Сюлэмъя но мылкыдъя быръем ӧнер

Тренер — со трос урдэсъем ӧнер, кудӥз спортысь азинсконъёсын гинэ уг тырмытскы, эшшо дышетӥсьлэсь но психологлэсь ужъёссэ ас пӧлаз басьтэ. Зэмос тренер вань сюлмыныз дышетскисезлэн быгатонлыкъёсызлы оске. Соин соос понна 20 ар пала ини нимысьтыз нунал но быръемын.

Асьме ёросамы но тренерлэн ужез туж кылкутымон луэ. Берло аръёсы спорт юн вамышъяса калыклэн огшоры улоназ пыриз. Спортэн тунсыкъяськисьёс но спортэн улонзэ герӟамъёс понна ёросамы пӧртэм луонлыкъёс кылдытэмын: троспӧртэмлыко спортивной зал, «Дулкын» бассейн, спортивной центръёс, егитъёс понна спортивной центр, егитъёслэн «Хыял» центрзы, футбольной площадкаос, со сяна школаосын дышетскисьёс понна спортивной залъёс ужало. Та ваньмыз тренеръёслэсь устолыксэс возьматон инты.

Тренеръёсмы будӥсь поколенилэн тазалыкез кулэ уровеньын мед луоз шуыса ик тыршо ёросысь тренеръёсмы но. Азинсконъёссы но шӧдскымонэсь: Балтась ёрослэн нимыз пӧртэм масштабо ӵошатсконъёсын аслэсьтыз дано интызэ басьтэ.

Туннэ тӥледыз одӥгеныз сыӵе ӟырдыт сюлмын ужась егит тренерен тодматэме потэ — Андрей Валентинович Степановен. Ньыль ар ӵоже со пиналъёсты уяны дышетэ ини. Кызьы солэн улонэз герӟаськиз уянэн, кыӵе солэн малпанъёсыз — ваньмыз та шараяськоз вераськонамы. 

— Нырысь ик кӧня ке ачид сярысь вера али.

— Мон вордӥськи 1999 арын 17 инвожое Гондыргуртын. Нырысь тодон-валан басьтӥ Ярак-Чурмаысь покчиёзо школаын, собере дышетсконэ Покчи Лӧзя гуртысь шоръёзо школаын азьланьтӥськиз. 9-тӥ классэз йылпумъяса, Ижевскысь биатлонъя центре дышетскыны пырыны малпасько вал, пӧртэм мугъёс кылдэмен, та малпанэз улонэ выжтыны ӧз кылды. 10-тӥ класс бере ини Арчаысь педагогикая колледже дышетскыны пыри. Татын мон ньыль ар дышетски. Колледжез йылпумъяса, физической культурая но спортъя дышетӥсьлэсь ӧнерзэ басьтӥ. Та мыным туж тупась удыс луиз, малы ке шуоно мон пичи дырысен ини спортэн тунсыкъяськисько, тужгес ик куасэн бызьылыны кельше вал. Собере ас мылкыд каремея армие кошки, службае Оренбург улосвылысь Тоцк городын ракетной войскоосын ортчиз. Служба дыре ик дышетскыны пыри Набережной Челныысь кун университетэ физической культурая но спортъя дышетӥсьлы, татын вить ар дышетски но вылӥ тодон-валан басьтӥ.

— Туала вакытэз лыдэ басьтыса, пӧртэм малпанъёсты кылзыса, армиын служба кулэ-а туала егитъёслы? 

— Ачим сярысь ке верано, мае мон валай армиын луыса: дорад тынад нимыд вань, тон кинлэн ке пиез, агаез, дышетскисез, эшез, тодмоез, нош армие мынӥськод но, тон отын нокин, ӟучъёс верамъя «ты никто и звать тебя никак». Тон ваньмыныз огкадь, тыныд астэ возьматыны кулэ, мукетъёсызлэсь ӝоггес валано армилэсь пуштроссэ. 

