Семьялэн узырлыкез вашкалаез но азьланез бордын (+фоторепортаж)

Укмыс ёросъёсысь укмыс семьяос асьсэлэн семья узырлыкенызы но вормонъёсынызы тодматӥзы. Та фестивальын Балтась ёрослэсь данзэ утизы Ӟаны гуртысь аспӧртэмлыко но тунсыко историен тырмем Апаковъёслэн семьязы.

«Эхо веков в истории семьи – Тарихта без эзлебез» – Татарстанысь архив ужъёсъя кун комитетлэн элькун фестивалез, кудӥз ортчытӥське 2019-тӥ арысен. Со люкиське куинь этаплы, кудаз семьяос возьмато асьсэлэсь быгатонлыкъёссэс но тодмато учкисьёсты калык лулчеберетэнызы. Туэ но та фестиваль аслаз радъяськеменыз, адӟем карымон семьяосын паймытӥз. 

Арысен аре фестивальлэн куронъёсыз чурытомо, семьяос но асьсэлы туж ӝужыт планка пукто, ведь соос семьязэс гинэ уг возьмато, соос быдэс ӵыжы-выжыоссэс люкало.

Родословной люкан – со туж паськыт но секыт уж. Вашкалаысь ӵыжы-выжыостэ шедьтыса, олокыӵе но дуннее вуыны луэ. Макем трос тон тодӥськод выжыед сярысь, сокем юн семьяед но луэ. Выжытэк адямилэн вуоноез но ӧвӧл. Со ик луэ та фестивальлэн валтӥсь пуштросэз – выжыостэ шедьтыса, вашкала ӵыжы-выжыостэ сӥлы карон но данъян. 
Элькунмылэн котькуд ёросэз – со аспӧртэмлыко нимысьтыз дунне, кудаз возисько но утисько калык сямъёс но йылолъёс, семья дунлыкъёс, вашкала арбериос но тӥрлыкъёс. Ортчемез ар но семьялы сӥземын вал. Быдэс ар ӵоже ёросысь яркыт но тыршись семьяосты пусйимы, семьялэсь чеберлыксэ но секретъёссэ возьматӥмы. Бен, асьмеос котьку вераськом: семья – со инты, кытын тон шутэтскиськод, кытын тон кужым люкаськод, малпанъёсыныд люкиськиськод но шуг-секытъёстэ вормиськод.  

Ӵапак сыӵе шудо семьяен возьматӥзы асьсэды Апаковъёс. Сергей но Елена Апаковъёс быдэс ёросмы понна адӟем карымон кузпалъёс. Сергей Пантелеймонович школьной автобусэн нылпиосты школае нуллэ, Елена Германовна Ципьяысь «Май» кооперативын тырше. Соослэн куинь нылпизы: Людмила, Леонид но Лиана. Кык бадӟымъёсыз ини асьсэос семья кылдытыса уло. Людмила Казаньын, нош Леонид одӥг гинэ пи луыса, гуртаз ик семьязэ утьыса возе. Лиана 8-тӥ классэ йылпумъяны дасяське. Соослэн ӝуась синъёссы но каньыл сямзы бордазы кыске, сокем шудо но бадӟым соослэн семьязы. Соослэн выжыязы кин гинэ но ӧвӧл: удмуртэз но, порез но, ӟучез но, бигерез но. Ваньзэ сое сцена вылын адӟыны луиз. 

Нош тодӥськоды-а тӥ, Апаков фамилия бигерысь потэмын шуыса? Со «юг-юг» тӧдьы шуэмез валэктэ вылэм. Зэмзэ но, юг-юг чылкыт малпанъёсын, ас кужыменызы тыршемзэс котькудӥз синйылтӥз. Со сяна, туала дыре Апаковъёслэн ӵыжы-выжыоссы быдэс дуннее вӧлскемын ини, соос пӧртэм удысын тыршо но пӧртэм ужъёсын выро. Узыр выжыё но историё семья ёросмылэсь гинэ данзэ ӧз утьы, нырысь ик семьялэн выжыез элькун уровене ӝутӥськиз, удмурт калыклэсь паськыт сюлэмо но эшлыко мылкыдо луэмзэ возьматӥз.

