Нокыӵе кузьым но кулэ ӧвӧл милемлы!

Тросэзлы нылъёслы но нылкышноослы, малпасько, тодмо, дыр, та кылъёс. Ми ӝожтӥськиськом ке но, пиосмуртъёслы кузьым басьтон — секыт уж шуыса, соос понна асьмелы кузьым басьтон — эшшо но секытгес уж луэ вылэм. «Бен, магазинын зэмзэ но тӥледлы басьтымон но кузьмамон арбериос трос, — шуиз одӥг юлтош пие, — нош тӥледлы яра-а ма со? Я тусыз уг кельшы собере, я юлтош нылдылэн сыӵе ик арбериез вань, я нош мар ке но мукет... Милемлы кузьыммы ӧз кельшы шуыса уд возьматӥське ке но, ми сое шӧдӥськомы ук, — шуиз со. — Соин ик тӥледыз шумпоттон ми понна бадӟым йыр висён луэ». Сыӵе йылпумъян лэсьтэм со аслыз.

Та верам кылъёсыз монэ кемалы малпаськонэ уськытӥзы. Зэмзэ ик а асьмеос, нылкышноос, кузьымъёслы сыӵе вылӥ куронъёс пуктӥськомы? Малпай, малпай но та сярысь, одӥг учыр тодам лыктиз. Одӥг пиосмурт аслаз кузпалэзлы Нылкышноослэн калыккуспо нуналзылы туж чебер сапожки кузьмам, ӝужыт каблукен — кожам, вань кадь нылкышноослы сыӵе сапожкиос кельшо шуыса. Нош кышноез каблукен пыдкутчанъёсты воксё нуллыны уг яраты вылэм, со сяна, сапожкиезлэн размерез но пичи луэм... Мискинь нылкышно ветлэм ик та сапожкиен, одӥг толэзь мында... Собере ини чидатэк картэзлы верам но сапожкизэ нуналаз ик куштыса лэзем. Вот тыныд кузьым... Нош тани кузпалыз кышноезлы ӧжыт ке но саклык висъясал ке, сыӵе учыре шедьысал-а?

Та учырысь кыӵе йылпумъян лэсьтыны луэ? Нырысь ик, пиосмуртъёс, кузпалдылы, тугандылы кузьым сётыны дасяськемдылэсь азьло пыр-поч тодыны кулэ, ма солы кельше, маин со тунсыкъяське, маин со выре... Кыӵе размерен со пыдкутчан но дӥськут нуллэ. Кыкетӥез, но самой валтӥсез, яратоно нылкышнодылы тросгес саклык висъяны кулэ — соин вераськоно, валче шутэтсконо, тросгес дыр ортчытыны тыршоно. Саклык висъямдэс нокыӵе но кузьымен воштыны уз луы, дыр. Мар вераме потэ нош... Нокыӵе кузьым но кулэ ӧвӧл милемлы! Вӧзамы гинэ луэ, котьку милемыз утьыса гинэ возе. Но... праздниклы одӥг сяська ке но кузьмалэ. Ирис... …ӧвӧл, тюльпан... Яке роза... Яке духи, яке небыт шудон, яке...