Ошмесъёс — инкуазьлэн ву синпелетъёсыз (2 люкет)

Ошмес — вулэн одӥгез инъетэз.

Ошмесъёсты удмуртъёс котьку сӥлы кариллям. Исторической выжымадёсъёсын (преданиосын) но соос бадӟым инты басьто. Удмуртъёс, улон инты бырйыкузы, одно ик ошмеслэсь матын луэмзэ кулэ кариллям. Выжымадёсъёслы осконо ке, сыӵе интыез утчаны юрттӥллям пӧйшуръёс, удмуртъёслэн — со сьӧд яке тӧдьы гоно ош. Озьыен, вашкала дырысен калык пӧлын ву бадӟым инты басьтэм, ошмесъёсты утялтыса, данъяса возиллям.

Кутэш (Пор-Кутеш) гуртысь ошмесъёс
Кутэш гуртлэн историез 1678 арысен тодмо. Та гуртын ошмесъёслэн кылдэм историзы но туж тунсыко. Гуртын 3 ошмесъёслэн нимъёссы тодмо: Куд ошмес, Луд ошмес но Вал гидь ошмес — вашкала дыре огпал ярдураз колхозлэн вал гидъёссы луиллям, со бордысен ошмеслэн нимыз но кылдэм. 

Одӥгез, уката кутӥськисез — Вал гидь ошмес. Таиз ошмес туж шулдыр интые пуксемын: шур, вож писпуос, урамез но шыпыт. Ошмесэз радъян уже ас дыраз кутскизы урамын улӥсь семьяос — Раимовъёс, Трофимовъёс, Самсоновъёс. Чылкыт ву басьтон интые васькыны нимысьтыз тубат лэсьтӥзы, со понна татын котьку корт лопата возиське. Арлы быдэ воштӥськонъёс но мынӥзы. Озьы ик ошмес утялтон уже аслэсьтыз кужымзэ но дырзэ жалятэк Екатерина Михеева пыриське. Арлыдыз трос ке но, песянай ошмеслэн азьланез сярысь сюлмаське. Нош таяз аре нимысьтыз бадӟымесь выльдӥськонъёс вуизы: ошмесын бадӟым изъёслэсь тубат, шурлы ярдуръёс лэсьтэмын, сюресэз но векчи шальыен шобыртэмын, гурезьтӥ шуген ветлон быремын. Та ужын тырше ООО «Татавтодор — Тюнтерьский карьер» обществоысь Лоуфан Ахмадуллин. 

Туннэ нуналэ та ошмесысь ву нуллӥсьёс туж трос. Адямиослэн верамзыя, вашкала ошмеслэн составаз азвесез, пе, вань, соин уката пайдаё. Та вуэн чайникын пуксемез но уг луы, озьыен, со тазалык понна умоен лыдъяське.