурт Элькунысь калык артист. Книгалэн авторез, Леонид Сапожников, пусйиз, таӵе сюлмо пумиськонъёс — зэмос авторъёсын пумиськон — шер луо, дыр, шуыса. Книгае пырем кырӟанъёслэн авторъёссы пӧлын вань Геннадий Кузнецов но, Николай Алексеев но. Ӵапак соос ик та ӝытэ асьсэлэсь кырӟанъёссэс быдэстӥзы. Кӧня ке ар талэсь азьло югыт дуннеен люкиськем Николай Жуковлэн но кырӟанъёсыз та сборнике пыремын. Люкаськем калыкез озьы ик шулдыртӥзы «Сырья зоутъёс» ансамбль но, соос котьку кадь ик номеръёссэс туж умой, калыклы кельшымон карыса быдэстӥзы.

Леонид Дмитриевич та ӝытэ ӧжытак вераз книгазэ поттэмез сярысь но:

— Таӵе пичи, кисые тэрымон книга поттыны мынам йырам но ӧй вал. Та малпан кылдэм Сырья гуртлэсь туж кыдёкын, Санкт-Петербургын улӥсь Шмелёв Алексей Юрьевичлэн йыраз. Ачиз врач, Ижкарысь медакадемиын дышетскыса, сюрес кутӥз Санкт-Петербурге. Аслэсьтыз ужзэ но нуэ, дышетске но со. Удмурт ужез но азьлань кыске. Алёшалэн удмуртъёс сярысь трос информациез вань, кулэ кариды ке, «ВК»-ын «Вужмем» группаын тодматскыны быгатоды. Жаляса верано, туннэ со татын ӧвӧл. «Юртты аслыд ачид» шуиз со мыным. «Бадӟым книга поттон понна лэсьты пичи книга, удмурт кырӟанъёсты яратӥсьёс вань, басьтозы», — шуиз. Туж шумпотӥсько лыктэмдылы, люкаськемдылы, ваньдылы тау карыса йыбырттӥсько. Тӥ ӧд ке люкаське, мынам мылкыды куашкасал, тау бадӟым, удмуртлыкез гажаса лыктэмдылы. Валче люкаськимы ке, туж шулдыр луэ ук.

Авторлэн верам кылъёсыз бере концерт программаез азьланьтӥз Геннадий Кузнецов.  Нош кияз мызганзэ кутытозь, Леонид Дмитриевичлэн куремезъя, Геннадий Васильевич вераз, кызьы со кырӟанъёсты гожъя. Но нырысь ик кырӟась ужрад сярысь кылдэм мылкыдъёсыныз вошъяськиз:

— Кыӵе шулдыр пукиськомы, семья куспын кадь, озьы ведь? Кызьы  анай-атайёс, вань нылпиос, валче люкаськыса, шулдыръясько-юмшало, куспазы верасько, асьмеос но озьы ик пукиськомы кадь. Соин мыным туннэ ӝытмы туж шуныт потэ, ваньзы кылзӥсько, чабо. Кемалась адскымтэ, но ог-огмылэсь мӧзмем муртъёс кадь асьмеос. Туж шумпотыса мон вуи тӥ доры, та мынам туннэ нуналлы ньылетӥ концертэ ке но. Кырӟанъёсты гожъян сярысь верано ке… Секретэз ӧвӧл, удмурт калык со туж кырӟась калык ведь. Со ас понназ кырӟаса, нукыртыса ветлэ. Выжзэ миське-а, мар ке каре-а — котьку но котькытын кырӟаса. Отысь ик кырӟанъёс но пото куддыръя. Нош тани кылбуръёс сярысь верано ке, вот соиз мынам уггес пӧрмы. Кырӟанъёсты мон гожъяны кутски кемаласьгес ини, али «Италмасын» ужакум. Адями пӧлы гинэ ӧй потты, ас поннам кырӟаса ветлӥ.

Геннадий Васильевич но Леонид Дмитриевичлы таукарон кылъёссэ ӧз жаля. Тросэз куноос кадь ик, со но Леонид Сапожников ас калыкезлэн зэмос патриотэз шуыса пусйиз.

Солэн аслаз но та книгае 10 кырӟанъёсыз пыремын — азьло гожъямъёсыз но, выльёсыз но.

