Кытчы ышиз Наталья Жукова?

Берло дыре Наташаез «кытчы ышиз» шуыса юалляськисьёс луылӥзы. Газетмес яратыса лыдӟисьёс пӧлысь аслыз гожтыса, жингыртыса юалляськисез но шедем. Соин Наташалэсь интервью басьтыны малпай — мед со ачиз мадёз, кытчы ышиз, кытын улэ, маин табере выре.

Вераськонмылы тупась муг но вань — таяз ӟучарняе иворчиос асьсэлэсь ӧнер праздниксэс пусъёзы, арлы быдэ 4-тӥ тулыспалэ Удмуртиын Йӧскалык печатьлэн нуналыз пусйиське. Наталья Жукова аслэсьтыз улонзэ ӵапак та ужен герӟаз ук...

— Наташа, одӥг ар талэсь азьло улонэд чутрак воштӥськиз — тон мукет улосэ картлы кошкид, улон интыдэ воштӥд, ужан интыдэ, матысьёстэ кельтӥд. Секытэн сётскизы-а тыныд та воштӥськонъёс? Дышид-а ни выль улонэдлы?
— Ачим гинэ тодӥсько, кыӵе мыным секыт вал, али но дышыса вуи шуыса вераны уг быгатӥськы. Анай-атай вӧзын улыны, яратоно ужам ветлыны дышемын вал мон, со сяна эшъёсы но матын гинэ улӥзы. Нош табере улонам ваньмыз выль — уже, валче ужано адямиосы, бускельёсы. Асьме диалектэнымы удмурт кылын гинэ но вераськеме уг луы — адямиос уг валало. Яра али кузпалэ вала, балтась удмуртъёслэн диалектсылы чаль дышиз. 
— Секыт йӧтӥз ке но, кема мӧзмыса пукыны дырыд ик ӧз луы, дыр, тынад — кошкеменыд валче Можга ёрослэн администрацияз ужаны интыяськид. Нялтас вераса, малы ёрос газетазы ужаны ӧд пыры? Тынад басьтэм ӧнередъя ужамед потэ вал ук котьку. 
— Можгае улыны кошкытозям ик резюмеме редакциязы келяськем вал. Монэ отчы ӧтизы, вераськизы, корреспондентлэсь ужзэ ӵектӥзы. Но со дыре ик витьымтэ шорысь ёрос администрациысь кивалтэт но жингыртыса уже ӧтиз. Кык ужан инты пӧлысь администрациысь ӵектэм ужез бырйи. Озьы 1-тӥ южтолэзьысен Можга ёросысь администрациын ивор сётӥсь ёзэтын валтӥсь специалист-эксперт луыса ужаны кутски. Должносте сыӵе чебер но тунсыко нимаськиз ке но, нырысь уже редакциын быдэстэмезлэсь туж ик ӧз висъяськы: озьы ик адямиосын пумиськылыса интервью басьтылӥ, гожъяй соос сярысь. Огшоры кылын верано ке, интернет вотэсэ ёросын ортчись ужрадъёс сярысь гожъяно вал мыным.
— Озьы бере, выль ужад нокыӵе шуг-секытэн ӧд пумиськы?
— Нуналлы быдэ пумиськисько. Секыт вал вакчи текстъёсты гожъяны дышетскыны — интернет вотэсын трос гожъямез нокинлэн лыдӟемез уг поты. Татын вакчияк, самой кулэзэ висъяса, малпанъёстэ вуттыны быгатыны кулэ. Газетын трос гожъяны дышем бере, талы шӧдскымон кема дышыны тупаз. Ужам туж шӧдскиз ёросэз но татысь адямиосты тодымтэе, али но та ласянь шуг-секытъёс кылдо. Кылсярысь, огпол монэ кык ужрадэ лэзизы — одӥг час куспын отчыяз но, татчыяз но вутсконо. Нош ортчо вал соос ёрослэн пӧртэм палъёсаз. Медам вунэты шуыса, блокнотам гожтӥ, кыӵе гуртэ но кӧня часэн мыным вуоно. Водительлы верай, нош со, монэ янгыш валаса, воксё мукет гурт пала сюрес кутӥз. Мон, ёросысь одӥг гуртэз но уг тодӥськы бере, сюлмаськытэк, номыр сярысь малпаськытэк мынӥ, вуэммы бере ужрад ортчоно интыез но утчай али... Куке валай, воксё мукет гуртэ вуиськеммы шуыса, ини бер вал: та нуналэ мон одӥгаз ужрадэ но ӧй вуы. 
