Ошмесъёс — инкуазьлэн ву синпелетъёсыз (4 люкет)

Ошмес — вулэн одӥгез инъетэз. 

Ошмесъёсты удмуртъёс котьку сӥлы кариллям. Исторической выжымадёсъёсын (преданиосын) но соос бадӟым инты басьто. Удмуртъёс, улон инты бырйыкузы, одно ик ошмеслэсь матын луэмзэ кулэ кариллям. Выжымадёсъёслы осконо ке, сыӵе интыез утчаны юрттӥллям пӧйшуръёс, удмуртъёслэн — со сьӧд яке тӧдьы гоно ош. Озьыен, вашкала дырысен калык пӧлын ву бадӟым инты басьтэм, ошмесъёсты утялтыса, данъяса возиллям.

Кисаль (Сала Кушкет) гуртысь ошмесъёс

Кисаль гуртлэн историез озьы ик XVIII даурен пусъемын. Татын но вашкала дырысен 2 ошмес тодмо, туннэ нуналэ но соос калык понна кулэ луись: Пӧша ошмес но Чола (Гадьма шур) ошмес. Кыкез ик нюкъёслэн нимынызы герӟаськемын: Пӧшъя нюк но Гадьма нюк. 
Гуртлэн шораз поттэм Пӧша ошмес выльдӥськонъёс бере туж чебер адӟиське. Воштӥськонъёс улонэ пыӵазы «МДСУ»-лэн кивалтӥсезлэн Рашит Ильясовлэн юрттэменыз (материал сётэм) но гурт калыклэн тыршеменыз. 

Кыкетӥез ошмес гуртлэн кутсконаз ик интыяськемын. Азьло туж кыдёкысен, нюкысен басьтоно луиллям, дыр ортчыса, ошмесэз сюрес дуре радъяллям. Чола ошмес элькун программа улсын самообложение амалэн коньдон люкамен но озьы ик гуртын улӥсьёслэн тыршеменызы радъямын. 

Кыкез ик ошмесъёс сяськаосын котыртэмын, соос синмаськыто, ву юэмед ӧз поты ке но, жильыртӥсь куараосынызы липето «ву коркаос» доразы ӧте. Вузэс омыртыкуд ик, кужымед трослы йылэ кадь. Ӵапак ошмесъёсты учкон дыръя, гуртысь калык вулы лыктэмын вал, туж паймымон луиз мон понна, котькуд корка ву пыремын ке но, ведра карнанэн ву нуллӥсьёс трос. Мукет гуртъёсысь, ортчись машинаос но пырыса ву басьто татысь.