«Огазе уломе та шулдыр дуннеын!» (1 люкет)

Адями — дуннелэн валтӥсь тодметэз но валтӥсь дунлыкез. Кызьы адями та улонэз капчиятэ, озьы адями ик сое сӧрыны но быгатэ. Туала дуннеын кылдэм югдурлы та юн зэматон (доказательство) луэ.

Асьме ёросмы зэмзэ ик аспӧртэмлыко. Татын огазе уло пӧртэм калыкъёс: бигеръёс, ӟучъёс, удмуртъёс, поръёс но мукет ӧжыт лыдъем калыкъёс. Котькудмылэн ас кылмы, лулчеберетмы, осконъёсмы, озьы ке но, эшлыко кусыпъёсмы зӥбыт думемын. Сыӵе кусыпъёс возисько котькыӵе удысын но. Зэмос трос йӧскалыко ёрос нимозь вутскыны асьмелы кыдёкынгес на — ужрадъёс но воштӥськонъёс пыр потыны кулэ, адямиослэн дунне шоры учкемзы но ӧжыт небӟыны кулэ, озьы ке но, ТР-ысь трос ёросъёс пӧлын, Балтась ёросмы зэмзэ ик аспӧртэмлыко луэменыз висъяське.

2023 арлы но калык кусыпъёсты юнматон ужын нимысьтыз инты сётэмын. Элькунамы туэ ар йӧскалык лулчеберетлы но сям-йылолъёслы сӥземын угось. Соин ик ёросамы пӧртэм калыкъёслы сӥзем ужрадъёс ортчо. Соос пӧлысь котькуд аре висъяськись бадӟым праздникъёс — Сабантуй но Гырон быдтон. Нимысьтыз калык праздникъёс луыса, соос ёрослэн улоназ яркытэсь буёлъёс пырто но гужемлы выль шӧм сёто. Гужемлэсь чеберлыксэ но шулдырзэ пусйись ужрадъёс, вань лыктэм куноосты котыраз люкаса, огазе шумпотто. Соин пӧртэм калыкъёсты люкась ужрадъёс тросгес мед луысалзы! Сыӵе ужрадъёс тунсыкъяськон кылдыто, «тӧдьы» вожъяськон но лулчеберетлы синмаськон.

Адями котькуд дыре мылкыдъёсын пачылмемын. Яратон, куректон, мӧзмон, шумпотон, вожпотон — та ваньмыз адямиез юнматэ, кыдатэ но азьлань вамыштыны бадӟым луонлык сётэ. Мылкыдъёсын пачылмем адями ужпумъёссэ но пӧртэм сямен лэсьтыны быгатэ: урод мылкыдын уж но секытэн, каллен мынэ, шулдыр вакытэ — уж лэсьтэм дырез но шӧдыса вуттыны уг луы.

Но туала улон воштӥськонъёсты кулэ каре. Котькуд выльдӥськонъёсын одно ик адями кусыпъёс адӟисько. 

Нош кыӵе удысъёсын йӧскалык кусыпъёс зэмзэ ик адӟисько? Пайдаё луо-а калыкъёслэн эшъяськемзы? Яке, котькуд калыклы огинэ улоно-а? Вань та юанъёслы асьтэос гинэ валэктонъёс шедьтыны быгатоды. Шонер валэктон шедьтыны туж шуг. Соос пӧртэм пумо луозы: кин ке осконъёс вылэ, кин ке историысь фактъёс вылэ инъяськоз, но одӥгез воштонтэм — котькуд адями дунне вылэ нырысь ик ӟеч сямо но небыт сюлэмо адями луыны вордӥське. 

Яратон, семья кусыпъёс

Семья — адямилэн улоназ самой бадӟым инъет. Семья пушкын адями кужым люка но семьяысен ик бадӟым улонэ вамыштэ. Татын солэн осконъёсыз, нылкышно-пиосмурт кусыпъёслэн шаблонъёсыз кылдо, дунне шоры учконъёсыз юнмало. Ваньмыз семья бордысен кутске. Нылпи губка кадь ваньзэ ас улоназ пыӵатэ: эшлыко семьяын нылпи серекъясь но чупрес будэ, кылдэм ужпумъёссэ но капчиен быдэстэ, нош шудтэм семьяын нылпи улӥ асдунъетэн (самооценкаен) будэ. Ӵемысь сыӵе пинал азьпал улоназ но аслыз оскытэк, талантъёссэ ватыса, шараяны кышкаса улэ.

