«Мудорвайлэн» выль тулкымъёсыз

Удмурт лулчеберетлэн «Мудорвай» конкурсэз арысен аре тросгес но тросгес нылпиосты люка. Пӧртэм йӧскалыкъёс, выль малпанъёс, чеберман тӥрлыкъёс, дӥськутъёс — ваньмыз паймытэ, синмаськытэ. Та ваньмыз удмурт калыклэсь тужгес чебер палъёссэ возьматэ.

Удмурт нылпиос понна одӥгез кема возьмам конкурсэз «Мудорвай» шуид ке, янгыш уз лу, дыр. Татчы пыриськон понна кивалтӥсьёс но кема дыр ӵоже дасясько. Нылпиоссылэсь пӧртэм удысын быгатонлыкъёссэс шараяны тыршо. Та ваньмыз юнме ӧвӧл. Туала улонлэн куронъёсыз нылпиослэсь дӥсьтӥсь но шаплы луэмзэс кулэ каро. 

Пичи дырысен ик нылпилы анай-атай лулчеберетсэс, кылзэс но сям-йылолъёссэс пыӵатон, солы синмаськытон — со дунъянтэм ужпумъёс. Нылпи тросгес мерлыко сетьёсын пуке, отын ваньмыз ӟуч кылын. Тросэз нылпи садысен ик ӟучен вераськыны кутске, школае лыктӥз ке, татын огъя пӧртэм йӧскалыко луыса, озьы ик ӟуч кылын вераськон мынэ. Озьыен, вордскем кыл кыкетӥ планэ кыле.

Зэмзэ но, йӧскалыкъёс понна та туж бадӟым юан луыса пуксе. Кызьы нылпилы вордскем кылэзлы яратон но гажан пыӵатоно? Кызьы анай кыллэсь чеберзэ но шунытсэ нылпилэн сюлмаз вуттоно? Шонер валэктон шедьтыны шуг луоз. Но таӵе бадӟым масштабен конкурсъёс ик ичи калыклэсь узырзэ шараяло, паськытато но тунсыкъяськыто. 

Шумпотымон, котькуд аре конкурс ас бурд улаз удмурт нылпиосты гинэ ӧвӧл, мукет калыкъёсты но огазея. Озьыен, удмурт кылмылэн но лулчеберетмылэн дунлыкез но тодмо луэмез будэ.

Таӵе форматэн пумиськон нырысетӥзэ радъяськиз. Пумитан вылысь люкаськемъёс азьын аслэсьтыз кылзэ вераз Татарстанын улӥсь удмуртъёслэн йӧскалык культурая автономизылэн исполнительной директорез Ольга Чайникова. Со огъя выльдӥськонъёс сярысь вераз, проектлэн будэмез сярысь ивортӥз но кивалтӥсьёслы тау кариз.

