Ой, эсьмаса, эсьмаса Гырон Быдтон гурласа...

Эх, крезьгуръёс чузъясько, кыдёке, туж кыдёке.
Ӵошен экто, кырӟало —
Калык праздник возь вылын,
Милям Гырон Быдтонмы!..

Василий Петровичлэсь Гырон Быдтон сярысь та кылбурзэ интернетысь адӟи но ӧй чида гожтытэк. 

Пичи дырысен адями улэ куазьлэн тодметэзъя, пӧртэм шулдыръяськонлы дасяськыса: сӥзьыл — октэм ю-няньлы шумпотӥськом, тол ке вуэ — Выль арез пумитаськом, нош тулыс ке вуэ — улонлэсь сайкатскемзэ витиськомы, гужем ке вуэ — Семык, Сабантуй, Гырон Быдтон! 

Озьы дышимы ини — Гырон Быдтон шулдыръяськонтэк гужем ик ӧз на вуы кадь потэ. Тани нош огез шулдыръяськонмы ортчиз. Куд-огез шуэ: «куазь, пе, кезьыт, зоро луиз», нош милемлы туж кельшиз! Зорыса котыр чылкытаз, будосъёсты миськиз но сектаз, чылкыт омырын шоканы капчи луиз! Котькыӵе куазьлы дӥськут вань та дыре, Инмарлы тау! Зорлэсь но котлэсь утиськыны луэ. Кызьы адямиос пӧртэм сямо, озьы ик куазьлэн но аспӧртэмлыкез вань: шунтэ но кынтэ, куасьтэ но миське, будэтэ но кисьматэ! Зоро куазен сыӵе чебер удмурт шулдыръяськонмы эшшо но чебергес луиз. Паймымон шулдыр кутсконэз — пӧртэм калыкъёслэсь эшъяськыса улонзэ возьматӥзы, мылкыд соку ик ӝутскиз. Али но син азям вуюись тусо пӧртэм дӥськутъёс, эктон но кырӟан гуръёс кемалы пель сьӧрам кылизы. Котькыӵе шулдыръяськонын луо «ведущийёс» — шудонэз, концертэз яке ӵошатсконэз нуисьёс, соос кызьы верало, сокем ик тунсыко луэ. Нимаз ик вераме потэ Гырон Быдтонэз нуисьёс пумысен, ас дыраз калыкез лӧпкытыны но быгатӥзы, пӧртэм шудонъёсы ӧтчазы, тау карон кылъёс но веразы, ӧтем куноосыз данъязы. Туж синмаськымон чылкыт удмурт кылмы чузъяськиз сцена вылысен.

Галина Денисовна, Наталия Львовна! Та сямдэс эн куштэ, азьпалан но озьы медло, ужады трос азинсконъёс тӥледлы сӥзисько. Трос ушъямон кылъёс вераме потэ асьме ёросысь артистъёслы но. Ортчем аръёсыз ӵошатыса, кырӟась-эктӥсьёс выльмизы, синмаськымон нылъёсмы но пиосмы будӥзы. Сцена вылын асьсэды возьыны быгато, чебересь дӥськутъёсын паймыто. Арлыдо артистъёсмы но арысь аре выль крезьгуръёсын шулдырто. Юн тазалык азьпалан! Шудон но ӵошатскон ортчытӥсь апайёс, тӥ таяз учыре задор потӥды, зор-котлэсь кышкатэк ӵошатскимы, синпельлы кузьымъёсын бертӥмы. Бадӟым тау, 2026-тӥ арын Гырон Быдтонэз дасясьёслы «Италмас» кун ансамблез ӧтемзы понна. Кыӵе шулдыр луиз котырын: «жин» карыса кырӟазы, «йыг» карыса эктӥзы. Кыдёкын сюресэз матын карыса вуизы, зоро куазез югыт карыса кошкизы. 

Зорлэсь кышкаса доразы пукисьёс трос луизы, нош ми чик но ӧм жалялэ. Кыдёкысен ас шаерамы вордскем кылын вераськыны но шулдыръяськыны бертӥмы, трос гинэ тодмоосмес адӟимы, эсьмаса!

Нина Андреева, Нолинск кар