«Мон понна но Инмар вань!»

Шуркынмонлэн берпуметӥ ӟучарняяз Россиын дано праздник пусйиське — Анайлэн нуналэз. Быдэс дуннеын анайёслэн данзы но кулэлыксы шараяське. Котькуд адямилы кулэ анай! Со — семьялэн шорсюлэмез. Анайлэн сюлэмез ноку уг кысы, аслаз яркыт тылэныз со нылпиоссэ огазея но мусоя.

Анай... Кыӵе вакчи но небыт кыл. Ньыль буквалэсь кылдэм валан котькуд адямилэсь сюлэмзэ бугыртэ, дыр. Анаен герӟаськемын самой шунытэсь но яркытэсь тодэ ваёнъёс. Солэн небыт вешамез, мусо ваземез вань яраосты бурмытэ. Куддыр тон валатэк солы чурыт кылъёс вераськод, куддыр куспады валамтэос кылдо, соосты ортчыны туж секыт... Нош анай сюлэм ваньзэ вунэтэ, нылпиез понна сюлмаське. 

Туннэ статьялэн валтӥсь героиняез — Наталья Терентьева — одӥгез самой шудоез но устоез анай шуи ке, уг янгыша, дыр. Инмар солы вить нылпи кузьмаз. Ваньзы соос аспӧртэмлыко, ваньзы маин ке висъясько, но котькудӥз анай понна дуно, котькудӥз сюлэмаз нимысьтыз инты басьтэ. Солэн пичи шундыосыз солы кужым сёто ӵуказе нуналлы. Со азьын бадӟым ужпум сылэ — нылпиосты бадӟым улонэ дасян но келян.
Семьяын трос нылпи ке, соослы ваньзылы кулэ луись саклык уг висъяськы, шуо калыкын. Мон понна та шонертэм малпан. Макем семьяын трос нылпи, сокем анайлэн сюлэмез но бадӟымгес, паськытгес усьтӥське. Яратон но тросгес луэ.

— Асэныды но нылпиосыныды тодматэ вал.

— Мон — Наталья Терентьева, туннэ нуналлы мыным 38 арес. Вордски но быдэ вуи Ӟаны гуртын, отын ик школаез но йылпумъяй. Шоръёзо школаез йылпумъям бере кӧня ке ужаса, бызи но яратоно адямиеным ас семьямес кылдытӥм. Быдӟымез нылы — Карина, солы 18 арес тырмемын ини. О.Н.Исаев нимо Ӟаны шоръёзо школаысь 9 классэз йылпумъяса, дышетсконзэ Кукморысь аграрной колледжын азинтэ, али со ньылетӥ курсын, кылдэм ке, агрономлэсь ӧнерзэ басьтоз. Быдӟым пиелы — Никиталы — 16 арес, со но апаезлэсь колледжзэ ик бырйиз. Ӧнерезъя техник-механик луоз. Та пи мурт понна туж кулэ луись удыс, ноку ужтэк уз кыльы. Куинетӥез пие — Мирослав. Солы 10 арес. 4 классын дышетске ини. Нош покчиосыз кыктоос — Дарина но Зарина нимо нылъёсы — соослы 5 арес тырмиз. Соос нылпи садэ ветло. Семьямы бадӟым, мӧзмыны дырмы ӧвӧл, котькуд шуг-секытъёсты валче ортчиськом.

 
— Котькуд адями азьло ик семьяын вордске. Асьтэлэн анайды сярысь пичи дырысь самой шуныт но тодэ кылись учыръёсты вань-а?

— Анае мынам Ольга нимо вал. Туж ужась но каньыл мылкыдо нылкышно вал. Милемыз пӧртэм ужъёслы но визь-нодлы дышетӥз. Адямиослы котьку шунытэн вазьылӥз, милемлы но озьы ик дышетӥз. Ноку но нокинлы эн вожъяське, шуэ вал. 
Нылкышно ачиз анай луиз ке гинэ ваньзэ валаны кутске. Макем ӟеч сямо анай визьнода, сокем тон но нылпиосыныд ӟеч кусыпъёс возиськод. Анаен валче ортчытэм котькуд вакытэз дунъяса, гажаса но тодэ кельтыса гинэ улоно. 
Анай — со одӥг гинэ адями, кудӥз тонэ сюлэм пушказ возе. Кыӵе гинэ адями тон ӧд луы — со котьку тыныд юрттыны дась, берпуметӥ нянь люкетсэ но сётыны дась. 

— Нырысьсэ анай луон со мукетъёсызлэсь пӧртэмгес-а? Анай луыны кытын дышетсконо?

— Нырысетӥзэ анай луон котькуд нылкышнолы секыт йӧтэ, дыр. Анай луонлы нокытын но уз дышетэ, сое ачид шӧдыны но валаны кулэ. «Материнский инстинкт» шуо ӟучъёс, со пичи дыръя мунёен шудыку ик кылдэ кадь ини. Одӥг паласен, та туж умой нылъёс понна. Пичиысен ик аспӧртэмлыко кылкутон басьтӥськод вылад, нылкышнолэсь призванизэ проецировать кариськод. Кыкетӥзэ ваем бере капчигес луэ ини. Соку ини бадӟымез нылпи но юрттыны быгатэ. Мынам бадӟым юрттэт сётӥсе но пыкетэ — Карина нылы луиз. Солы ваньзэсыз утьыны тупаз ини. Озьы, пичи дырысеныз ик солэн нылпиосты утён сямез кылдӥз. 

— Вить нылпиосты пӧртэмесь-а яке ваньзы одӥг сямо-а?

