«Мон удмурт патриот»

— 1941-тӥ арын 22-тӥ июне жугиськон кутскиз. Мыным соку куинь толэзь но куинь арня луэм, — кутскиз веранзэ Пётр Васильевич.

Пётр Васильевич вордӥське пичи удмурт гуртын, Тагашурын, Мария но Василий Байтугановъёслэн семьяязы 1 южтолэзе 1941-тӥ арын.

— Улонэ быдэс томъем роман гожтымон. Нырысетӥ классэ пырыкум букварез кык пол лыдӟыса поттӥськем вал ни мон. Озьыен, лыдӟыны быгатыса мынӥ ни школае. 4-тӥ классэз йылпумъяса 5-тӥ классэ потэм бере гужем каникулъёсы куинь ӵошен 60-70 вал возьмамы… трудодень понна. 10 классэз быдтытозь котькуд гужем колхозын тыршимы, — шуэ ортчем аръёссэ тодаз вайыса Пётр Васильевич.

Бен, ваньзылэн ож дырысь но со бере аръёсы вордскем но будэм пиналъёслэн улонзы огпӧртэм луэм: соос пичиысен ужаса будӥллям. Улон соослы чурыт курон пуктэм, ӵемысь со адямилэн малпанъёсыныз-мылкыдъёсыныз тупамтэ но.

— Мынам туж хирург луэме потэ вал. Но уксё ӧвӧлэн дышетскыны пырыны ӧй быгаты. Соин, школаез йылпумъяса, мынӥ военной училищее. Отын ваньмыз бушын вал уго. Но отын но ӧз удалты. Ӟуч сямен вераса, «человеческой фактор» люкетӥз. Ини Саратов улосвылысь Энгельс городэ вуэм бере тодмо луиз, асьме ёросысь медкомиссия кыӵе ке но куронэз быдэстымтэ шуыса. Соин сэрен монэ ӧз басьтэ училищее. Озьы тӥни, 1960-тӥ арын колхозэ ужаны интыяськи, — вера гажано воргорон.

Колхозын Пётр Васильевич кема уг ужа. Трос ик дыр уг ортчы, сое школае ужаны ӧтё.

— Нырысь декретэ кошкем дышетӥсьёсты вошъяса ветлӥ. Озьы ужай Тагашур, Сырья, Вукогурт, Ӟаны школаосын. Собере Казаньысь педагогикая институтын заочно тодон-валан басьтӥ. Со дыре ик ялан ужан инты но шедиз — Вуж Кушкетысь сизьым аръем школаын физкультурая, трудъя но биологияя дышетӥ. 1962-тӥ арын, Вуж Кушкет но Ӟаны школаосты огазеямзы бере, монэ Ӟаны школае выжто. Отын 1966-тӥ арозь химия но биология предметъёсты дышетӥ, — ужан сюрессэ тодаз вае Пётр Васильевич.

Егит, оскон сётӥсь дышетӥсь мыло-кыдо общественной ужъёсы но пыриськем. Быръён комиссилэн председателез но луэм.

— 1966-тӥ арысен, юаса но ӧз улэ, райкоме басьтӥзы, инструктор карыса. Партия лэзиз тямыс аръем (соку али сыӵе вал) Покчи Лӧзя школае, — азинтэ веранзэ Пётр Васильевич. Тӥни со дырысен, 1971-тӥ арысен 2001-тӥ арозь лулысь-сюлмысь тыршем со Покчи Лӧзя школаын. Куинь ар завуч луэм, собере дас тямыс ар директор луыса ужам. Со сяна, биологияя но химияя дышетэм. Тупам на анай кылъя но географияя урокъёсты но нуыны. Солэн лулысь-сюлмысь тыршыса ужамез «Отличник народного образования» гадьпусэн но «Ветеран труда» дано нимен пусъемын.