«Кырӟалэ, эшъёс, кырӟалэ!» книга бордын Леонид Дмитриевич кылем гужеме ужаны кутскем. Пуштросаз — шошма удмуртъёслэн кырӟанъёссы, авторской кырӟанъёс. Обложкаяз мар поныны малпаськыса, калыкез та уже кыскон понна, соосты книгаен тунсыкъяськытон понна конкурс но ялӥз автор. Та конкурсэ котькуд мылкыд карись адями пыриськыны быгатэ вал. Вормисьлы 10 сюрс манет сётӥськысал! Но, жаляса вераны кулэ, сыӵеос куинь гинэ луиллям, куинетӥез ачиз автор. Нырысетӥез конкурсэ пыриськись Алексей Шмелёв луэм, кыкетӥез — Пётр Тургенев. Соос грамотаен пусйиськизы.

Концертэз азьланьтӥз Николай Алексеев, Дурга культура юртлэн директорез. Со кырӟанъёсызлы крезьгурзэ но, кылъёссэ но ачиз гожъясь автор:

— Крезьгур гожъясько ӝыт но, уйин но. Ку йыре нимысьтыз «сигнал» лыктэ, соку. Сыӵе «сигналъёс» лыктыку, тетраде соку ик гожтыса кельтӥсько, мукет сямен со вуныны быгатэ. Мызганэз кутӥ ке, ваньмыз пӧрме, — шуэ со.

Николай Александрович Фирдания Ахатовна кузпалэныз ӵош но кӧня ке кырӟанъёссэ быдэстӥз. Выступленизы бере кузпалыз Фирдания апай но Леонид Дмитриевичез ушъяз. Со вераз, Сапожниковез калык яратэ но гажа шуыса, соин, солэн верамезъя, та ӝытэ Сырья клубе сокем трос калык люкаськем вал. Со сяна, кышномурт сырья калыклы синмаськемез сярысь но вераз, малы ке шуоно соос эшлыко, ог-огзылы котьку юрттыны дась. Пичи гинэ гуртэз но асьсэлэн тыршеменызы чебертыны, шулдыртыны быгато шуиз.  Таукарон кылъёссэ со вуттӥз ваньзылы — Геннадий Кузнецовлы, вань артистъёслы, гуртэз но Леонид Сапожниковез ассэ гажаса лыктэм куноослы.

Леонид Дмитриевич но, солы верам шуныт кылъёссэ кылзӥськыса, трос таукаронъёссэ вуттыса, вераз:

— Оскисько, книга потэм бере кырӟан куараос, юмшан гуръёс удмурт гуртъёсын огез сьӧры огез чузъяськозы шуыса. Книгалэн пайдаез луоз шуыса туж оскеме потэ.

Ужрадэ ужъёсыныз сэрен берлогес вуэм куно, Ильгам Гайнутдинов, сценаысен туж чебер но зэм кылъёсты вераз:

—Туннэ татчы пырыкум, клубын удмурт калыклэн кизилиез, Геннадий Кузнецов, выступать каре вал. «Айкайлэн» юбилейной концертаз мыныны тупам вал Ижевске, соку мон, залын пукыку, асьме ёросэнымы туж данъяськи, Балтась ёросысь удмуртъёсын данъяськи. Отын вал асьме ёрослэн «люкетэз». Концертсы но шошма удмуртъёслэн кырӟанэнызы кутскиз.  Финалзы дыръя но ог кызь минут «Аксионын» адямиос султыса чабизы, концертэз балтась удмуртъёслэн кырӟанэнызы йылпумъязы но. Туж данъяськи мон соку, али но данъяськисько. Шумпотӥськомы, пӧртэм калыкысь нылпиос — удмуртъёс, поръёс — асьме ёросамы вордскем кылъёссэс дышетскыны быгато шуыса. «Азьлане» газетмылэн луэмез но туж шумпотымон. Со ведь вань республикалы одӥг удмурт кылын потӥсь газет, со асьме газетмы. Леонид Дмитриевичлэн сомында ар ӵоже тыршыса, трос кужым поныса дасям книгаез но вуоно дыре улонэз адӟоз, та сярысь оскытыса вераны быгатӥськомы. Нош туннэ нуналлы та пичи сборниклэн потэмез но макем шумпотымон, макем пайдаё асьме понна. Со понна авторлы нош огпол бадӟым тау, — шуиз со.  

Леонид Дмитриевич зэмзэ но туж тыршись, аслэсьтыз малпанъёссэ улонэ пыӵатыны быгатӥсь, удмуртлык понна сюлмаськись шуыса котькин но туж умой тодэ. Туж йӧно кылъёс чузъяськизы та ӝытэ со сярысь.

Ужрадлэн сӥё-дано люкетэз бере куноос но ваньзы люкаськемъёс ӝӧк куспын кунояськыса, уйшорозь юмшазы, кырӟазы-эктӥзы но али. Та пумиськонысь, оскисько, ваньзы ӝутскем мылкыдын доразы бертӥзы.

Фото: автор