«Оти ветлыкыд но, тати ветлыкыд но пыры, туганэ!» яке Киськем гуртлэн историысьтыз чуръёс - фоторепортаж

Бадӟым Пумиськонмылэн шара люкетэз Россия телеканалысь «Субботний вечер» сямен мынӥз. Сэрьяос люкаськем калыклэсь мылкыдзэ шулдыртъязы вашкала но туала кырӟанъёсын но кубыз, баян гурен. Куноосмы мылкыдъёсмес бурдъязы асьсэ визьмынызы, зарни сюлэм пыдсысьтызы омыръям лул узырлыкенызы. Ог ньыльдон мында кырӟанъёслэн авторзы - Дурга культура юртлэн директорез Николай Алексеев. Ньыльдонэз пӧлысь ньылез гинэ удмурт... Но кыӵе бен шулдыр но кужмо со кырӟанъёсыз! Соослы бурд понӥд ке, быдэс удмурт дуннее но вӧлмысалзы! Оскисько, азьланяз озьы ик луоз шуыса. Со понна Николай Александровичлы куара гожтонъя студиын вылӥ ӟечлыкен гожтӥськем кырӟанъёсыныз чебер видеоклипъёс кылдытон бордын тыршоно, дыр...

Вордскем гуртсэ данъясь, анай кылмес бурдъясь ас кылбуръёссэ лыдӟиз Кӧргемысь Полина Поликарпова. Та Бадӟым Пумиськонмы сярысь малпанъёс но ӵапак та ӟырдыт сюлэмо нылкышно кенжытӥз вазьвал арын Балтачын янгыш гинэ пумиськыкумы. Кужмо кичабонъёс улсын чузъяськем Полина Валентиновналэн кылбуръёсыз, кырӟанъёсыз табере чик но эркенытэк «Азьлане» газетэ сюрес лёгозы ни шуыса малпасько. Озьы мед луоз!

Вань кадь люкаськем калыкез паймытӥз аслам туганэ, ӵужмортэлэн нылыз - Кӧргемысь Антонида Камаева. Кылбуръёсъя выль ошмес син усьтӥськиз шуыса валамы ваньмы но. Оло син азьын ик вордскизы Бадӟым Пумиськонмылы сӥзем чуръёс но! Антонида Васильевналэн но кылбуръёсыз газет лыдӟисьёсмылэсь гожъяськон мылкыдзэс пуромытозы шуыса оскисько.

Пумиськонмылэсь нырысетӥ люкетсэ йылпумъяса, Чернов П.Г. артистъёсмылэсь сцена вылын возьматэм устолыксэс пусйиз. «Таӵе пумиськонъёс сюлэмез бурдъяло, анай кылмес азинтонэ шӧдскымон люкет пырто», - шуиз Пётр Григорьевич. - «Усточиос мукет гуртъёсын но вань, соин но таӵе пумиськонъёс ӵемгес но мед луысалзы вылэм!»

Пумиськонмылэн кыкетӥ люкетаз, тыр нянё ӝок сьӧрын кырӟаса- гурласа но эктыса- юмшаса. ваче бурмизы мылкыдъёсмы. Со сярысь но мадизы вашкала кырӟанъёсмы: «...Милям та сямен сием но юэммы, адямилэсь ӧвӧл, но Инмарлэсь!» Кабанме йылсаса, лыдӟисьёслы таӵе ӧтёнэн вазиськеме потэ: Ойдолэ ог-огмылы матынгес луоме, ӵыжы-выжылыкмес утёме, лул узырлыкмес -анай кылмес азинтыса валче уломе!

Леонид Сапожников

Туспуктэмъёсыз авторлэн