— Но ёросэз, калыкез тодымтэед тыныд ужад астэ возьматыны люкетымтэ: туэысен тон Можга ёрос администрацилэн ивор сётӥсь ёзэтэныз кивалтыны кутскид. Маин висъяське таиз ужед?
— Кызьы верай ни вал, мон татын ар ӵоже гинэ ужасько ай. Нырысь ӧтьыкузы, дӥсьтытэкгес мынӥ. Пӧрмоз-а меда сокем кылкутымон ужез быдэсъяны шуыса сюлмаськи. Ёрос кивалтӥсен огкыл шедьтоно ук, соин ужано. Аслым ӧй оскы... Но туэысен мон ивор сётӥсь ёзэтэн кивалтӥсько ини, шонер. Бен, ми но, газетын ужась журналистъёс сямен ик, калыклы ивор вуттыны тыршиськом. Но со дыре ик милям ужмы шӧдскымон висъяське. «Азьлане» газетмылэн редакцияз ужакум, мон вӧл-вӧл гожъяськи, репортажъёс лэсьтылӥ, мылкыдъёсме-малпанъёсме шараяй. Нош Интернет сӧзнэтлэн куронъёсыз мукетэсь: шаплы, вакчи но валтӥсез сярысь гинэ гожъяно. Куддыръя компьютер азе но пуксьыса уд вуттӥськы, сюрес вылын ик смартфонэ текстэз печатать кариськод но вотэс пыр ужрад сярысь ивортӥськод. Трос саклык висъяно луэ калыклэн интернет пыр вуэм вазиськонъёсызлы (соос понна но милям ёзэтмы кыл кутэ). Кылем шутэтскон нуналъёсы, лымы трос усемен, гуртазы техника уг вуы шуыса ӝожтӥськизы. Ми соосты буйгатъямы, соку ик вотэсбамын валэктонъёс сётъямы. Пӧлазы тау карыса гожъясьёс но пумиськизы. Шутэтскон нуналъёсы но, праздникъёсы но интыысь кивалтэтлы калыкен кусып возёно луэ. Оглом вераса, ужмы секыт но тунсыко. Котькуд нунал маке выльзэ тодӥськом. Тани тулыспалэ Москвае дышетскыны мыномы.
— Нош удмурт кылын ӵем гожъяськиськод-а, Наташа? 
— Али тросгес ӟуч кылын гожъяськисько ни. Но текстъёсме куддыръя удмурт кылэ но берыктӥсько — лыдӟисьёсыз шедё. Зэмзэ верано ке, мыным потэ, татын тросэз удмуртъёс ӟучомемын ини шуыса. Тужгес городын улӥсьёсыз. Вераськыны но ӵемгес ӟуч кылын тыршо. Шер гинэ Можгаысь куспазы удмурт кылын вераськись кык удмурт адямиосты пумиталод, дыр. Валамон, мон уг быгатӥськы та сярысь оскытыса вераны — Можгаын одӥг ар гинэ улӥсько. Но мыным озьы кадь потэ. Татчы вуэме бере, нырысетӥ нуналаз урамын мон воксё ӟуч кылэз но ӧвӧл, удмуртсэ но ӧвӧл — бигерзэ кылӥ! Соку мон валай: бигер кыллэсь мыным Можгаын мӧзмыны уз сётэ.
— Наташа, вераськемед понна бадӟым тау! Тон понна туж шумпотӥсько. Сӥзисько выль вормонъёс, сюрес вылад ӟеч сямо, валась адямиос гинэ мед пумиськылозы, гожъяськыны мылкыдыд ноку медаз сӥя.