Малмыж ёросысь удмуртъёс доры Ижкарысь «Даур ТВ» интернет-каналын ужасьёс куное вуылӥзы

Китякъёслэсь кудзылэсь гинэ эн юа, кин гуртады тужгес юн выре удмурт лулчеберетэз утён бордын, кин калыкез «люка» но пӧртэм ужрадъёсты радъяны тырше шуыса — валэктон таӵе луоз: Алефтина Николаевна Трухина.

Малмыж ёросысь Выль Смаиль гурт поселенилэн кивалтӥсез Рашит Камилевич Ахатов но сюлмаське, Алефтина Николаевна дано шутэтсконэ ке кошкиз, кин меда со интыын ужалоз шуыса. Алефтина Николаевна Пор-Китяк гуртын интыяськем библиотекаын — Кузебай Герд нимо удмурт лулчеберетъя центрын — ужа. Отын ужам сяна, со гуртысь одӥгез тужгес мыло-кыдо улӥсь кышномурт но луэ. Гуртысьтызы «Шулдыр мылкыд» ансамбленызы кивалтэ, солы юрттэ Гуляндам Ахатовна Камаева, клубен кивалтӥсь. Коллективе пырисько Удмурт Китяк но Поречке Китяк гуртъёсысь улӥсьёс. Тросэз соос пӧлысь — арлыдо кышномуртъёс. Мызганчизы но асьсэлэн вань — Виталий Терентьевич Потапов. Пӧртэм лулчеберето ужрадъёсы пыриськисьёс ужазы нылпиосты но кыскыны тыршо. Репертуаразы пӧртэм кырӟанъёссы вань: удмуртъёсыз но, ӟучъёсыз но. Но матын каро, валамон ини, удмурт кырӟанъёсты. Та муген ик асьсэ кужыменызы но гурт поселенилэн, ёрос кивалтэтлэн юрттэменызы пӧртэм ужрадъёсты радъяны тыршо. 

Кылсярысь, кемалась ӧвӧл, шонергес вераса 12-тӥ коньывуонэ, соос Поречке Китяк гуртын удмурт лулчеберетлэсь нуналзэ ортчытӥзы. Радъязы сое ёросысь центральной библиотека но гуртъёсысь клубъёс. Валамон, гурт калык но та ужрадэз ортчытонэ аслэсьтыз бадӟым кужымзэ понӥз. Куноос луыса, татчы Малмыж ёрослэн главаез Эдуард Леонидович Симонов но матысь гуртъёсысь калык гинэ ӧвӧл, Вятской Поляна городысь «Чипчирган» калык ансамбль но лыктӥз, озьы ик Удмуртиысь представительёс но вуизы. Веранэ удмурт кылын потӥсь нырысетӥез «Даур ТВ» интернет-каналын тыршись адямиос сярысь. Кин уг тоды: «Даур ТВ» — Ижкарысь Калыкъёслэн эшъяськон юртсылэн базаязы ужась интернет-канал. Меӵак эфир амалэн та каналын ужасьёс «Вконтакте» социальной вотэсын удмурт кылын потӥсь пӧртэм видеоосты дасяло но возьматъяло, тунсыко ужрадъёсты транслировать каро, передачаосты ортчытъяло, учкисьёссэс тунсыко адямиосын тодмато. Поречке Китяк гуртысь калыкен тодматсконзы но туж пайдаё луиз. Татын соос туж ческыт удмурт сиён-юонъёсты веръязы, кырӟазы-эктӥзы но самой валтӥсез: гуртын улӥсь калыкен вераськыса, Малмыж ёросысь шошма удмуртъёслэн улэм-вылэменызы, соослэн сюлмаськон-куректонъёсынызы тодматскизы, адямиослэн юанъёссылы пыр-поч валэктонъёс сётӥзы. 

— Ужрадмы туж шулдыр, туж усто но туж пайдаё пӧрмиз шуыса малпасько, — мылкыдъёссэ ватытэк вера Алефтина Трухина. — Мынам малпамея, туала дыре, куке пиналъёс ӟучомыны кутско, та выллем праздникъёс ӵемгес ортчытыны кулэ. Малы ке шуоно нылпиослы вордскем кыллэн кулэлыкез сярысь кылын гинэ валэктоно ӧвӧл, ужын возьматоно. Соку, оло, соос асьсэос кыстӥськозы мае ке выльзэ тодыны, дышетскыны, удмурт лулчеберетэз дунъяны но данъяны быгатозы. Озьы малпамысьтым, удмурт лулчеберетлэсь нуналзэ пусйыкумы, «Даур ТВ»-ын ужась егитъёсты куное ӧти. Мынам потӥз, Удмуртиын улӥсь удмуртъёс ми сярысь но мед тодозы вал шуыса. Тау соослы, отказать ӧз каре, лыктӥзы. Богдан Анфиногенов (проектлэн авторез), Августина Михайлова асьсэлэн уженызы тодматӥзы, гуртысьтымы библиотекаямы кӧня ке книгаосты но кузьмазы. Нош ми соослы возьматӥмы удмурт калыклэсь пӧртэм сям-йылолъёссэс: нуны вордсконэз, армие келянэз но сюан ортчытонэз. Тӥни озьы, пумиськонмы туж шулдыр ортчиз, трос шуныт мылкыдъёсты кельтӥз.
Шулдыръяськон ужрадазы Удмурт Китякысь но Поречке Китякысь удмуртъёс, асьсэ сям-йылолъёсынызы но улэм-вылэменызы тодматэм сяна, Ижкарысь куноосты пор, ӟуч но бигер сямен кырӟаменызы но паймытӥзы. Озьы ик ужрадлэн кыкетӥ люкетаз Валентина Павловна Асанова такъя лэсьтонъя мастер-класс но ортчытӥз. Огъя вераса, Удмуртиысь куноос асьсэлы туж трос материал гожъяны быгатӥзы. 

