Пӧртэм буёлъёсын суредам улон сюрес

90 арес — адямилэн туж кузь но узыр сюресэз. Кыӵе гинэ дыръёс уг луо, кыӵе гинэ югдуръёсын пумиськыны уг кылды та улон сюрес вылын. Жаляса верано, вань гумырез ӵоже адями пӧртэм пумо шуг-секытъёс пыр потоно луэ, соос адямиез кыдато но азьланяз чидась каро.

Юбилярмылэн но улонэз пӧртэм буёлъёсын суредамын, соин со туж тунсыко но аспӧртэмлыко адӟиське. 

Мария Егоровна вордӥськиз Ӟаны гуртын 1934-тӥ арын. Со самой секыт вакытлэн, кышкыт дыръёслэн нылпиез луэ. Война кутскыку, солы 7 арес гинэ вал: шудо пинал дыр воштӥськиз секыт иворъёсын но ужъёсын. Война аръёслэсь вань секытсэ адӟем нылпиослэн пельпум вылазы бадӟым ныпъет усиз, аръёс ортчыса но войналэн бервылъёсыз арлыдоослэн улоназы кышкыт тодэ ваёнъёсын чузъясько. Войналэн самой бадӟым кышкытэз — матысь адямилэн пыраклы ож лудэ кылемез, пыраклы семьяеныз люкиськонэз. Нялтас вераса, пичи нылашлы атаеныз кема улыны кылдымтэ... 
Нош улон сюрессы Егор но Ольга Нарузовъёслэн туж шудо кутскиз. Семьяязы соослэн 5 кузя нылпиоссы вордӥськизы: Мария нылзы соос понна куинетӥ нылпи луиз. Бадӟым семьялэн жингрес нылпи куараосыз кузпалъёс понна шумпотон гинэ вайизы. Котькуд гуртын улон огкадь мынэ: пудо, юртъер, колхоз. Егор но Ольга озьы ик тыршизы семьязы понна. Вань кужымзэс но сюлэмзэс поныса, нылпиоссылы умой сямъёс пыӵатӥзы. Асьсэ пример вылазы возьматӥзы, кызьы семья кусыпъёсты юн возёно, кызьы нылпиосты уж борды кысконо. Анай-атаез вӧзын луыса, нылпиослэн но дуннезы пӧртэм яркыт буёлъёсын пиштӥз. Таӵе яркыт буёлъёс но жингрес куараос дуннелэсь вань чеберзэ но шулдырзэ возьматӥзы.
Ваньмыз воштӥськиз Быдӟым Атыкай ож кутскемен. 1941 ар сьӧраз басьтӥз ужась но пыкет луись воргоронъёсты, куд-ог семьяос копак нылкышноос коже гинэ кылизы. Воштӥськизы улонэз чебермась буёлъёс но. Соос пеймыт буёлъёсын тырмыны кутскизы. Сьӧд буёлэн но ӝож куараосын шобырскем шаермылы трос гинэ курадӟонъёс пыр потоно луиз, шумпотонъёссэс палэнэ карыса, фронтэ кулэ луись вузъёсты дасяса, ваньзы вормонэз матэктытон понна тыршизы. 
Совето армилэн радъёсаз Егор Тимофеевич 1942 арын басьтэмын. Кышкыт вакыт семьялэсь валтӥсь кужымзэ басьтӥз, секыт мылкыд пыӵатӥз. Ольга кузпалэз вить нылпиен кыльыса, ужлэсь но улонлэсь секытъёссэ ас вылаз басьтоно луиз. Озьы ке но, нылкышно киоссэ лэзьыны чик но ӧз малпа: нылпиоссэ пыд йылаз султытыса, шаермы понна дано адямиос карыны тыршиз. Озьы, Ольга нылпиосыз понна либатӥсь ненег анай но, пыд йылаз юн сылӥсь атай но луиз. 