— Витез ик нылпие — вить пӧртэм адямиос. Котькудӥзлэн аслаз сямез. Тани кыктоосты басьтӥм гинэ ке но. Туссыя огкадесь, нош сямъёссы воксё пӧртэмесь. Карина нылы мынам туж чурыт куронъёс пуктӥсь но серьёзной сямо. Со понна ваньмыз лад-лад пуктэмын луоно, ваньмыз радызъя мыныны кулэ. Нырысетӥ нылпи вылэ тросгес куронъёс пуктӥсько шуо, озьы ик вань, бадӟымезлэсь тросгес витиськод, котькуд ужын солэсь ӟечсэ гинэ возьмаськод. Никита каньыл но шып гинэ. Нош Мирослав туж чырткем но кышкасьтэм. Пиос пӧртэм вожвылъяськонъёсы пырисько, спортэн тунсыкъясько. Даринае артистка, нош Заринае визьмо но лачмыт. Кызьы калык пӧлын верало, киям вить чиньы, витез но пӧртэм, озьы ик вань. Котькуд нылпие мыным дуно но мусо. Котькудаз аслэсьтым но кузпаллэсь сямъёссэ, тусъёссэ адӟисько. Валтӥсез — таза но шудо мед будозы. Анай понна та самой бадӟым шумпотон.

Котькуд семьяын анай но атай кулэ. Анай — со сюлэм, со шуныт мылкыдъёс, со лачмыт улон, со мусояськон. Нош Атай — со кужым, со пыкет, со семья утён. Яратоно Евгений кузпалэз шудтэм учыре шедьыса, югыт дуннеен люкиськемез бере, Наталья Петровна вить нылпиен кылиз. Но со ӧз кысы, киоссэ ӧз лэзьы, нылпиосыз понна кужым шедьтӥз азьлань вамыштыны. Инмар адямилы ортчонтэм шуг-секытъёс уг сёты, шуо. Тодыны уг луы, кыӵе эскеронъёс пыр потоно луод ӵуказе, валтӥсез — со эскеронъёс пыр кужым шедьтыса потон. Наталья Петровна та понна адӟем карымон пример луэ. Со уг ӝожтӥськы, йырзэ вылэ ӝутыса, Инмарлы оскыса, улонзэ азинтэ. Табере со кузпалэзлэсь ужзэ но вылаз басьтэ.

— Вить нылпиез оген будэтыны секытэн сетӥське-а?

— Мазэ веранэз, вить нылпиез огнам вордыны капчи шуыны уг быгатӥськы. Куддыр кесяськыса бӧрдэм дыръёс но луо. Но валасько: асме кутоно, нылпиосы азьын зӥбыт сямо луоно, соос ведь мон шоры учко. Сыӵе дыръёсы нылпиосы мыным кужым сёто. Тау шуэме потэ ӵыжы-выжыосылы но эшъёсылы, соос котьку вӧзам, котькуд куронлы вазисько. Котырам умой адямиос, соин мон огнам ӧвӧл. Мынам юрттӥсьёсы трос, та понна Инмарлы тау шуисько. 

Туэ Наталья Петровналы шуд усиз Татарстан Республикалэсь кун данъетсэ «Ана даны — Материнская слава» медальзэ басьтыны. Трос нылпиё анаез Татарстан Республикалэн нуналаз дано ним басьтэменыз ёрослэн главаез — Рамиль Нутфуллин — ӟечкылаз! Зэмзэ но туж интыяз сётэм данъет та. Сыӵе нылкышноос луыса ик мерлыкмылэн азьланез вань шуыса оскон кылдэ. Ведь бадӟым семья туэ туж шер гинэ пумиськись тодмет.

— Та арын мыным «Материнская слава» медаль кузьмазы. Та награда мынам гинэ ӧвӧл, со мынам кулэм картлэн но, нылпиослэн но огъч вормонмы. Ведь Женятэк мон ӧй луысал сыӵе визьмо но чебер нылпиослэн анайзы. Нош нылпиослы монэ быръемзы понна тау! 

— Асьтэды шудо анай шуыны быгатӥськоды-а? Нылпиосыныды данъясь киськоды-а?

— Малпаськытэк ик вераны быгатӥсько: мон — вить пол шудо анай! Огпол но уг жаляськы нылпи ваемелы! Пыд йылазы султытыны но адями радэ пуктыны гинэ мед кылдоз! Котькуд анайлэн аслаз нылпиеныз данъяськемез потэ, мон но озьы ик! Мон оскисько — мынам нылпиосы монэ гажалозы но яратозы! 

Зэмзэ но, туала улонын нылпиосты дышетыны, бадӟым улонэ адями карыса лэзьыны туж шуг. Но Наталья Петровналэн кужмо, со дыре ик либатӥсь сямез луыса, оскон юнма: солэн нылпиосыз солэсь ӟеч сямъёссэ басьтыса, дано адямиос луозы, анайзэс гажаса, солы шундыё вакытъёс кузьмалозы на! Озьы ик медло!

Анай — котькудмылэн валтӥсь адямиез. Анаед ке вань, тон узырлэсь но узыр, шудолэсь но шудо, со тынад валтӥсь утисед, тынад кылчинэд. Вань анайёсты ӟечкыласьком Анайлэн нуналэныз. Котьку нылпиосыныды данъяськыны мед быгатоды, шудо улон сюрессэс адӟыны мед кылдоз! Сяськаяське но котьку пальышась ымныро луэ, гажано анай-нылкышноос!

Туспуктэмъёс: Н. Терентьева