Лыдпусъёс но фактъёс

• Быдӟым Отечественной война дыре батырлыксы понна 7 миллионлэсь уно воинъёс басьтӥзы правительстволэсь наградаоссэ.

• 11603 воинъёслы (со пӧлын 86 нылкышноослы) Быдӟым Отечественной войнаын батырлыкъёссы понна сётэмын Советской Союзлэн Героез ним.

• Быдӟым Отечественной война аръёсы 300-лы матэ мурт А. М. Матросовлэсь, 74 воинъёс лётчиклэсь Н. Ф. Гастеллолэсь подвигзэс повторить каризы. 200-лы матэ советской лётчикъёс омырын таран лэсьтӥзы.

• Советской Союз, войнае пыриськем мукет странаосын ӵошатыку, самой бадӟым материальной изъян адӟиз. Немецко-фашистской захватчикъёс советской музъемын куашкатӥзы сюосын городъёсты, 70 сюрслэсь уно гуртъёсты. Озьы соос 25 миллион адямиосты юртъертэк кельтӥзы. Соос 32 сюрслы матэ промышленной предприятиосты, 65 сюрс километр чугун сюресъёсты быдтӥзы, 98 сюрс колхозъёсты, 1876 совхозъёсты но 2890 машинно-тракторной станциосты куашкатӥзы. Огъя басьтыку, СССР-лэн материальной ыштонэз 2,600 миллиард манет луиз.

• Быдӟым Отечественной войналэн вормонэн йылпумъяськоназ советской тыл экономической база луиз. Тушмонэз пазьгон понна 1941 арын 1 июльысен 1945 арын 1 июлёзь СССР-ын поттӥськиз 105028 боевой самолёт, 95099 танк но самоходной артиллерийской установка, 1881 сюрс орудие.

(«Азьлане», № 36, 7 май, 2005 ар)