Пичи Машалы школаын дышетскыны ӧз кылды. Егит нылаш юртъер котыраз юрттӥсь луиз, анаез понна зэмос пыкет, хозяйствояз вань ужъёсты лэсьтоно луиз, арлыдэз шоры учкытэк, бадӟымъёслэсь ужъёссэс но вылаз басьтӥз. Вашкала дыръёсы гуртын улон трослы секытгес вал: бадӟым хозяйство, трос нылпи, вань ужъёсты киын лэсьтоно, озьы ке но, шулдыръяськыны, ог-огенызы гуртаны но дырзы тырмиз. Вашкала дырысь самой дуноез но вожъяськымонэз — семья кусыпъёс. Макем семья бадӟым, сокем семьялэн шудэз но узыр. Сыӵе узырлыкен котькуд секыт уж но капчиен сётскиз. Мария Егоровналы дышетскыны ӧз йӧты ке но, улоназ ваньмаз вутскиз.
Война вакытысь котькуд нылпилэн кадь ик, пичи Машалэн сюлэмез но атаезлэсь бертэмзэ юн возьмаз, семьяезлэсь огазе луэмзэ витиз. Но, улон сыӵе шумпотон ӧз сёты: атаез берлань ӧз ни берытскы, 1944 арын быриз — пыраклы «егит солдат» луыса кылиз... Сыӵе бадӟым ыштон Мария Егоровналэн сюлмаз али но бышкась вень кадь пуке. 
— Али ке но син азям кадь — фронтысь похоронка лыктӥз. Отын «секыт» букваосын гожтэмын атайлэн быремез сярысь... Анай быдэс нунал вырӟытэк валесаз кыллиз. Пумозяз оскиз: кузпалэз одно ик бертоз, вордскем гуртаз, семьяез доры выльысь берытскоз. Туж секыт ивор луиз анаймы понна. Али ке но уг тодӥськы на, кытын атае ватэмын, — тодэ ваёнъёссэ улӟытӥз Мария Егоровна.
Пинал дырысеныз ик Мария Егоровна туж кылкутӥсь но шаплы нылаш луыса будӥз. Нокыӵе ужлэсь но ӧз палэнскы, ваньзэ быдэстӥз, котькуд ужзэ рос-прос лэсьтыны тыршиз.
— Гын сапегъёс но ӧй вал ми дыре, кутэн ветлӥм. Гурез эстыны пу но ӧжыт вал, уйёсы нюлэскы корано пулы ветлоно луим. Нянь, сакыр но ӧй вал. Кинъёс нянь сиыса будӥзы, соос ик кулӥзы ини, нош ми, поттурынэн но куттурынэн будэмъёс, али но улэп на, — улонэз сярысь вераз песянай. 
Зэмзэ ик, вашкалаосмы тазалыкенызы ушъяськыны быгато. Соослэн ӝӧк вылазы пайдаё сиён-юон гинэ вал, соин мугорзы таза но кужмо луэмын. Туала дыре пӧртэм химиен, пытсам интыосын будэтэм бакча емышъёс нокыӵе пайдалыкен уг шумпотто, калыклэн тазалыкез но пӧртэм эмъяськонъёсын возиське.
Паймымон кадь, кыӵе асьмелэн арлыдоосмы кужмоесь но чидасесь! Нуналлы быдэ соос юртъер котырысь ужъёсты быдэстыны, кужымзыя семьязылы юрттыны тыршо. Дано шутэтсконын луыса но, интыязы пукыны сюлэмзы уг сёты на, весь уж борды басьтӥсько. Секыт вакытэ кулонэн но кӧт сюманэн пумиськем песянайёс но песятайёс али улонзэс капчиен лыдъяло: ӝӧк вылын тыр сиён, нянь, шуныт корка, небыт валес — ваньмыз выжыкылын кадь. Туала тынӥсь улон понна соос тау гинэ каро. Сыӵе ик Мария Егоровна но туннэ нуналэзлы ӝожтӥськыны уг дырты: ваньмыз тыр, шуныт, утялтэмын, миськемын, семьяез бадӟым.
