Сиён но пӧзьтэ, вуриське но

Куинетӥ разрядо сиён пӧзьтӥсь луыса дышетсконзэ йылпумъя, соку ик куинетӥ разрядо вуриськись но луэ. Ужан сюрессэ «Балтач» предприятиын мытэ. Нош 2008-тӥ арысен кутскыса реабилитацияя «Наз» центрын няня луыса ужа. Дас арлэсь тросгес ини та ужын тырше. Ужаны яратӥсь, котькыӵе ужлы усто луэм Елена Евгениевна аслыз оскем ужпум шоры туж кылкутыса учке, валче ужасьёсыныз но умой кусыпъёс возе, клиентъёсыныз кусыпъёсыз сярысь веранэз но ӧвӧл — небыт учкеменыз, шуныт кылыныз ас бордаз кыске. Саклык висъясь, радлыкез гажась луэмез понна сое эшшо но матын каро. Соин ик клиентъёсыз Еленалэсь смена вуэмзэ витё. Дас ар ӵоже кивалтӥсьёслэн но, клиентъёсызлэн но со ласянь урод кыл верамзы ӧвӧл. Сое котьку ушъяло гинэ.
Елена одӥг интыын гинэ пукись адями ӧвӧл, тодон-валанзэ ялан будэтон бордын ужа, выль амалъёсты ужаз кутыны тырше. Арлы быдэ туж активно пыриське пӧртэм акциосы. «Писпуос мерты!», «Георгиевской лента», «Макулатура люка!» выллем акциос огез но Еленатэк уг ортчо. Сыӵе тӥни визьмо, шонер визьнодам, адямиосты гажаны быгатӥсь, усьтэм мылкыдо специалист со Елена Евгениевна.