«Мылкыдъёс али но ӧз сӥялэ...»

Отчы пыриськизы Татарстанысь Балтась но Кукмор ёросъёсысь, Удмурт Республикаысь но Башкортостан республикаысь куноос. Та пумиськон «Марӟанэз утча зарезьысь, визез — калыкысь» нимын ортчиз но анай кыллэн калыккуспо нуналэзлы сӥземын луиз.

Пумиськонэ асьме районысь Ӟаны, Ципья но Покчи Лӧзя школаосмы мылысь-кыдысь пыриськизы. Ужрадэ пыриськем котькуд командалы (школьникъёслы, директоренызы но вордскем кылъя но литературая дышетӥсенызы ӵош) дасяно вал презентация но кӧня ке концерт номеръёс. Со сяна, нылпиос понна Средний Куморысь дышетӥсьёс дасяллям пӧртэм мастер-классъёс. Нош дышетӥсьёс но директоръёс понна нимысьтыз котырес ӝокъёс но ортчизы.

— Туж кельшиз милемлы пумиськон, кылын вераса быдтымон но ӧвӧл. Кыӵе бен умой милемыз Кукморын пумитазы! Дышетӥсьёссы асьсэлэсь туж умой ужан устолыксэс гинэ ӧвӧл, куно карыны быгатэмзэс но возьматӥзы. Тужгес но асьмелэсь мызганчи пиосмес кельшытӥзы — соосты асьсэлы кельтӥськомы шуо вал ни (серекъя). Соос палан сыӵе мызганэн шудӥсь егитъёс ӧвӧл, лэся. Бертыку но автобусын кырӟаса-кырӟаса бертӥмы, сокем мылкыдъёсмы ӝутскемын вал пумиськон бере, — шуиз Ираида Анатольевна Чернова, Ципья школаысь удмурт кылъя но литературая дышетӥсь, аслэсьтыз мылкыдъёссэ ватытэк.

Зэмзэ но, та пумиськон нылпиос понна но, дышетӥсьёс понна но туж пайдаё луэм. Калык азьын вераськон устолыкъя, вашкала эктон движениосты дышетсконъя мастер-классъёсты котькудӥз нылпи кема йыраз но, сюлмаз но возёз, дыр.

— Та пумиськонэ мон шумпотыса мынӥ, малы ке шуоно, со школаын ужа Удмурт кун университетын ӵош дышетскем эше. Туж пумиськеме, адӟеме-вераськеме потэ ни вал. Школае пырыкумы ик милемыз шуныт пумитазы, пӧсь чаен, пыжиськемъёсын куноязы.

Туж шумпоттӥзы нылпиос. Ог-огзылэсь чебересь, мусоесь нылъёс но пиос сцена вылэ потыса кырӟазы но эктӥзы, мызганэн шудӥзы, пӧртэм мастер-классъёсы пыриськизы. Трос эшъёс шедьтӥзы асьсэлы. Милям но школаысь та пумиськонэ 1 ныл, 2 пиос мынӥзы, Карек-Сермаысь, туж быгатыса эктӥзы, мызганэн шудӥзы. Бадӟым тау вераме потэ Карек-Серма гуртысь клубен кивалтӥсьлы, Никитина Зоялы. Солэн вурем дӥськутъёсыныз та ужрадэ пыриськимы.

Мылкыдэз ӝутӥзы асьме ёросысь нылъёс но пиос. Бертыкумы автобусын весяк кырӟаса бертӥмы. Кыӵе гинэ кырӟанъёсты уг тодо вылэм соос, нош мызганчиосмы кыӵе усто шудо. Озьыен, оскон кылдэ, бадӟым классъёсын удмурт кылэз уг ке но дышето ни, нылпиос, ас кылзэс, удмурт сям-йылолъёсты уз вунэтэ шуыса, — озьы ик мылкыдъёссэ вераз Ӟаныысь удмурт кылъя но литературая дышетӥсь Римма Николаевна Петрова.

Таӵе пумиськонъёс нылпиос понна туж кулэ луо, зэмзэ но. Малы ке шуоно, Ираида Анатольевналэн верамезъя, туала поколениысь бадӟым классъёсын дышетскись удмурт нылпиос ярато мызган гуръёсты, удмурт дискотекаосы мыло-кыдо пырисько, тунсыкъясько асьсэлэн культураенызы. Нылпиослэн сыӵе куронъёссы вань бере, солы шумпотыса но школьникъёслы луонлыкъёс кылдытыса улыны кулэ.

Наталия Львовна Антонова, Покчи Лӧзя шоръёзо школаысь удмурт кылъя но литературая дышетӥсь, ёросысь удмурт дышетӥсьёслэн методобъединенизылэн кивалтӥсьсы:

— Сыӵе ваньмыз кельшиз. Мылкыдъёс али но ӧз сӥялэ. Туж умой пумитазы, сюдӥзы-вордӥзы. Шумпотымон, та ужрадэ асьме ёросысь но Кукмор районысь удмурт дышетскисьёс, дышетӥсьёс но школа директоръёс сяна, мукет улосвылысь, Башкортостанысь но, куноос пыриськиллям вал шуыса. Озьы ик та пумиськонэ Башкириысь удмуртъёслэн гажано адямизы, Удмурт Элькунын Камсьӧръёсты ас бордаз бинялтыса возись Флюра Ахметовна Чибышева, Татарстанысь удмуртъёслэн НКА-зылэн тӧроез Андрей Сергеевич Герасимов но «Ӟечбур» газетысь представитель но пыриськизы. Малпасько, та но ужрадлэсь вылӥ уровеньын ортчемзэ возьматэ шуыса. Вылаз ик та пумиськон луонлык кылдытӥз УдГУ-ын ӵош дышетскем эшъёсынымы пумиськыны. Та но мылкыдъёсмес ӝутӥз.Туж но туж паймытӥзы куноосты (ма милемды но) асьме ёросысь егит мызганчиосмы — Сизнерысь Артём Антонов но Ципьяысь Алексей Зубарев. Сыӵе усто шудӥзы мызганэн, синмаськымон! Кукморъёс асьсэлы кельтыны ик туртто вал ни соосты. Соослэн быгатыса арган шудэмзы улсын ми но, дышетӥсьёс, дышетскисьёс но мылысь-кыдысь юмшамы. Бертыкумы но весяк автобусын кырӟаса бертӥмы. Молодцы, пиос! Вашкала сямъёсмес утемзы, мызганэн эшъяськемзы понна бадӟым тау соослы!