Пичи артистъёсты данъязы

«Сайяр» фестиваль аслэсьтыз сюрессэ 2016 арысен лыдъяны кутске. Та аспӧртэмлыко ужрад калык лулчеберетэз но анай кылэз утёнын бадӟым инты басьтэ. Элькунамы но калык мерасэз утёнын трос ужъёс нуисько. Талы шӧдскымон саклык висъя ТР-лэн Раисэз Рустам Минниханов.
Калык лулчеберетэз азинтон понна школаосын, нылпи садъёсын, лулчеберетъя юртъёсын ялан уж пӧзе. Анай кылэз тодон, валан — со данъяськымон тодмет гинэ ӧвӧл, со адямилэн нырысь ужез, вашкалаослы йыбырттон, ас выжыедлэсь узырлыксэ вылӥе ӝутон.

Туэ фестиваль школа, ёрос, зона но республика туръёс пыр ортчиз. Со толшорысен куартолэзёзь кыстӥськиз. Соос пӧлысь тужгес устооссэ элькунысь сцена вылын данъязы.

Ужрадэ быдэс элькунысь пичи артистъёс но соослэн кивалтӥсьёссы люкаськизы. Асьме Балтась ёросысь коллективъёс но палэнэ ӧз кыле. Школаосысь но нылпи садъёсысь дышетскисьёс вылӥ устолыксэс возьматӥзы. 

Шумпотыса пусйыны кулэ, Нурма шоръёзо школалэн театральной коллективез 1 инты басьтӥз (кивалтӥсез — Рушания Хафизова). Ципья нылпи садлэн театральной коллективез — 2 интыын (кивалтӥсьёсыз — Марина Журавлёва, Ирина Кузнецова), Шор Кушкет шоръёзо школалэн театральной коллективез — 3 интыын (кивалтӥсез — Людмила Игнатьева). Балтасьысь 5-тӥ номеро нылпи садлэн коллективез фестивальлэн лауреатэз луиз (кивалтӥсьёсыз — Зиля Хабибрахманова, Гулюса Сагдиева, Аниса Зяляева). 

— «Сайяр» фестивале милям нылпи садмы куинетӥ арзэ пыриське ини. 2023 арын ми ёросын нырысетӥ инты басьтыса, республика этапе потӥмы. Отын но нырысетӥ интыен пусйиськимы. Милемлы соку 15 сюрс манет тыр сертификат но 30 сюрс коньдонкузьым сётӥзы. 2024 арын ёрос этапын 1 инты басьтӥмы, но республикаозь ӧм вуэ. Малпамы, котькуд ар одӥг нылпи садэз уз пусъе шуыса. Мылкыдмы ӧз усьы. Ужмес азьланьтӥмы. Таяз аре видео лэзьыны малпамы. Постановкамы «Тулыс сярысь былинаос» шуыса нимаськиз. Сыӵе вылӥ пусъёзы шуыса ӧм но малпалэ, зэмзэ ке верано. Ёрос этапын 1 инты, 20 сюрс коньдонкузьым, 2 инты республикаын. Милемыз электроникая «Ситилинк» магазинэ 13 сюрс манет тыр сертификатэн но 75 сюрс коньдонкузьымен пусйизы. Та фестивале 6-7 аресъем пиналъёс пыриськизы. Декорациосты но костюмъёсты дасянын туж бадӟым юрттэт милемлы анай-атайёс сётӥзы. Сыӵе педагог-анай-атай-нылпи тандемын гинэ вылӥ азинсконъёсы вутскыны луэ. Ми туж но туж шумпотӥськом та вормонмылы. Бадӟым тау та фестивалез радъясьёслы. Азьланяз но татчы пыриськыны тыршомы, — ивортӥз Ципья нылпи садысь старшой визьнодась Ирина Кузнецова.

Озьы ик вань коллективъёс Дышетонъя но наукаосъя министерстволэсь дипломъёссэ но дуно кузьымъёссэ басьтӥзы. 

Бен, таӵе бадӟым азинсконъёс котьку нылпилы стимул луо, соин пичи дырысен нылпиез пӧртэм ласянь азинтыны кулэ. Ведь ваньзэ шӧмъяса гинэ, адями аслэсьтыз сюрессэ шедьтыны быгатэ.

Вормисьёсты но призо ин-ты басьтэмъёсты сюлмысь ӟечкыласьком, азьланяз но вормонъёс сӥзиськом.

Туспуктэмъёс: Ципья нылпи садлэн но Шор Кушкет шоръёзо школалэн архивез