Ма со визян но кызьы сое ортчытоно

Быдӟым визь вуэмен отын но татын визян сярысь верасько. Мон ачим Инмарлы оскись ке но, визяме ӧвӧл. Инмар кабыл мед кароз монэ, сьӧлыко муртэ, асме вормыны уг быгатӥськы. Ма бен со визян? Со понна Интернет вотэсбаме пырыса утчалляськи. Сое лыдӟыса валай: визян — со сиёнъёслэсь люкиськон гинэ вылымтэ, соку нокыӵе мугоркуандырон но луыны кулэ ӧвӧл. Зэмос визян — со Быдӟым Инмармес юн яратэммес возьматон. Пудо-животлэсь дасям сиёнлэсь куштӥськон — со визянлэн самой кулэез вылымтэ. Тужгес кулэез лулпушмес чылкытатон вылэм. «Куректон тӥледлы, книга тодӥсьёс, фарисейёс, чеберъяськисьёс! Тусьтылэсь, тэркылэсь педпалзэ сузяськоды, со дыре ик соослэн пушсы лушкаськонэн, шонертэм улонэн тырмемын. Синтэм фарисей! Педпалаз чылкытлыкез мед луоз шуыса, азьло ик тусьтылэсь, тэркылэсь пушсэ сузя» — шуэмын «Выль сӥзён» Мтф. 23.25. Сиы сӥль, но лэсьты ӟечесь ужъёс, матынгес луы Быдӟым визьлы. Со ӝыныя сютэм улыса, лулпуштэ чылкытатымтэлэсь трослы умойгес вылэм. Сӥён палтӥ визяны ке секыт, черке мыныса, батюшкалэсь юаллясько, но солэсь верамъёссэ, батюшка озьы валэктӥз шуыса, вераса но ветлоно ӧвӧл. Семья куспады керетытозь, муртъёсын аляк кылъёс вӧлдытозь, юыса, жугиськыса, даллашыса улытозь, ӵемгес вӧсь книгаосты лыдӟоно. Асьмелэн куд-ог песяйёсмы черкысь потыкузы ик я кензэс, я бускельзэс уродэн верало шуо. Озьыен, соослэн черке ветлыса но лулпушсы чылкытатскыны вормымтэ. Но соосты тышкаськыны уг яра, астэды тодыны, чакланы кулэ. Куддыр ас синмысьтымы корез но ум адӟиське, муртлэсь вайзэ но адӟиськом.

Та чуръёсты гожъякум, тодам лыктӥз одӥг песяй. Солэн вань вераськонъёсыз вӧсь но вань умоез сярысь вал. Дораз трос вӧсяськон журналъёсыз, книгаосыз вал. Котьку черке ветлылӥз. Чылкыт югыт ымныро, веськрес лач-лач песяй гужем котьку ветлоз вал сьӧд платье-костюмен, тӧдьы кышетэн. Сое тодӥсь куд-ог лыдӟисьёс соку ик шуозы: «Солэн бызьытэк шедьтэм пиез вань». Но со пизэ огназ но туж визьмо карыса будэтӥз, муртъёсты вӧсь ӧз карылы, ассэ но пересьмон даураз утьыны яраз. Ярато вал куать кузя внукъёсыз но. Инмарлы оскись пи аслэсьтыз пиналъёссэ но ачиз кадь ик визьнодаз. Шумпотымон со! Вераны кулэ, асьмелэн анаен-атаен (венчаськымтэзы ке, соос сыӵе ик калгись муртъёслэн радазы) будэтэм нылпиос но оген будэтэмъёслэсь куддыр трослы урод луыло. Соин ик Быдӟым визь дыръя ке но, нылпиосты визьноданы кулэ, соос каньыл мылкыдоесь мед будозы шуыса.

Улӥе сётӥсько удмурт кылэ берыктыса, Интернетысь Быдӟым визь дыръя шонер сиськонлэсь радлыксэ.

