Районысь хозяйствоослэн кивалтӥсьёссы пӧлысь одӥгез гинэ удмурт

«Дуслыкын» егит но опытной механизаторъёс валче ужало

Ум паймиське кадь ни, куке туала дыре егитъёс гуртэ улыны но ужаны уг кылё шуэмез кылӥмы ке. Но та туж ик зэмос кылъёс ӧвӧл вылэм. Кылсярысь, басьтом «Дуслык» обществоын ужась механизаторъёсты гинэ. Соослэн тросэз — егитъёс. Хозяйстволэн валтӥсь агрономезлэн, Сергей Чириковлэн, верамезъя но, татын егитъёс но, мӧйыос но огкадь умой показательёсын ужало. «Дуслыке» ужаны ветло куинь удмурт гуртъёсысен — Ӟаныысен, Кисальысен, Кутэшысен но одӥг бигер гуртысен — Тюнтерысен. Озьыен, ужасьёслэсь национальной состав ласянь лыдзэс но тодыны секыт ӧвӧл ни.

Районысь хозяйствоослэн кивалтӥсьёссы пӧлысь одӥгез гинэ удмурт

Со — Николай Григорьевич Колоколов. Ӟаныын вордскыса, со улонзэ али но татын ортчытэ. Туннэ нуналэ Николай Григорьевич «Дуслык» обществоен кивалтэ. Татын сое ярато, гажало, «асьсэлэн» каро. «Котькуд колхозлэн валтӥсь ужпумез — ужасьёслы умой ужан понна каньыллыкъёс кылдытон, соку ужам потыса гинэ улӥськод», — шуо татын ужасьёс.

«Кивалтӥсь луэмен, ас ужпуменым мон лыдъясько коллективлы оптимальной ужан условиос кылдытонэз», — та малпанэз юнматэ ачиз председатель но. Зэм, таӵе политикаен ужась председателез кызьы бен уд яраты? Николай Григорьевич кивалтӥсьлэсь огдырлы ужъёссэ быдэсъясь луыса ужаны одӥг ар талэсь азьло гинэ кутскиз. Но сое «Дуслыкын» кемалась тодо ини — армиын служить карыса бертэм егит воргорон нырысь кык ар Ӟаны школаын физкультурая дышетӥсь луыса ужам, собере колхозэ ужаны интыяськем ини. Ужам фермаын, парсьёсты сюдэм. Отысен выжем амбаре, итымен кивалтэм. Татын дас куать ар азинлыко ужамез бере, сое хозяйстволэн кивалтӥсезлэн генеральной директорезлэн воштӥсезлы быръё (2007-2018). Нош табере со кивалтӥсь интыын. Николай Григорьевич кивалтӥсь луыса ужаны кутскем дыръёссэ тодаз вае: «Нырысь секытгес вал — ужаны адями ӧз тырмы. Та шуг-секытэз ортчыны быгатӥмы. Туннэ нуналэ ужасьёс ласянь проблемаос ӧвӧл». Зэмзэ но, туннэ «Дуслыкын» кызьы опытной механизаторъёс, озьы ик егитъёсыз но азинлыко ужало. Кӧня ке ар талэсь азьло ужаны кутскем егитъёс пумиськыло, туэ гинэ лыктэмъёсыз но вань. Соосты обществоын шумпотыса пумитало.