Армия — со кышкыт ӧвӧл, татын тыныд нырысь ик кытчы вуэмдэ валано. Одӥг ар ӵоже тон пи коллективын улӥськод, верам кылъёсыд понна кылкутыны быгатоно, малы ке шуоно кылэд огшоры тӧлъя луиз ке, тынад статусэд но усе. Сямыд одно ик юнма татын. Ма, котькуд коллективын юнма ини со. Котькуд интыын шуг-секытъёс вань ук. Армия — со эшшо но бадӟым стресс. Татын тынад ӵыжы-выжыосыд, тодмоосыд, эшъёсыд но ӧвӧл, тон уд быгатӥськы вань шугъяськонъёсты вераны. Армиын тынад матысь эшъёсыд гинэ луыны быгато, кудъёсыныз тон весяклы юн герӟаськемын луиськод. Тани ми но ӵем гинэ вераськиськом, пумиськиськом но. 

— Кызьы огдыре армиын служба ортчыны но, университетын дышетскыны но луэ?

— Ваньмыз адямилэсь потэ ук. Мылкыдэд луиз ке, гурезез но берыктыны луэ. Одӥг ар дышетсконме дистанционно ортчи, дышетӥсьёс но пумит ӧй вал, военной частьлэн кивалтэтэз но поддержать кариз. Татын нырысь ик адями азяз нимысьтыз ужпум пуктыны кулэ, собере аслэсьтыд кужымдэ уж вылын эскериськод ини.

— Шоръёзо тодон-валан басьтэм бере малы вӧзаз вылӥ образование кулэ вал? Аслад мылкыдэд яке куронъёслы тупатсконо луиз-а?

— Мынам котьку мар ке выльзэ тодэме потэ. Со тынад азинскон сюресэд, тынад квалификациед, ужын котьку выльзэ, умойзэ пыртэм потэ. Туала улон туж ӝог ортче, туннэ одӥгез азьпал радэ потэ, ӵуказе воксё мукетыз валтӥсь луэ. Соин макем адями тросгес тунсыкъяськыса улэ, сокем со улонын шудогес луэ кадь потэ.

— Кытын но кызьы кутскиз ужан сюресэд?

— Армиын службаме ортчытыса, 2020-тӥ арын Балтасьысь гимназие физической культурая дышетӥсь луыса интыяськи. Огвакытэ мыным ӵектӥзы бассейнэ тренер луыса асме эскерыны. Татын одӥг тунсыко историез вераме потэ вал. Арчаын дышетскыкум, ми практика ортчылӥм. Мынам со бассейнын ортчиз. Соку тренере — Гузель Марсовна — мыным вераз: «Тон азьланяз одно ик уянъя тренер луод, тынад тодон-валанэд но тупа, быгатонлыкъёсыд но вань та ӧнерын». Бассейнын ужаны кутскем бере ини, кык ар ортчыса, аслам командаеным ӵапак Арчае ӵошатсконъёсы ветлыны тупаз. Соку Гузель Марсовна шуиз ини: «Мон тыныд верай ук, кофелэн пуксем напез вылын тунамын кадь. Мон тодӥсько вал озьы луоз шуыса». Тӥни сыӵе серемез поттӥсь учыръёс но луылӥзы. 

— Малы тынад быръёнэд уянъя ӧре усиз? Куасэн тунсыкъяськиськод вал бере, капчигес ӧй луысал-а куасэн тренер луыны?

— Нырысь ик мон циклэн ортчись спортъя ӧнерчи луисько, татчы пыро уян, бызьылон, куасэн бызьылон, велосипедэн ворттылон, спортивной амалэн ветлон. Мон та методикаез ас вылам шӧдӥ, мон валасько солэсь пуштроссэ. Одно ик, капчигес луысал ужме куасэн герӟаны, но со дыре ёросамы инты ӧй вал. Кылдэмез озьы луэм, дыр, уянъя тренер луыны. «Всё, что происходит только к лучшему» — сыӵе девиз туж тупа татчы.

Озьы мон вуи уянэ. Вань процессэ валасько вал ини, мыным техникая тодон-валанъёсме гинэ будэтоно вал. Опытэ но ӧй вал, соин котькуд нунал тренировкаос бере уйёсы ас вылам техника амалъёсты быдэстӥсько вал. Со сяна книгаосысь но трос гинэ материал лыдӟылӥ. Пӧртэм дэмланъёс вал уж пумысен, но сюлэмы интызэ шедьтӥз. Кужым но трос гинэ сётэмын, мыным та уж кельше.

— Ньыль ар ӵоже огдышем сямен ужан шӧдӥське-а? 

