Ортчем вакытысь дуно кузьым

2019-тӥ арын «Азьлане» газет аслэсьтыз 85 аръем юбилейзэ пусйиз. Соин валче газетамы «Азьланеын» ужам адямиос, гажано ветеранъёсмы сярысь но тросгес гожъяны тыршимы. Ветеранъёс, кыл усточиос, берыктон ужысь но газет печатлан удысысь усточиос газетмылэн валтӥсь ваньбурез луо угось. Та ласянь «Азьлане» узыр, малы ке шуоно удмурт газетамы котьку но ас ужзылы сётскем адямиос ужаллям. Котькудӥз соос пӧлысь аслэсьтыз пытьызэ кельтэм газетмылэн но ёросмылэн историяз, котькудӥзлэн соослэн вань со историын аслаз нокинлы тупасьтэм бамез.

Одӥгез сыӵе ветеранмы — Агафья Фёдоровна Самсонова — кема аръёс ӵоже «Азьлане» газетлэн уженыз кивалтэм кышномурт. Соку, 2019-тӥ арын, газетамы ужам адямиос сярысь ивортодэт люкаку, Агафья Фёдоровна сярысь таӵе информация шедьтӥмы вал: «Агафья Фёдоровна Самсонова вордскиз 1905 арын Ципья районысь Пор-Кутеш гуртын шоро-куспо улӥсь крестьян семьяын.

1912 арысен 1917 арозь Пор-Кутеш гуртысь школаын дышетске. Собере, семьяысьтыз кык агаез фронтэ кошкемен, атаезлэн хозяйствояз ужано луэ. Самсонова 1927 арысен нош ик аслэсьтыз тодон-валанзэ будэтон уж борды кутске, Казаньысь рабфаке дышетскыны пыре. Одӥг ар дышетскем бераз, висеменыз, дышетсконзэ дугдытоно луэ. 1929 аре Агафья Фёдоровна совпартшколае дышетскыны пыре но 1932 арын сое йылпумъя. 1932 аре ВКП(б) радэ пыре. 1932 арысен 1935 арозь Ципья покчиёзо школаын дышетэ. 1937 арысен 1938 арозь Балтась районын потӥсь «Азьлане» газетлэн редакторез луыса ужа. Ципья район кылдэм бере со «Азьлане» газетэн валче Ципьяе ужаны лыктэ. 1940 арысен 1943 арозь Ципья райкомын кадръёсъя секретарын ужа. 1943 арысен 1960-тӥ арозь — Ципья районысь «Азьлане» газетлэн редакторез». Мазэ веранэз, семьяез, нылпиосыз сярысь татын нокыӵе но ивортодэт сётэмын ӧвӧл.  Газетын ужам куд-ог ветеранъёслэсь юалляськыса, тодӥмы солэн одӥг Лев нимо пиез луэм шуыса. Кема аръёс ӵоже Агафья Фёдоровна Ципья черкогуртын улэм (соин Ципьяысь куд-ог арлыдоос сое тодо но, дыр), отын ик, пе, солэн шайгуэз но. Та ивортодэтъёсты юнматӥзы Агафья Фёдоровналэн Арчаын улӥсь внучкаезлэн Руфина Львовна Самсоновалэн тодэ ваёнъёсыз но, кудӥз 2020 арлэн пумаз ёрос газетлэн редакцияз вуылэм вал. Шумпотон мылкыдэн пачылмизы кышномурт но солэн кузпалэз Юрий Петрович Козлов, «Азьлане» газет, кытын куке но соослэн матысь адямизы ужам, али но вань шуыса тодэмзы бере. Кузпалъёс редакцие куное буш киын лыктымтэзы вал, дуно кузьым вайизы соос милемлы — туспуктэмъёсты. Малы дуно шуоды-а? Малы ке шуоно соос «Азьлане» газетлэн историез луо, отын ортчем аръёслэн пытьызы кылемын. Лэзем со туспуктэмъёсты Агафья Фёдоровналэн кенэз, Лев пиезлэн кышноез — Райхана Бариевна Самсонова. Тани кыӵе валэктон сётэм со туспуктэмъёслы аслаз вакчияк гожтэм гожтэтаз: «… Я решила передать Вам сохранившиеся у меня фотографии, дат на них нет, может напечатаете... Может, кто вспомнит своих близких и родственников». Соин, пӧлады ӵыжы-выжыостэс яке тодмоостэс тодмам адямиос шедёзы шуэм осконэн ӵектӥськом тӥледлы со туспуктэмъёсын тодматскыны.

P.S: Туспуктэмъёс пӧлын туж вашкалаез но вань. Соиз сярысь  нимаз ик вераны кулэ. Нырысь учкыса ик валаны луэ, туспуктэм удмурт калык понна туж дуно луэ шуыса. Тодмо ӧвӧл, ку но кытын со лэсьтэмын. Малпан вань, 1920-тӥ аръёс луыны быгато шуыса. Туспуктэмысь адямиос пӧлын кыкетӥ радын паллянысен кыкетӥез Агафья Самсонова, нош куинетӥ радын паллянысен ньылетӥез асьме дано гожъяськисьмы Кузебай Герд.