«Шумпотӥсько, Сизнер гуртысь яратонме шедьтӥ но татчы картлы кошки шуыса», — Людмила Тарасова

Ӵапак та гожтэмелэн героез но сыӵе ик. Йӧно, капчи мылкыдо, ужась, тыршись. Нылпиоссэ сюлмысьтыз яратӥсь анай, дуно кузпал, оскымон эш. Со борды кыстӥське гурт калыкез, ӵем вуыло куноосыз. Та — ваньмыз ласянь ушъямон но адӟем карымон нылкышно — Людмила Кузьминична Тарасова сярысь.

ЛЮДМИЛА КУЗЬМИНИЧНА — ӦЖЫТАК АЧИЗ СЯРЫСЬ

Людмила Кузьминична 1980-тӥ арын Кускем гуртын вордске. Трос нылпиё семьяын будэм ныл пичи дырысеныз котькыӵе ужез быдэстыны быгатыса будэ. Анаез висемысь пичиысен ик со интые фермаын пудо утисьлэн юрттӥсез луыса но ужаны тупа Людмилалы. 1996-тӥ арын Кӧргемысь фермаын ужа но, одӥг арскын дышетскыны кошке.

— 1997-тӥ арын Бадӟым Атняын Тукаевской совхозын бухгалтер-экономистлы дышетски. 1999-тӥ арын сое горд дипломен йылпумъяй.

Вуоно кузпалэным, Виталиен, 1997-тӥ арын, Ципьяысь Сабантуй праздникын тодматски. Ачиз монэ адӟыны, монэным тодматскон понна празднике лыктӥз ке но, возьдаськыса ӧз но вазьы, ӧм но вераське. Нош со ӝытаз ик милям гуртамы мынэсьтым азьло мыныса вуэм вал ни, — серекъяса тодаз вае тодматскем нуналзы сярысь Людмила Кузьминична. — Мон дышетскисько вал бере, туж ӵем дорам ӧй бертылы, соин Виталий мыным гожтэтъёс гожъяз, кыӵе шумпотыса витисько вал гожтэтъёссэ. Гуртэ бертыкум, маин быгатӥз соин мон доры лыктэ вал. Тӥни сыӵе романтика.

1999-тӥ арын Людмила дышетсконзэ йылпумъя но, яратӥсьёс паръясько.

СКАЛ КЫСКОН УЖ — СЕКЫТ КЕ НО, КЫШКАМОН УЖ ӦВӦЛ

Со арын ик Людмила Кузьминична Сизнер гуртысь ошак фермае ужаны интыяське. Кӧня ке ар ортчем бере, 2003-тӥ арын, Смаильын доярка луыса ужаны кутске. Тани мар вера со ачиз ужез сярысь:

— Мон ӧнерлы янгыш дышетскиськем, дыр. Ужтэк пукыны мон уг быгатӥськы, уг яратӥськы. Мыным котьку маин ке но выроно. Фермаын мон асме шедьтӥ, — шуэ Людмила. — Тани Смаильын скал кыскись луыса ужамелы но 17 ар луэ ни туэ. Кин ке вералоз, туала дыре скал кыскисьлэн ужез капчиёмиз шуыса. Уг тодӥськы, луэ-а меда сое капчи шуыны. Азьло ведраен ветлоно ке вал, табере аппарат тыроно. Нош карусель весь берга. Дугдытэк берга. Соин капчигес луиз шуыны шонер уз луы, дыр. Воштӥськиз ужмы, таиз зэм. Озьы ке но, аслэсьтым ужме туж яратӥсько. Жадемме но уг шӧдӥськы. Жадён со доре бертэм бере гинэ шӧдӥське вылэм, куке тон вань уждэ йылпумъяса шутэтскыны пуксиськод...

Кылем арын Людмила Кузьминична туж кужмо висем вылэм. Ачиз гинэ тодэ, макем секыт луэм солы соку. Аслаз верамезъя, бурмем бераз со туж умой валам: макем бадӟым шуд вылэм со — Инмарен кузьмам улон. Табере, шуэ, нуналлы быдэ шумпотыса султӥсько, семьяе дорын шуыса пальпотӥсько. Инмар юрттэ, дыр, шуэм кылъёсыныз но соглаш. Людмила Кузьминичналы шумпотон понна, шудо луон понна трос кулэ ӧвӧл: ачиз азьын пуктэм планзэ быдэстӥз ке, нылпиоссэ но кузпалзэ ческыт сюдӥз ке, со каньыл луэ. 

Та сярысь пыр-почгес «Азьлане» газетысь лыдӟыны быгатоды.