— Малы таӵе семинар радъян йырам лыктӥз, со нырысь ик дышетӥсьёслэн куронзы. Но асьсэос соос шонерак уг верало, куинетӥ адямиос пыр лыктӥз сыӵе ивор, дышетӥсьёслы, пе, уг тырмы кыӵе ке ивортодэт, кыӵе ке тодон-валанъёс, кыӵе ке быгатонлыкъёс нылпиосты таӵе выллем конкурсъёсы пыриськонлы дасяны. Со понна кылдӥз малпан семинарез куинь ӧръёсъя радъяны: вокал, эктонъя устолык, чеберлыко кыл, малы ке шуоно конкурсын та ӧръёсын ик быгатонлыкъёс шараясько. Озьыен, та удысысь усто педагогъёс ик ӧтемын вал. Балтасьын та ужрад кемалась конкурс луэмысь дугдӥз ини, со сыӵе аспӧртэмлыко площадка луиз ни, кытын пиналъёс удмурт эктонъёсты дышето, удмурт кырӟанъёсты кырӟало, анай кылын кылбур лыдӟо. Мукет калыкъёс но та конкурсэ пыриськыса, удмурт лулчеберетэн матынгес тодматско. Балтасе ветлыса, мон валай, дышетӥсьёс, кивалтӥсьёс, анай-атайёс понна со лекци кылзӥськон, мастер-классъёс учкон дыр гинэ ӧвӧл, со луиз сыӵе площадка, кытын соос ог-огенызы пумиськизы, вераськизы, дырзэс ортчытӥзы, удмурт кылэз утён пумысен юанъёсты но ӝутӥзы, отын ик тае эскеризы, конкурсъя но кыӵе ке дэмланъёс веразы. Озьы ик туж тунсыко вал кылбуръёсты но миниатюраосты диалектъёсын герӟаны. Туннэ (вераськонмы 10 куарусёнэ вал — Ю. Щ.) Кукморын но та юанэз ӝутӥ, дышетӥсьёслы малпан туж кельшиз. Соин возьмаськом кыӵе малпанъёс кылдозы, кызьы соос нылпиоссэс дасялозы. Аслым но тунсыко, кыӵе выль номеръёс возьматӥськозы шуыса. Кин ке шедьтоз меда материал та малпанэз улонэ выжтыны? Мар со луоз: кылбур-а, яке миниатюра, яке кин ке но фольклорысь кыӵе ке люкетсэ возьматэмез потоз диалектысь кылъёсты пыртыса. Эшшо туннэ дэмламын вал кылдытыны нимысьтыз номинаци, кытчы пыриськыны быгатозы анай-атайёс но, песяй-бабайёс но. Сыӵе луиз семинар, кытын выль малпанъёс кылдӥзы но соосын люкиськизы. Таӵе тани йылпумъянъёс луизы огъя семинар кылдытон сярысь, — валэктонъёс сётӥз Ольга Чайникова.

Зэмзэ но, кылкутымон ужын котькуд кивалтӥсь маке выльзэ пыртыны тырше, соин азьпал дасяськон — со туж кулэ дыр, кытын тодон-валанъёстэ будэтыны но луэ, мукетъёслэсь но мае ке выльзэ асэстыны быгатод. 

Собере ини кутскиз семинарлэн самой «ческытэз» — мастер-классъёс. Театрысь но киноысь актриса, М. С. Щепкин нимо Высшей театральной училищелэн выпускницаез, «ЯАртист» театральной студилэн кивалтӥсез Надежда Никитина семинаре пыриськисьёслы школаазь но покчи классъёсысь пиналъёслэсь актёрской но вольыт вераськон устолыкъёссэс будэтонъя-волятонъя инъетъёс сётӥз. Дышетӥсьёс но визьнодасьёс ас вылазы артистлэсь вань шугъяськонъёссэс шӧдӥзы. 

Надежда Анатольевналэн кенешъёсыз дышетӥсьёслы азьланяз нылпиосын ужаны юрттозы шуыса оскон кылдэ. Огъя мастер-класс сяна, дышетӥсьёс асьсэос но юанъёс сётъязы. Соослы но огъя валэктонъёс шедьтыны быгатӥзы.

— Нылпилэсь пуш малпанъёссэ, мылкыдъёссэ бадӟымъёс ас вылазы валаны кулэ. Азьланяз соослы но капчигес луоз нылпиосын ужаны, нылпиос но валалозы улонлэсь но сцена вылысь рольлэсь пӧртэмлыкъёссэс. Мон понна та сыӵе ик нырысетӥ эксперимент шуыны луэ, соин мыным но та «выход из зоны комфорта», ӟучъёс сямен вераса. Малпасько, верамъёсы тросэз понна пайдаё луозы, — люкиськиз малпанъёсыныз Надежда Никитина.

Дыр туж ӝог ортчиз. Актёр устолыкъёсын кӧня ке матынгес тодматскемзы бере, пыриськисьёс понна эктон дыр вуиз. Казаньысь «Эрико» удмурт егитъёслэн ансамблезлэн нырысетӥ кивалтӥсез — Елизавета Короткина — удмурт фольклорысь движениослы дышетӥз. Со валэктӥз вашкала удмурт нылкышно но пиосмурт эктонъёслэсь пӧртэмлыкъёссэс. Нылпиосты пичиысен ик вашкала пуштросэн тырмем эктон движениослы дышетӥд ке, солэн пайдаез но тросгес луоз, азьпалан соос асьсэлэн нылпиоссылы но шонер валэктыны быгатозы.

