Ошмесъёс — инкуазьлэн ву синпелетъёсыз (3 люкет)

Ошмес — вулэн одӥгез инъетэз. 

Ошмесъёсты удмуртъёс котьку сӥлы кариллям. Исторической выжымадёсъёсын (преданиосын) но соос бадӟым инты басьто. Удмуртъёс, улон инты бырйыкузы, одно ик ошмеслэсь матын луэмзэ кулэ кариллям. Выжымадёсъёслы осконо ке, сыӵе интыез утчаны юрттӥллям пӧйшуръёс, удмуртъёслэн — со сьӧд яке тӧдьы гоно ош. Озьыен, вашкала дырысен калык пӧлын ву бадӟым инты басьтэм, ошмесъёсты утялтыса, данъяса возиллям.

Ӟаны (Шор Кушкет) гуртысь ошмесъёс

Гуртлэн кылдэмез XVIII даурлы тодмостэмын. Мукет удмурт гуртъёсын ӵошатыса, гурт егит на. Гуртлэн инфраструктура паласен но валтӥсь луэмез шӧдӥське: шоръёзо школа, али гинэ копак вылдӥськем лулчебертъя юрт, лэсьтэм газонын футболэн шудон площадка, нылпиослы пӧртэм тренажёръёсын площадка, арлы быдэ кужмоясь «Дуслык» возёслэн территориез. Гуртысь воштӥськонъёс гурт калыклэсь улонзэ но капчиято. 

Гурт трослы егит ке но, адямиослэн вашкала улонысь пайдазэ утчамзы шӧдӥське: гуртын вашкала сям-йылолъёсты семья но калык кусыпъёсын возё на. 

Ошмесъёс сярысь верано ке, татын 3 ошмес. Кутыр ошмес (Хутор ошмес) — Хуторская урамын интыяськемын, туннэ нуналэ соин пайдаяськисез трос ӧвӧл ни. Кыкетӥез —Виль урам ошмес. Та ошмесэз выльдӥськонъёс пыр Коммунаров но куд-ог Депутатская урамъёсын улӥсьёс поттӥзы. Эшшо одӥгез — Чола ошмес. Таиз ошмес озьы ик вашкала дырысен кылдэмын, тусбуйзэ чебертӥз Ӟаны гуртын улӥсь Сергей Апаков. Матысь ураме выль корка пуктыкуз, аслыз кыл сётэм одно ик ошмесэз радъяны. Малпасько, тыршемез юнме ӧвӧл, ошмес гуртэзлэсь аспӧртэмлыко буёлъёссэ эшшо но яркытгес кариз. Сергей Пантелеймонович нокинлэсь юрттэт ӧз возьма: ас кужыменыз но аслаз басьтэм лэсьтӥськон материалъёсыныз ошмеслэсь вылтуссэ копак выльдӥз, чебертӥз. Шораз учкыса ик шуныт мылкыдъёс бугырско. Сыӵе адямиос трос луысалзы ке, дуннемы но трослы чебергес луысал, дыр.

Туннэ нуналэ Ӟаны гуртын улӥсьёс асьсэ ошмесъёсынызы данъяськыны быгато, кылын гинэ ӧвӧл, ужъёссы пыр ӟаныос гуртсылэн азинсконэз сярысь сюлмаськемзэс возьмато.