Та выллем бадӟым ужрадъёсты туж ӵем ортчытэмзы уг луы ке но, Китяк удмуртъёс мӧзмыса уг уло. Ӵемысь асьсэос пӧртэм ужрадъёсы пырисько. Кема аръёс ӵоже Малмыжын ортчись но пӧртэм улосъёсысь куноосты люкась Казанской ярмаркае «Шулдыр мылкыд» ансамбль арлы быдэ мыло-кыдо пыриське. Отын но соос сюрсъёсын люкаськем калыклы шошма удмуртъёслэсь лулчеберетсэс возьматыны тыршо. Кировын кыӵе ке праздникъёс, ужрадъёс ортчыку но ансамбле пыриськисьёс палэнэ уг кылё. Вятской Полянаын но соос ӵемысь куно луо, Татарстанын радъяськись фестивальёсы, лулчеберет праздникъёсы вуылыны тыршо. 2017-тӥ арын гинэ но Поречке Китяклы 300 ар тырмонзэс бадӟым масштабен праздник карыса туж шулдыр радъяны быгатӥллям. Удмуртиысь кунооссы но луиллям, асьсэос но туж трос усто концерт номеръёсынызы калыкез шумпоттӥллям. 

— Озьы но тазьы тыршиськомы асьме гуртмы, асьме калыкмы понна, — шуо гуртысь арлыдо кышномуртъёс. — Бадӟым ужез — пӧртэм конкурсъёсы, праздникъёсы, фестивальёсы пыриськонэз, огъя вераса, ансамбльлэсь улонзэ утёнэз но азинтонэз — одӥг ӵошен нокызьы нуыны уг луы. Милемын, арлыдоосын артэ, егитъёс но сюлмысь тыршо. Пусъеммы потэ Ирина Решетниковаез но Ольга Михееваез. Соос котьку юрттыны дась, репетициосты но ортчыто, репертуар ласянь но юртто, милемын ӵош ансамблямы выступать но каро. Тазалыксы мед луоз. 

Зэм, та пичи гинэ гуртъёсын калык эшлыко но огазе улэ. Семьяен ужрадъёсы пыриськисьёс но вань. Пичиысен нылпиоссэс лулчеберет удысэ кыскисьёс но шедё. Та туж ушъямон. Соос уло, тыршо, быгато, азьланезлы оско. Та понна соосты Ижкарысь куноос но туж ушъязы.
Бен, ог дас-дас вить ар талэсь азьло дырен ӵошатоно ке, кыксы но гуртъёс пичиёмо, вужмо. Но со дыре ик соослэн егитъёссы но вань, выль юртъёс но лэсьтӥсько. Соин оскеме потэ, та гуртъёсын улон пӧзёз, егитъёс йылозы шуыса. Нош удмурт кыл но удмурт лулчеберет — уз вуны, азинскоз, сяськаяськоз.

Малмыж ёросысь Выль Смаиль гурт поселениын туннэ нуналэ кык удмурт гуртъёс лыдъясько — Удмурт Китяк но Поречке Китяк (калыкын сое Пор-Китяк шуо). Кыказ ик гуртын, нялтас вераса, Балтась ёросысь вуэм одӥг-кык ке но кенъёс шедёзы. Вань пӧлазы бигер, пор кенъёссы но. Та гуртъёсты туж ик бадӟым шуыны уз луы ке но, улон татын гурла али: трос пудо вордӥсьёссы но вань, выль юрт пуктӥсьёссы но шедё. Кык гуртлы одӥг школа-нылпи садзы (Удмурт Китякын), клубзы но библиотеказы (Поречке Китякын) вань, магазинъёссы но ужало. Адямиос но татын лякытэсь, ужасесь, трос вераськисьтэмесь. Вордскем кылзэс, лулчеберетсэс гажаса но яратыса улыны тыршо. Нылпиоссэс, внукъёссэс удмурт кылын вераськыны дышетыны сюлмасько.