«Петроу ортчиз, гужем быриз»

Биктеш гуртын азьпал ик праздниклы дасяськыны кутскизы ни. Шумпотымон, ёросысь возёсъёс, предприятиос но юрттӥзы, гурт поселениысь калык но мыло-кыдо пыриськиз дасяськон ужрадэ. 12 пӧсьтолэзе ёросысь быдэс калык люкаськыны кутскиз паськыт вӧлмем бусыё интые. Биктешъёслэн праздник ортчытон интызы туж кельшымон: шур бызе, бадӟым вӧлмыт инты, гурезь йылысен капчиен ваньмыз адӟиське. Та ваньмыз синмаськытэ! Нош адӟыны кулэ вал кӧня татын вузкарон интыос но нылпиос понна аттракционъёс пуктэмын! 
Праздникез сяме пыремъя Айдар Галиаскаров но Эбри Хабриев нуизы. Соослэн капчи но чырткем мылкыдзы вань лыктэм куноослы но пыӵаз кадь. Лыктэм артистъёс по аспӧртэмлыко мылкыдъёс пыӵатӥзы. Чебер гужем кырӟанъёсынызы соос калыкез шулдыртӥзы.

Котькуд адями татын аслыз кельшымон шудонъёс но ӵошатсконъёс бырйыны быгатӥз. Туж тунсыко луизы чорыган но, лаканэн ветлытон но, горшок пыргытон но. Вань праздник майдан пӧртэм шудонъёсын тырмиз.

Но самой тунсыкоез котьку сямен ортчиз ву вылын. Азьло ик дӥсьтӥсь батыръёс, кезьыт куазьлэсь кышкатэк, пуйыен жугиськизы. Жаляса верано, пыриськисьёс куинь кузя гинэ луизы. Радысь дас арлэсь трос чемпион нимзэ утиз Шишинер гуртысь «Япон» кушемнимо воргорон. Туэяз но со нокинлы вормонзэ ӧз сёты. Собере воргоронъёс нялмыт юбое тубизы. Нырысетӥез Кушкетбаш гуртысь егит пи ӝог гинэ юболэн пумаз вуиз. Мукет воргоронъёс но асьсэлэсь кужымзэс эскерыны вутскизы. Татын ик воргоронъёс понна думем гозытӥ дырлы потонъя ӵошатскон радъяськиз. Вераны кулэ, воргоронъёс тактика пумысен туж умой дасяськиллям: вуэ нокин ӧз усьы.

— Ву вылын ӵошат-сконъёс котьку самой тунсыкоосыз луо. Арлы быдэ соос тужгес но трос калыкез бордаз кыско. Малпасько, туэ кезьыт куазь луыса, пыриськисьёс трос ӧй вал, озьы ке но, туж шумпотымон, воргоронъёс лыктэм калыклы вунонтэм мылкыдъёс кузьмазы. Нырысетӥ аръёсаз воргоронъёс пумозяз валаса уг вутто вал, кызьы асьсэды возёно, кызьы шокано, кызьы гозытӥ ветлоно, кутсконаз ик усё вал вуэ. Туэ ини пиосмы туж чырткем ортчо ваньзэ, — люкиськизы малпанъёсынызы лыктэмъёс. 

Пумаз лыктэмъёс понна фейерверк но лэзизы. Сьӧд инбам котырак пӧртэм яркыт тылъёсын тырмиз но кизилиос кадь быдэсак вӧлмизы. Туж задор дасям праздник понна радъясьёслы бадӟым тау шуыны кулэ.