Шумпотымон, таиз зона трос йӧскалыко луиз: удмуртъёс но, ӟучъёс но, крашинъёс но, бигеръёс но огазе люкаськизы. Арча, Атня, Балтась, Высокой Гора, Кукмор, Мамадыш, Пестрецы, Саба, Тюлячи ёросъёсысь семьяослы кык люкетлы дасяськоно вал. Нырысетӥез – калык но семья сиён-юонъёслэн адӟытонзы. Татын котькуд ёрослэн кыӵе ке аспӧртэмлыкез луиз. Удмурт семьяосты соку ик перепечъёсын, камалиен тодманы луиз, крашинъёс аспӧртэмлыко дӥськутэнызы но калык дӥськутэн чебермам мунёоосынызы висъяськизы, ӟуч семья окрошкаен куноятӥз, нош бигеръёс тальянэнызы но дано чак-чакенызы пусйиськизы. Адӟытон зэмзэ ик туж тунсыко луиз. Жаляса гинэ верано, интыез пичи луэмен, пыриськисьёслы омыр ӧз тырмы, сокем ваньмыз адямиен тырмиз. 

Адӟытон бӧрсьы эшшо но тунсыко люкет кутскиз. Семьяос асьсэлэсь визитной карточказэс возьматӥзы. Ёрос этаплэсь соос висъяськизы, тросэз семьяос кыӵе ке тупатонъёс пыртӥллям. 

– Та фестиваль зэмзэ но туж бадӟым историен тырмемын. Арысь аре выступлениос яркытгес но яркытгес луо, жюрилы шуггес ини вормисьёсты бырйыны. Макем трос уж лэсьтэмын шуыса адӟиське. Та ваньмыз поколениысен поколение выже. Та конкурсэ пыриськыса, солы дасяськыса, нылпиосты но тӥледлы юрттыса, выжыенызы тунсыкъяськыны кутско. Мед соос кыӵе ке люкетсэ гинэ лякыло, мае ке пусъё, кыӵе ке технической люкетъёсты быдэсто, со ини возьматэ, нылпи та уже басьтӥськемын шуыса. Озьыен, соослэн пушказы инъет кылдэ, кытын соос уло, кин вал соослэн ӵыжы-выжыоссы. 

Озьы ик асьмеос ӵемысь вераськом: егитъёс дор палъёсазы мед бертозы вал. Нош доре берытскиськод соку, ку тон вордскем палъёстэ яратӥськод но гажаськод. Семьяосты пыр дышетэ нылпиостэс яратыны но гажаны пичи шаердэс. Нош семьяын котьку «татчы гинэ эн кыльы, кошкы татысь» шуыса верало ке, асьмеос одӥг гуртэз но утьыны ум быгатэ. Кылем арын 3 интыен Тетюши ёросысь семья пусйиськиз. Та гурт табере одӥг бадӟым семья луиз ини. Со тӥни 2-3 кышномуртъёс гуртэз выльысь улӟытӥзы, кылдытӥзы шуыны луэ, – тазьы вазиськиз учкисьёслы Элькунысь архив ужъёсъя кун комитетлэн кивалтӥсез Гульнара Габдрахманова. 

Зэмзэ но, туж шонер кылъёс. Кӧня сыӵе гуртъёс пыраклы быремын ини? Кӧня мында гуртъёсын пересьёс гинэ кылемын? Каллен ворсасько пичи школаос, ужамысь дугдо лулчеберетъя юртъёс, центръёс, пичиесь магазинъёс. Нош сыӵе мерлыко зданиос борӟасько ке, со гуртлэн быремезлэн нырысетӥ тодметэз луэ ни ук. 

Сюлмысь ӟечкы-ласьком Апаковъёслэсь выжызэс яркыт но лад-лад выступлениенызы. Сӥзиськом соослы азьланяз но семья шудбур, кужым но котькуд вожвылъяськонын вормон. 

Элькунамы таӵе задор мылкыдо, каньыл сямо семьяос луизы ке, оскон юнма, гуртъёсмы арысь аре ӝужалозы гинэ шуыса. Со понна ик кылдытӥсько таӵе вожвылъяськонъёс, кудъёсыз юртто ӵыжы-выжыосты шараяны, мургес тодматскыны семьялэн историеныз. Мед пушъёзы семья писпуос, мед азинскозы выжыос.