— Мынам котькуд ужан нуналэ аспӧртэмлыко. Котькуд нунал мар ке выльзэ тодӥсько, кыӵе ке ӧрын ужме азинтӥсько. Школаын ужаса, мон кӧня ке статистика но лэсьтыны быгатӥсько ини. Школае 30 процентэз сиськыны лыктэ, 30 процентэз шудыны, 40 процентэз гинэ дышетскыны. Мыным та воксё уг кельшы. Мон сыӵе адями: пуктэм ужпумез быдэстон понна туж вылӥ куронъёс пуктӥсько. Соин мон асме тренерен гинэ адӟисько. Татын мынам луонлыке вань бырйыны зэмзэ ик тыршись нылпиосты. Азьланяз мон соосын азинлыко ужаны быгатӥсько. 

— Кызьы ортчытӥське сыӵе быръён, огъя тренировкаос? Уяны дышетскыны мылкыд карись нылпи тон доры лыктыны быгатэ-а? 

— Нимысьтыз дышемъёс кулэ ӧвӧл. Котькуд адямилэн вань вить ӟечлыкез: кужым, лэйкытлык (гибкость), чидан, ӝоглык, чырткем луон. Татчы валанлык но пыре али. Нырысь ваньзэ оглом учкисько. Кылсярысь, кызь нылпи пӧлысь кудӥзлэн трослы вылӥ верам ӟечлыкъёсыз вань, со вылӥгес азинсконъёсы вуоз. Мон ваньзылы огкадь тренировка лэсьтӥсько, но кин ке азьпала кошке, кин ке берлань кыле. 

Ужаны кутскыку, мынам куинь группа вал. Соос пӧлын коньдон тырыса дышетскись группа но вал. Татын школаын кадь ик классысен классэ выжон вань. Котькуд ар нылпи лыктэ но норматив быдэстэ, мукет араз нош ик норматив быдэстэ, соя йылпумъян лэсьтӥське, вань-а нылпилэн азинсконэз. Школаын дунъет тыриське ке, милям со норматив быдэстэмын яке ӧвӧл. Со пуктэм нормативез нылпи уг ке быдэсты, группаысь куштӥське. 

Тренировочной процессэз корка ӝутонэн ӵошатыны луэ. Азьло ик корка пуктон понна инты быръёно, татын но азьло нылпиез учкиськом, кыӵе солэн быгатонлыкъёсыз, луонлыкъёсыз. Собере фундамент пуктӥськом. Милям со — тодон-валан сётон. Одӥг тренер но аслыз изъян лэсьтыны уг тыршы, со ваньзылы огкадь тодон-валан сётэ. Со инъет луэ, собере ваньмыз нылпилэсь гинэ потэ, кызьы со сётэм тодон-валанъёсты улонын кутэ.

— Кызьы тынад оглом ужан нуналэд радъяське?

— Мон ужасько нуназе 2 часысен ӝыт 7-озь. Шутэтскон нуналэ — понедельник. Валтӥсь тренировкаос бере нимысьтыз тренировкаос вань, татчы бадӟымъёс но, пичиос но пыро. Гожтӥськыса кин вуэ, солы ик черод. Туннэ нуналлы со туж бадӟым. Эшшо вылӥяз пӧртэм документациосты но радэ пыртоно, соослы но нимысьтыз дыр кулэ. Нунал ӝог ортче. 

Со сяна милемлы ӵошат-сконъёсы но дасяськоно. Отчы но шӧдскымон расходъёс поттоно. Одӥг стилен ӵошатсконэ пыре ке нылпи, со понна ачиз ик взнос тыре, милям нимысьтыз кузьымъёс ӧвӧл. Кытын ке пичияк шудон гинэ сётыны быгато. Яра али ёросын спонсоръёс вань, соос кӧня ке коньдонэн юртто, пиналъёсты кӧня ке но шумпоттыны луэ. 

— Анай-атайёсын кызьы уж нуиське?