Куинетӥ блокез копак кырӟан устолыкъёсты будэтонлы сӥземын луиз. ТР-ысь лулчеберет удысысь сӥё-дано ужась Светлана Измайлова туж трос визь-кенеш сётӥз. Пӧртэм упражнениос вылын Светлана Владимировна дышетӥз куара возьыны, шонер куара пуктыны. Таиз но мастер-класс тунсыко луиз, малы ке шуоно конкурсын трос гинэ кырӟанъёс быдэстӥсько. 
Пыриськисьёс трос луэмен, конкурслэн радъясьёсыз одӥг бадӟым воштӥськон пыртӥллям: табере нылпиослы гала-концертын гинэ кузьымъёс сётӥськозы. Со пыриськисьёслэн лыдэнызы герӟаськемын. Туннэ нуналлы ог 600 пала заявка келямын, соин кузьымъёс зэмзэ но шӧдскымон медло шуыса, таӵе амал кутэмын луоз.

Семинар пумысен лыктэмъёслэсь но юалляськоно кариськи. Ӵапак дышетӥсьёс но лыктэм куноос кылдыто удмурт лулчеберетлэсь праздниксэ.
Озьыен, удмурт лулчеберетлэн «Мудорвай» конкурсэз эшшо но тросгес кужым люкаса, выль сезонзэ усьтэ. Оскиськом, туэ но татын выль кизилиос шараяськозы шуыса, ведь пиналъёс азьланьто улонэз но, лулчеберетэз но, калыкез но.

— Та выллем семинар асьме дорын нырысетӥзэ ортчиз, туж кулэ ужрад. Трос выльзэ тодыса бертӥм. Нылпиосты кызьы шонер кылбуръёсыз вераны, удмурт эктонъёслэсь пуштроссэ валэктыны, кырӟанъёслэсь мылкыдзэ пыӵатыны дышетӥзы. Азьпалан ми ваньзэ уже кутыны тыршом. Маиз тунсыко, огшоры веранъёсын гинэ ӧвӧл, дышетӥсьёс но нылпи садысь воспитательёс асьсэ вылын ваньзэ валазы. Тросэзлэн кулэ дышетсконэз ӧвӧл ук. Соин секытэн йӧтэ эктонъёслы но кырӟанъёслы шонер гуръёсты шедьтыны. Тае семинарез радъясьёслы но вуттӥмы. Соос милемыз кылӥзы но юрттэт сётомы шуыса оскытӥзы. Бадӟым тау кылъёсмес вераськомы вань кадь радъясьёслы, озьы ик Ӟаны шоръёзо школалэн коллективезлы, туж шуныт пумитазы милемыз. Азьпалан но таӵе ужрадъёс тросгес мед луысалзы, — ивортӥз Ципья лулчеберетъя юртысь Евгения Михайлова.

— Нош ик одӥг азьлане вамыш луиз «Мудорвай» конкурсэ дасяськыны. 9 куарусёнэ школаямы бадӟым семинар ортчиз. Со ог 30 мында адямиосты люказ. Ми доры Казаньысь но Ижысь кырӟанъя но эктонъя усточиос, сцена вылын чебер возёнъя мастер-класс ортчытӥзы. Ваньмыз вылез пичи нылпиосты конкурсэ дасяськонэн герӟамын вал. Тау карон кылме вераме потэ милемлы валамон кылын но пуштросъемо вуттэмзы понна. Туж тунсыкоез но вылез удмурт эктон паласен сётэмын вал: киосты но пыдъёсты кызьы возьыны дышетӥзы. «Мудорвай» конкурслы дышетон куронъёс пумозяз лыдэ басьтэмын шуыса веран мылкыд кыле. Таӵе семинар радъямзы понна бадӟым тау кылъёсме вераме потэ кивалтӥсьёслы. Оскисько, таӵе семинаръёс азьланяз но трос луозы шуыса, — мылкыдъёссэ вераз покчи классъёсын ужась дышетӥсь Лидия Асакова.