«Быдӟым визь дыръя оскисьёслы трос сиёнлэсь люкиськыны тупа. Визьлэн кутсконысеныз пумаз вуытозь воксё лэземын ӧвӧл сӥль, йӧл, курегпуз но соослэсь пӧрам сиёнъёс, озьы ик пудо вӧйёс (шуккем вӧй но). Та арын чорыг сиёнъёс лэземын Пучы ӟучарняе гинэ, нош Лазарь шумотэ — чорыг мызь. Ӟучарняосы но Лазарь шумотэ пичияк вина юыны лэзиське. Визез чакласа, тросгес юыны кулэ компот, сок, кисель. Вунэтоно ӧвӧл бакча сиёнъёс, емышъёс, пӧртэм пушмульыос, куасьтэм емышъёс, чечы сиыны. Пайдаё луо кӧжылэсь но мукет кеньыръёслэсь шыдъёс но ӝукъёс. Соос ваньмыз тазалыклы изъянтэк визез ортчытыны юрттозы.

Визь кутӥсьёслы уг яра пӧртэм шулдыръяськонъёсы, шудонъёсы пыриськылыны. Кин визь шоры йӧн-йӧн учке, уг учко телевизор, уг ветло театръёсы, киноосы, концертъёсы. Озьы ик уг яра люкаськыса аракыен пуконъёс.

Ӵемгес тодэмзы потэ нылкышно но пиосмурт кусыпъёс сярысь. Сое черк туж ик уг ушъя, но та векчи уже сокем пыриськемез но уг поты. Сыӵе мылкыдъёслэсь возиськон понна кыкнапаласен ик соглаш луон кулэ. Вераны кулэ, черкын венчаськытэк кузпалъяськыса — со калгисьёслэн ӵош улэменызы кадь ик лыдъяське. Тодады возёно, визь дыръя астэ сиёнлэсь, шулдыръяськонлэсь, кусыпъёслэсь люкыса, зэмос визясь мурт соин медаз ушъяськы, медаз бадӟымъяськы. Озьы визьлэн пайдаез «нуль» луэ, сьӧлыке усе. Черк куд-ог муртъёслы визь куронъёсты капчиятыны лэзе. Сыӵеос пӧлы пыро пиналъёс, секыто кышномуртъёс, мӧйыос, висисьёс, кыдёкын сюрес вылын ветлӥсьёс, армиын служба ортчисьёс но эриклэсь люкемъёс. Та сярысь юалляськыны луэ черк ужасьёслэсь. Пичиосты уг яра йӧллэсь люкыны, чакланы кулэ, ӧжытгес телевизор мед учкозы, компьютер но телефон пыр медаз шудэ шуыса.

Монастырь уставъя Быдӟым визьлэн нырысетӥ арняез ӟучарня бере нуналэ но покчиарняе воксё сиськоно ӧвӧл, кӧснуналэ — нянь но ву. Вирнуналэ но арнянуналэ кӧс сиськон: бакча сиёнъёс, емышъёс, пушмульыос, чечы. Шумотэ но ӟучарняе гинэ будос вӧйын пӧсь сиён лэзиське, нош ӟучарняосы — пичияк вино.

Кыкетӥысен куатетӥ арняосы ӟучарня бере нуналэ, вирнуналэ но арнянулэ — кӧс сиськон, кӧснуналэ но покчиарняе — вӧйтэк пӧсь сиён. Будос вӧй лэземын шумотэ но ӟучарняе. Лазарь шумотэ (куатетӥ арняе) 31 мартэ, яра будос вӧйын пӧсь сиён, озьы ик чорыг мызь но вино. 1 апреле чорыг но лэзиське. Быдӟым визьлэн сизьыметӥ Ӟырдыт (Страстной) арняяз визь чурытгес кариське. Ӟучарня бере нуналэ но вирнуналэ — кӧс сиён, кӧснуналэ но покчиарняе — вӧйтэк пӧсь сиён. Быдӟым арнянуналэ сиськытэк. Быдӟым шумотэ 7 апреле будос вӧйын пӧсь сиён яра. Уйин 8 апрельысен котьма сиыны яра».

Василий Никитин

Карек-Серма гурт