Егит дырзы сокем шулдыр ӧй вал ке но, арлыдоослэн «шундыпуксён» вакытсы туж шуныт мылкыдъёсын пачылмемын. Самой валтӥсез — соос семья пушказы гажамон но данъяськымон адямиос луо, нунокъёссы понна кулэ луись эшъёс. 
Туннэ нуналлэн шудо емышъёсыз Мария Егоровналэн шуныт сюлэмез но юн тыршемез бордысен потэ. Аслэсьтыз шудзэ егит нылаш шедьтӥз Ӟаны гуртын ик. Солэн улонысь яратонэз — Василий Егорович Терентьев (жаляса верано кулэмын ини). Егит кузпалъёслэн улонзы пӧртэм дыръёсын тырмемын луиз. Но, валтӥсез — ог-огзэс гажаса, валаса но ог-огзылы юрттыса улӥзы. Семьяязы вордӥськизы 3 нылпиоссы: Валентина (1958), Вера (1960) но Виталий (1962). 
Нылпиосыныз Мария Егоровна данъяськыны быгатэ. Соос пыд йылазы юн сыло, калык пӧлын гажамон адямиос луо. Вера нылэз трос аръёс ӵоже Красной Полянаысь «Домостроитель» комбинатлэн куасьтон цехаз бригадир луыса ужаз. Валентина туннэ нуналэ бускель Кисаль гуртын улэ. Ужез но гурт калыклы матын луись — колхозын скал кыскись. Виталий пиез азьлогес колхозын парсь фермаын ужаз, собере лэсьтӥськон ужъёсы выжиз. Котькуд нылпиез аслаз шудо семьяеныз данъяськыны быгатэ.
Быдэс улонэз ӵоже Мария Егоровна Ӟаны гуртысь колхозын пӧртэм ужъёсты быдэстӥз. Секытэз шоры учкытэк, ваньзэ дыраз, рос-прос лэсьтыны тыршиз. Со сяна, кузпалэзлы вукоын но юрттыны вутскиз. Чидась но улоназ пӧртэм дыръёсты ортчем нылкышноез зэмзэ но «Улонлэн героиняез» шуыны луэ. Сыӵе адямиос инъет кылдытӥзы туала каньыл улонмылы, соослы луыса асьмеос валаськом ужлэсь дунзэ, пайдазэ. 
Аръёс ортчо, улон ӝог вамышъёсын азьлань мынэ, валаса вуттыны ик уг луы, кызьы ваньмыз воштӥське. Вордӥське выль поколение, улонэз азинто воксё мукет дунлыкъёсын улӥсь егитъёс. Уж капчиёме, улонамы пӧртэм техникаос пыро, соин сэрен улонысь выльдӥськонъёс но юн шӧдыто: выль пыртэм амалъёсын ужано, вылезлы дышетсконо.
Туннэ нуналлы Мария Егоровналэн улонэз тынӥсь но каньыл ортче. Виталий пиезлэн семьяяз со шунытэн котыртэмын. Сое шумпотто 5 внукъёсыз но 7 правнукъёсыз. Анна внучкаез но солэн 2 нылъёсыз солы матынгес луо. Анна Витальевна — Ӟаны шоръёзо школаын биологияя но химияя егит дышетӥсь. Песянаезлэсь улон сюрессэ со умой тодэ.
Юбиляр-песянайлы, улонэз сюлмысь яратӥсь нылкышнолы но сюлмаськись анайлы сӥзиськом самой бадӟым узырлык — юн тазалык. Инмарен сётэм аръёс капчи но шудо мед ортчозы! Семья вӧзады шуныт мылкыдъёсын, сайкыт малпанъёсын трос аръёс ӵоже улыны мед кылдоз на!