— Мон уно лэсьтӥ Ӟаны школаын но. Ньыль ар гинэ ужай ке но, школалы планировка но лэсьтӥ. Гришкин Иван Дмитриевич вал соку школалэн директорез. Утвердить кариз ведь со планэз», — данъяськон мылкыдзэ ватытэк вера Пётр Васильевич.

Пётр Васильевич Байтугановез районысь удмуртъёс пӧлын тодымтэос ӧжыт, дыр, шуыса малпасько. Кин ке понна со дано дышетӥсь, кин ке понна кивалтӥсь (кема аръёс ӵоже Покчи Лӧзя школалэн директорез вал — О.П.). Удмуртлыкен герӟаськем юанъёслы-ужпумъёслы мылкыдтэм луымтэ адямиос тодо, гажало но вылӥ дунъяло солэсь ёросамы удмурт культурая обществолы инъет пононэ пыртэм люкетсэ. Пётр Васильевич Балтась удмуртъёсты огазеян понна вань сюлэмзэ сётыса тыршем азьветлӥсьёслэн одӥгез, кема аръёс ӵоже «Кенеш» НКА-лэн Правлениезлэн членэз но луиз. Общественной ужъёслэсь Пётр Васильевич али ке но уг палэнтӥськы. «Азьлане» газетэн но со котьку матысь кусып возе. «1959-тӥ арысен «Азьлане» газетэз басьтӥсько, одӥг номерзэ но кельтытэк лыдӟисько», — шуэ Пётр Васильевич. Али но со ми доры шер ке но куное пыра, улон-вылонэнымы тунсыкъяське, шуныт таукарон кылъёс вера.

Аръёс ортчемъя, монэным тросэз соглаш луозы, дыр, адями выльысь но выльысь пичи но егит дырысьтыз тодэ ваёнъёсаз берытске. Пётр Васильевичлэн но пинал дырыз секыт война бере аръёслы тупаз ке но, та тужгес шудо дыръёсыз. Песянай-песятаез сярысь тодэ ваёнъёсыз тужгес сюлмаз пыӵаса кылиллям. «Бабае тӥр ужъёсъя усточи вал. Толалтэ сапег погылляз, нош гужемзэ тӥр ужен выриз. Туж ужась вал со. Мон со сьӧры кут кутаны дышетски, нош тани сапег лэсьтыны дышетскыны ӧй вуы... Одӥг арын толалтэ каникул дыръя 10 пар кут кутаны быгатӥ. Анае Ципья базаре нуыса соосты вузаз. Со уксёен мыным выль дэрем басьтӥз. Та мынам нырысетӥ ужаса басьтэм арберие луиз», — шуэ пичи дырзэ тодаз вайыса Пётр Васильевич. «6-тӥ классын дышетскыкум бабайлы парлич шуккиз. Бабай выдӥз. Соку песяе но секыт висе вал ини. Одӥг ар ортчыса со кулӥз. Бабае берпум сюресаз келяны но султыны ӧз быгаты… Туж бӧрдӥз…», — котьку мылкыдыз бугырскыса вера арлыдо воргорон.

«Бусы вольыт, адямилэн улонэз гинэ вольыт ӧвӧл, — шуэ Пётр Васильевич, ортчем улон сюрессэ син азяз пуктыса. — Улонам тунсыкоез трос вал. Вал югыт, сайкыт нуналъёс но, мӧзмонэ уськытӥсь ӝожъёсыз но… Нылпи ыштон кайгуэз но чидано луиз… Озьы ке но туннэ нуналэ Лиза кузпалэным внукъёсмы, правнукъёсмы понна улӥськом, соослэн шудзылы шумпотӥськом».

Гажано Пётр Васильевич, азьланяз но матысь адямиостылэн шудзылы, внукъёстылэн но правнукъёстылэн азинсконъёссылы шумпотыса улыны мед кылдоз Тӥледлы. Со ачиз бадӟым шуд ук. Ваньзэ умойзэ Тӥледлы. Патриот мылкыдды улон гумырды ӵоже бордады мед луоз.