Нылпи куара медаз чалмы

Нылпиос киын асьме азьпалмы шуыса но вераны яратӥськом. Таиз но шонер пусъемын. Нош али асьмеос, бадӟымъёс, анай-атайёс, соослы азинскыны луонлыкъёс кылдытыны кулэ. Нылпи шудо но таза мед будоз шуыса, туннэ нуналэ асьмелы сюлмаськоно. 

Бадӟым Лӧзя гуртлэн I-тӥ люкетаз улӥсь нылпиослэн толзы туэ нимаз ик шулдыр но пайдаё ортчоз, дыр, шуыса малпасько. Азьло аръёсы тол вуэмен, каникулъёс кутскемен валче нылпиослы, конькиен нискылан понна, я Покчи Лӧзя школаысь катоке, я Балтасьысь катокъёсы ветлыны тупа вал. Табере та ласянь сюлмаськоно ӧвӧл ни, асьсэ гуртазы ик вань нискылан инты — каток. Талы тужгес но покчи пиналъёс шумпото, дыр, озьы ик анай-атайёс, кудъёсызлэн ӧвӧл луонлыксы пиналъёссэс палэнэ ветлытыны. Тӥни озьы выль ар каникулъёсы Бадӟым Лӧзя гурт зэмзэ но улӟиз. Каток шудо нылпи куараосын пачылмиз. Йӧ вылысь адями ӵукнаысен ӝытозь ӧз быры шуыны луэ. Пичиез но бадӟымез, мылысь-кыдысь коньки кутчаса, йӧ вылэ потӥз, кин огшоры нискыланы, кин хоккей шудыны. «Туж умой малпаллям. Молодцы, эсьма, нылпиос компьютер, телефон сьӧрын ӧжытгес пуко. Тазалыксылы но пайда гинэ», — шумпотэмзэ ватытэк вера пичи внукеныз гуртысь катоке ветлӥсь одӥг песянай. Зэмзэ но, бадӟым тау шуыны кулэ ваньзылы, кин гурт калыклэсь, нырысь ик нылпиослэсь ваньмон дырзэс пайдаё ортчытон сярысь сюлмаськем.  

Сӥзьыл, самообложение амалэн люкам коньдонлы спортъя площадка лэсьтыкузы ик ини вераськиллям гуртысь воргоронъёс, толалтэ со интыын каток радъялозы шуыса. Верамын — лэсьтэмын. Куспазы кенешыса, кӧня ке пиосмуртъёс, дырзэс но мылкыдзэс жалятэк, басьтӥсько та уж борды. Олег Агеев но Владимир Романов, шланген колонкаысь ву кыскыса, площадкаез йӧ катоклы пӧрмыто, ужбергатӥсь Сергей Плотниковлэн ужасьёсыз тыл пырто. Озьыен, ӝытазе но конькиен нискыланы, хоккей шудыны луонлык кылдытэмын. Пыдкутчан воштон понна скамья но вань. Тазэ Агеев Олеген Плотников Евгений Юрьевич лэсьтӥллям. Пусъем адямиослэн лэсьтэм ӟеч ужзы асьсэлы но трос шумпотон мед ваёз, мытэм ужзы, ӟеч сямлы пӧрмыса, азинлыко мед луоз но, вуонояз юрттӥсьёссы но тросгес мед луозы вал.