— Ми дышетӥсьёс кадь ик анай-атайёсын юн кусып возиськом. Кызьы верай вал ини, пӧртэм ӵошатсконъёсы мынон-ветлон, отчы пыриськон — со дунтэм ӧвӧл, со понна анай-атай дун тыре. Та интыын сюлмысьтым таукарон кылъёсме анай-атайёслы вераме потэ. Соостэк милям номыр ӧй пӧрмысал. Нылпилэн вормонэз — со нылпилэн, тренерлэн но анай-атайлэн одӥг пала учкыса ужамзылэн бервылэз. Котькыӵе ужын пыкет кулэ, мынам валтӥсь юрттӥсьёсы со — анай-атайёс, котькуд ужын соос вылэ пыкиськыны быгатӥсько, соослы бадӟым оскон. Ваньмы ӵошен гинэ асьмеос бадӟым кужым луиськом, со кужымез мон шӧдӥсько но юнгес кырмиськыса ужаны тыршисько. Одно ик луо сыӵе дыръёс, куке анай-атайлэн нылпизэ уянэ сётыны мылкыдэз вань, нош нылпилэн ӧвӧл, соку ини вераськоно луэ. Но нырысетӥ тренировка бере нылпиос мукетъёсаз но лыкто, пырисько. Ӝыны арез соос понна секытэн сётӥське, татын нагрузка бадӟым луэ, бассейн гинэ ӧвӧл, зал но вань, татын упражнениос, растяжкаос лэсьтоно луэ. Со сяна кроссъёс бызьылӥськом, пиосын футбол но шудӥськом.

— Туннэ нуналлы тон ужад астэ каньыл шӧдӥськод шуыны луэ, иське?

— Уже тунсыко, аспӧртэмлыко. Быръем ӧнерме яратӥсько но данъяськисько дышетскисьёсылэн вормонъёсынызы. Азьланяз но вылӥ бервылъёсы гинэ вуом шуыса оскисько. Ёрослэсь данзэ пӧртэм пумо ӵошатсконъёсын утьыны быгатӥськом.

— Уян спортэн пыр-поч эшъяськон понна кӧня коньдон кулэ?

— Та висъяськыны быгатэ арберилэн ӟечлыкезлэсь. Макем умойгес но ӟечгес арбери басьтӥськод, сокем кемалы со тырмоз. Огъя басьтӥд ке, ӟечлыко тӥрлыкъёсын валче со 200 сюрс пала луоз. 

— Маин аспӧртэмлыко но пайдаё уян?

— Нырысь ик милям спортмылэн секытэз — мукет сфераын луон. Тани асьмеос али атмосфераын пукиськом, нош уяны пыриськом гидросферае. Татын физикалэн воксё мукет кужымъёсыз ужало. Соин милемлы физикаез но туж умой тодоно на. Ми доры ветлӥсь нылпиос биология, физика предметъёсысь пӧртэм люкетъёсаз университетэн ӵошатымон вылӥ тодон-валанъёсын висъясько. 

Кыкетӥез — та самой кышкыттэмлыко спорт. Татын гинэ 90 процентлэсь трос быгытъёс (мышцаос) ужало. Мукет спортын таӵе показательёс ӧвӧл. Уянын сюрлые но бадӟым нагрузка уг сётӥськы, пыдъёс но шутэтско, малы ке шуоно тон мукет сфераын, эшшо ке ӵошкинэс (горизонтальной) интыын. Нылпиос шонер пуктэм техникаен кык час пала уямзы бере кӧнялы ке будыны но быгато. Сюбегатэм луонлыкъёсын адямиослы но уян туж пайдаё. Анайлэн мугораз но нылпи азьвыл вуэн тодматске ук.

— Тренер понна тужгес кулэ луись сямъёс..

— Та туж тунсыко но мал-паськытӥсь юан. Соку ик вераны уз луы, дыр. Одӥг кылын вераса, тренер — тренер луыны кулэ. Солэн вань кадь сямъёсыз кулэ. Тренер нылпилы анай-атайлэсь но матын луэ. Нылпи дораз ноку кыӵе ке шонерзэ уз вера. Спортсмен пушказ кыӵе ке кужымъёсын нюръяське ке, солы туж секыт луоз вормонъёсы вуыны.

Тренер — спортын воштонтэм адями.

Самой дано спортсмен вӧзын одно ик сылэ адями, кудӥз сое нуэ, кин солы кенеш сётэ, кин со сярысь уй но нунал малпаське. Сыӵе адямиос куддыр спортсменлэн вормемез сэрен палэнэ кылё, но соос спортсменэз дано интые поттон понна бадӟым люкет пырто.
Андрей Валентиновичлы но вань тренеръёслы бадӟымесь вырйылъёсы вутскыны сӥзиськом. Сюлэмъя быръем ӧнерды улонады шумпотон но шуд гинэ мед ваёз!

Туспуктэмъёс: А. Степанов