Почтальон – гуртын нокинэн воштонтэм адями

Почта ёзэтъёс туала Интернет даурлэн вакытаз но ас кулэлыксэс уг ышто. Адямиос озьы ик гожтэтъёсты гожъяло, газет-журналъёслы гожтӥсько, посылкаосты лэзьяло. Улонзэс та удысэн адямиослэн туж ик герӟамзы уг поты ке но, почтальонлэн ӧнерез кулэ луись ужъёслэн одӥгез луэ.
Ужзы почтаын тыршисьёслэн котьку трос вал, али но со озьы. Почта ёзэтын вань кадь вуэм корреспонденциез басьто, сортировать каро, адресъёсъя люкыло. Почта пыр калык посылкаосты, бандерольёсты но басьтэ; тыл, телефон, коммунальной услугаос понна квитанциосты тыре но трос мукет ужъёсты быдэстэ. Со сяна, почта ёзэт калыклы пӧртэм продукциосты но ӵектэ али. Берло аръёсы почтаен сётоно услугаос шӧдскымон паськытазы но али. Татчы мобильной телефонной операторъёслы подключаться карон понна вазисько, Интернет услугаосын пайдаясько.
Кемалась ӧвӧл, шонергес вераса 10-тӥ пӧсьтолэзе, почта удысын тыршисьёс ас ӧнер праздниксэс пусйизы. Таин валче тӥледыз Бурнак почта ёзэтысь почтальонэн Людмила Корниловаен тодматомы.
Та ёзэтысь пичи но эшлыко коллективын ваньзы ог-огзылы юрттыны тыршо. Коллективын ужасьёслэн лулысь-сюлмысь тыршеменызы, гожтӥськонъя, доставкаосъя, вузкаронъя но мукет показательёсъя почта ёзэт планзэс дыраз быдэсъя. Почта ёзэтлэн инъет луись звеноез, котьку кадь ик, почтальон луэ. Бадӟым городъёсын та ужасьлэн тыршемез туж ик адскымон ӧвӧл ке, гуртысь почтальон — воштонтэм ужась.
Бурнакысь почта ёзэтэн Гульфира Ахматханова кивалтэ, татын кык почтальон тырше – Вуж Турья гуртысь Людмила Корнилова но Карек-Сермаысь Ольга Петрова (таиз статьяе почтальон Людмила Геннадьевна Корнилова сярысь). Кышномуртъёс вылын бадӟым нагрузка. Почтаез сортировать карем бере, соос пельпумъёсазы бадӟым сумка ошыло но гурт кузя вамышто. Гуртын ужась почтальонлы тросаз учыре пӧртэм гуртъёсы ветлыса ужаны но тупа али. Людмила Геннадьевна но озьы ужа: со кык гуртын – Вуж Турьяын но Бурнакын – почтальон луэ.
Сизьым ар ужамез ӵоже кӧня иськем сюресъёсты пыдын ветлэм меда Людмила Корнилова? Та юанлы со ачиз но шонер валэктон шедьтыны уз быгаты ини. Яра али машинаез вань, табере соин гинэ гуртысь гуртэ ворттылэ вылэм. Нош азьло аръёсы пыдын ветлэм. Кинлы гинэ сюлмызъя уж шедьтыны кылдэм али? Людмила Геннадьевналы та ласянь шуд усем, почтальон луыса ужало шуыса азьло со малпамтэ ке но, табере ӧнерезлы дышем ини, калыкен но со тупаса ужа.
Вордскем кышномурт Вуж Турья гуртын. Ӟаны шоръёзо школаысь тямыс классэз йылпумъяса, Можгае дышетскыны кошкем но лэсьтӥськонъя училищеез йылпумъяса, штукатур-малярлэсь ӧнерзэ басьтэм. Собере, картлы кошкыса, Курганэ улыны выжем. 1995-тӥ арын вордскем палъёсаз бертэм но со дырысен Турьяысь кошкымтэ ни. Гуртысьтызы парсь фермаын тыршем, «Ива мебель» фабрикаын но ужаса утем. Ӵапак отын дыръяз ик почтаын ужаны но кутскем. Берлогес ини воксё почтае гинэ ужаны выжем.
Бурнак но Вуж Турья — сыӵе вошъяськисьтэм маршрутъя газет-журналъёсты нуллэ почтальон. Со туж умой тодэ, кинлы но кыӵе юртэ пенсия вуттоно, кинлэсь тыронъёссэ басьтоно, кинлы выль газет-журнал пыртоно, кинэ гожтэтэн шумпоттоно.
Ужез котькуд ласянь секыт. Но со шуныт но таукарон кылъёс, кудзэ Людмила Геннадьевна калыклэсь басьтэ но кылэ, солы кужым но мылкыд сёто. Адямиос пӧртэмесь, асьсэ сямен тунсыкоесь. Ваньзы ини Людмила Геннадьевналы ас адямиосыз кадь пото вылэм. Котькуд юртын Людмила Корниловаез витем куноез кадь пумитало. Нокин понна но секрет ӧвӧл, туала дыре гуртын тросгес мӧйы адямиос уло шуыса. Соос понна Людмила Геннадьевна тужгес витьымон куно луэ.
— Кезьыт дыръя куное но ӧтьыло, чаен но сектало. Пенсионеръёс котьку шумпото, соос доры лыктӥд ке. Котькудӥныз ӧжыт ке но вераськоно, дыр но саклык висъяны тыршоно, — шуэ Людмила Геннадьевна. — Соос ведь кыӵе гинэ юанъёсын, куронъёсын уг вазисько… Бурнакын улӥсьёслэсь куддыр бигер кылэн верамъёссэс валаса уг вуттӥськы, но озьы ке но, огмес-огмы валаны тыршиськомы, нокин нокинлы вожзэ но уг потты.
Людмила Геннадьевналэн малпамезъя, пенсионеръёс — самой лыдӟись категория. Соос, Интернетысь информация утчаны дышем егитъёсын ӵошатыса, ваньмыз сярысь кагаз вылысь лыдӟыса тодыны дышемын. Соин ик газет-журналъёсты чидатэк витё. Бурнакын но Вуж Турьяын, Людмила Корниловалэн верамезъя, тросгес «Хезмэт» но «Азьлане» газетъёслы гожтӥсько. «Непоседа», «Кенеш» журналъёсты басьтӥсьёс вань, озьы ик калык тунсыкъяське сад-бакча будэтон, тазалык сярысь газет-журналъёсын но. «Азьлане» газетлэн 2022-тӥ арлэн кыкетӥ паларезлы но Вуж Турьяын кызь одӥг адями гожтӥськем.
Бусы ужъёслэн мынэмзы, лулчеберет, спорт удысысь иворъёс, огшоры гурт калыклэн улон-вылонэз сярысь но трос мукет информациез лыдӟисьёс «районкаысь» шедьтыны быгато. Соин но газетэз яратыса лыдӟо. Нош газет лыдӟись доры мед вуоз шуыса, почтальонлы трос тыршыны кулэ — газетлы гожтӥськон понна калыкез агитировать кароно, кулэстэм дунын гожтӥськон сярысь тодазы уськытоно, адямиослы газетэз дыраз вуттоно. Озьы ик ужа гуртысь почтальон Людмила Корнилова — ваньмаз вутскыны тыршыса.