Сезьпизьлэсь шӧмзэ тодэ вайытӥсь пумиськон

Котькудӥз сямен аслаз «пуртыяз пӧзьыса» улэ. Соин сэрен арысь аре, нуналмысь нуналэ ог-огмылэсь палэнскыса, ят луыса мынӥськом. Оло, соингес, оло ӧй тод нош малы? — именикъёсы я юбилейёсы люкаськыкумы, мылкыдъёсмы, кырӟаса пукымон, усьтӥськыса уг вуыло. Кырӟаськомы ке но, ӵемысь мылкыд куремъя ӧвӧл, огшоры — кулэысьтыз гинэ. Бен, одӥг асьмеос гинэ ӧвӧл, быдэс Россия таӵе югдуре вуэмын кадь...

Тани таӵе мӧзмыт пеллясь тӧлэн нюръяськыса, ми нош ик пумиськимы.

Ми со — Дурга, Кӧргем, Киськем, Сэрья гуртъёсысь эшъёс-юлтошъёс, ӵош дышетскемъёс, ӵыжы-выжыос. Пумиськонамы-тылскемамы шунаськиз 14-15 аресысен 70 аресозь ог 70 мында мурт. Пумиськонмы ортчиз 24-тӥ феврале Дурга культура юртын. Сӥземын вал со анай кылмес, культурамес утён-азинтонлы. Кузёосмы, милемыз, куное лыктэмъёсты, туж шуныт-шулдыр но капчи мылкыдъёсын пумитазы, котькудмес матын карыса ӟыгыртыса но басьтӥзы. Ог дышем сяммыя, ог-огмылы  но гурт калыксылы кузьмамы дасям-ваем «кузьымъёсмес» — сцена вылын возьматӥмы эктон, кырӟан но веран удысъёсъя быгатонлыкъёсмес. Тапал калыклэсь куспазы тупаса-эшъяськыса улэмзэс данъяса, кузёосмы: киськемъёс, кӧргемъёс, дургаос сцена вылын бигер, крашин, пор но удмурт крезьгуръёсъя эктӥзы, кырӟазы. Мӧйы калыкез та пумиськон, зэмзэ но егитомытӥз кадь. Егитомеммы тужгес но синме йӧтӥз, 70-тӥ арлыдаз вуэм, Шакаев Герман Ивановичлэн но соин ӵош эктонэ пыриськем мӧйыосъя. Кыӵе соос экто мылысь-кыдысь, арлыдзы шоры учкытэк поръяло! Чузъяськизы Дурга культура юртлэн директорезлэн — Татарстанысь культура удысысь дано ужась нимозь ӝутскем Николай Александрович Алексеевлэн лул-сюлмаз вордскем кырӟанъёсыз но. Озьы ик, сюлэм пыдсысьтыз омыръяса, радэн-радэн чуръёсы сузьылыса пӧрмытэм ас кылбуръёссэ лыдӟиз Полина Валентиновна Поликарпова. Пумиськон ӝытмес мур пуштросъем но ог-огмес эшшо но матын карыса, туж быгатыса нуиз Татарстанысь культура удысысь дано ужась Фирдания Ахатовна Алексеева.

Милесьтым но саламмес кузёосмы туж кельшытӥзы: шоро-куспо арлыдъем апайёс «Сырья зоутъёс» но мӧйыосты огазеясь «Табань» коллективъёсмылэсь эктонъёссэс, кырӟанъёссэс кужмо кичабонъёсын дунъязы. Люкаськем калыклэсь мылкыдзэ бугыртӥз Николай Иванович Плотников — вашкала зоутъёсты кубызэн шудыса бурдъяменыз. Малпасько, таӵе пумиськонъёс но пӧртэм фестиваль-конкурсъёс аркаын, азьланяз кубызчиослэн лыдзы йылыса мыноз шуыса. Озьы медло!

Кырӟанъёсмы мылысь-кыдысь ӧръяськизы на тыр ӝӧк сьӧрын. Кузё котькудӥз но ӧтем кунозэ маин ке но паймытыны-шумпоттыны выре. Татын но озьы ик луиз — ӝӧк пыдъёс чидантэмесь вал пӧрам-дасям сиён-юонъёслэсь. Маиз но ӧй вал отын! Эксэйлэсь эшдярзэ, оло, куное витиллям, кожалод! Но... ӧйтод, мукетъёс кызьы, дыр. Мон ӧй паймы королевской сиён-юонъёслы, угось солы дышемын ни ваньмы но. Пайми... ӝӧк вылысь сезьпизьлы! Вашкала сямен, пыр-пыр карыса лэсьтэмын, ымын сылэ! Пайми та вунэм сиёнлэн пӧрасезлы — Колесникова Розалы но солэн ранӟытскымтэезлы! Нош ужез кӧня солэн! — йыдыез, чабеез, яке сезьыез миськыса, нырсатоно, шунды бамын куасьтыса, изоно. Кыльзэ-кыдзэ шер пужен пужноно. Собере ини коть толбыт гусъяськы, быректэм вуэн суралтыса, вӧй, сылал ватсаса, коняло-юмало шӧмо, ымын сылӥсь сезьпизен! Соин кунояськыса, амалтэм пичи дырмы тодамы куриськиз. — Ӵукна султыку корка пачыл ческыт зыныз вӧлмемын! Чай юыны няньлы ёрмылыку, оло нарош пичи экеоссэс шумпоттон вылысь, анайёсмы сезьпизь шуккыло вал. Кыӵе бен ческыт вал со! Чай юэм сяна, эшшо, киын кырмаса лэсьтэм, кык-куинь колӟоен ураме вамыштӥськом. Отын, ӟольгырипиос сямен, ӟабыльтыса, сезьпизь сиыса, кужым люкаськом-будӥськом...

Тӥни сыӵе тодэ-ваёнъёсы вуттӥз таиз пумиськонмы. Бурдъяськем мылкыдмы понна, ми, сэрьяос, тау кариськомы асьык мылкыдо кузёосмылы: Фирдания Ахатовна но Николай Александрович Алексеев кузпалъёслы но соосын огкылысь тупаса-эшъяськыса улӥсь Киськем, Кӧргем, Дурга калыклы!

Леонид Сапожников