Праздникмылэн одӥгез бадӟымез — со ӝук, ӝук вӧсян

Удмурт калык бадӟым саклык висъялляз музъем ужъёсын герӟаськем йылолъёслы (кылсярысь, Гершыд, Гырон быдтон, Выль нянь сиён) кудъёсыз али но вунэмын ӧвӧл на.

Тулыс бусы ужъёс бырем бере, артэ улӥсь мукет калыкъёс сямен ик, удмуртъёс Гырон быдтон йылол ортчытъяллям. Та праздник трос аръёс ӵоже асьме дорын ӧз ортчытъяськылы, малы ке шуоно, бигеръёсын ӵош улэмен, Сабантуе пыриськылӥм. Выльысь Гырон быдтон улӟиз Ӟаны, Кутэш, Кисаль удмурт гуртъёсты огазеясь «Искра» колхозын кылем даурлэн 90-тӥ аръёсызлэн кутсконаз. Нырысетӥ Гырон быдтон ик — со районысь быдэс удмуртъёслэн праздниксылы пӧрмиз, со колхоз праздник гинэ ӧй вал. Ас анайзы доры куное музэн, котырысьтымы пачыл удмурт калыкмы люкаськиз. Тунсыкъяськизы та йылолэнымы ёрос администрациысь кивалтӥсьёс но. Озьы пумен Гырон быдтон «Кенеш» огазеяськонысь азьветлӥсьёслэн тыршеменызы ёрос но республика праздниклы пӧрмиз. Со табере пӧртэм выжыё калыкъёсты огазеясь, ог-огдэ гажаны дышетӥсь, калыкмылэсь асваланзэ ӝутӥсь, вашкала но туала улонъёслэн пумиськонзылэн Быдӟым праздниксы луиз.

Праздникмылэн одӥгез бадӟымез — со ӜУК, ӝук вӧсян. Вуонояз ю-няньмы мед удалтоз шуыса, Инмар Кылчинлы тазьы вазиськылӥзы:

1. Иньмаре, козма, Быдӟым Иньмаре, Кылчин Иньмаре, ӟеч Иньмаре, му Кылчин, ю Кылчин, ӟеч шуддэ-бурдэ сёт, Иньмаре, Кылчин Иньмаре. Аминь!
Быдӟым Иньмаре, Кылчин Иньмаре, ӟеч Иньмаре, му Кылчин, ю Кылчин, пудо тӧрлыклы ӟеч сӧллык сёт, вужен буре вайиськом, вильзэ но сётысалыд ке, Иньмаре, Кылчин Иньмаре. Аминь!
(Ципья черкогурт, Вятка губерниысь Малмыж уезд, Б. Гаврилов «Произведения народной словесности, обряды и поверья вотяков Казанской и Вятской губерний», Казань, 1880 арын).

2. Вить чиньы пыр пазьгем ю-няне ӟеч мед потоз,
Выжыысеныз кутскыса йылозяз мед тысялоз!
Кизем юэд-нянед мед удалтоз!
Инмарлы тау кариськом, няньмы мед удалтоз!

Песянаелэн (1897 арын вордскемын, Ӟаны ныл) верамезъя, Гырон быдтонын пӧзьто, пе, вал я вазь кеньырен, я чабей кеньырен ӝук. Вера вал на горд ӵукиндэрен пыжем няньлэсь шукыр-шукыр сур (квас) пӧзьтэмзэс но. 
Шумпотымон, 90-тӥ аръёсы кизем тысьмы ӟечесь пушъетъёссэ сётӥз. Вашкала удмурт сямез азинтэ «Кенеш». Бадӟым тау ёрос администрацилы, культурая кивалтэтлы, кудъёсыз котькуд ласянь юрттэт сётыны дасесь.

Василий Никитин, Карек-Серма гурт