Азьло дыре вашкала сям-йылолъёс адямиослэн улоназы туж бадӟым инты басьтӥллям. Вашкала сям-йылолъёсъя шудэм сюан одно ик чебересь кырӟанъёсын, вашкала сюан йылолъёсын герӟаськем, со йылолъёс ик утилллям егит семьяез пӧртэм лек синъёслэсь. Арлыдоос но егитъёслэсь калык понна тыршемзэс, калык сям-йылолъёсты утемзэс юн эскериллям. Соин ик суро семьяосты ӟеч мылкыдын ӧз пумиталэ.

Но туала улон семья кылдытон юанэ аслэсьтыз воштонъёссэ пыртэ — туннэ йӧскалыккуспо (межнациональной) сюан — дышем суред ни. Ёросамы удмурт но бигер, удмурт но ӟуч, удмурт но пор семьяос гинэ но шӧдскымон трос. Яратон уг юа, кыӵе адямиез тон яратод но бордад кыскод, таӵе дыръя оскон сярысь юанъёс но уг сюлмаськыто. 

Висъясько-а сыӵе кусыпъёс вашкалаослэсь? Тросэз соглаш луозы, ваньмыз та адямиослэн малпанъёсынызы гинэ герӟаськемын. Кылсярысь, одӥг йӧскалыкысь адямиослэн семьяязы нуналмысь улон ужъёсъя но керетон потыны быгатоз, нош кытын ке пӧртэм калыкысь кузпалъёс ог-огзэс дунъяса но валаса улозы, семьязы но юн луоз. 

Котькуд адями дунне вылэ аслаз осконъёсыныз но аслаз малпанъёсыныз вордӥське. Соин одӥг адямилэн ужъёсызъя быдэс калыкез начар яке умой шуыны ум быгатӥське. Котькуд калык пӧлын но пӧртэм сямо адямиос луыны быгато. 

Пичи гуртъёсын вашкала сям-йылолъёсты утьыны тыршо на. Нылпиос асьсэлэсь яратон мылкыдъёссэс но анай-атаенызы эскеро. Туала улонэн артэ вамышъясь но яратӥсь анай-атайёс нылпиезлэсь котькуд быръёнзэ лыдэ басьтыны кулэ, кин вӧзын солэн бурдъёсыз вӧлско, со ик солэн зэмос шудэз. Азьланяз котькыӵе кусыпъёссы луизы ке но, со аслаз быръем адямиез. 

Семьяын сям-йылолъёс возиськизы ке, нылпиос но соосты мылысь-кыдысь улоназы пырто, выль амалэн калыклы возьмато. Кылсярысь, бигеръёс кырӟаны усто, удмуртъёс но — кырӟась калык, ӟучъёс чебересь дӥськутэнызы но узыр фольклоренызы, поръёс эктон ӧрын усточиос.
Ёросын одӥг гинэ гуртын — Улисьялын — возиське пор калык лулчеберет. Та гурт висъяськыса кадь улэ ке но, калыкез ёрос улонэ но пыриське, асьсэ кылзэс но соос юн утё. Гуртысь азьветлӥсьёс пӧртэм ужрадъёс, шулдыръяськонъёс ортчыто. Соос ваньзы огинэ люкаськыса шумпотонъёссэс пумитало но секытъёссэс капчиен ортчо.

Пор калык пӧлын но ёросамы тодмо адямиос вань. Кылсярысь, ёросысь сӥё-дано хореограф Эрик Васинкин но солэн кузпалэз Ираида Васинкина. Соос сюлмысь тыршо асьсэлэсь лулчеберетсэс утьыны. Эрик Геннадьевич аслэсьтыз егит артистъёссэ пӧртэм калыкъёслэн эктонъёсынызы тодматэ, дунне шоры учконзэс паськытатэ, эктон пыр пиналъёсты мукет калыкъёслэсь лулчеберетсэс гажаны дышетэ. Нош кузпалэз — Ираида Гурьяновна — эктон-кырӟанъёс сяна, киужъёсын но выре. Пужыятэмъёсыз яркытэсь, тунсыкоесь, синэз мальдытӥсесь, но тужгес валтӥсез — йӧскалык шӧмоесь. 

Малпасько, котькуд семья сыӵе луыны кулэ — вашкала сям-йылолъёсты утись но бускель калыкъёслэсь лулчеберетсэс, кылзэс гажась.