«Сюрес усьтӥське мынӥсьлы…» (2 люкет)

Берпуметӥ гырлы куара — вань дышетскисьёс понна туж кема витем праздник.

Ӟаны шоръёзо О.Н. Исаев нимо школаын 3 дышетскись, кивалтӥсьсы — Анна Витальевна Григорьева — биология но химия предметъёсъя дышетӥсь.

Кыкетӥез вераськонэ О.Н. Исаев нимо Ӟаны шоръёзо школаысь 11-тӥ классын дышетскись Ульяна Евдокимоваен (2 туспуктэмын паллянысен нырысетӥез) ортчиз. Та нылаш вань дышетскон сюрессэ «наукалэсь гранитсэ» пумаз йырйыса быдтӥз малпасько. Визьмо, куасэн бызьылӥсь, малпаськись нылаш.

— Кызьы тынад ортчизы дышетскон аръёсыд но кыӵе мылкыдъёсыд али?

— 11 ар дышетскон вакыт мон понна вунонтэм луизы. Та дыр ӵоже мон тросэзлы дышетски: кылъёзъёсысен, лыдъянысен кутскыса, проектно-исследовательской ужъёс гожъянозь, секыт математической задачаосты пумаз-йылаз поттонозь. Тау шуэме потэ дышетӥсьёсылы, соос мыным юрттӥзы материалъёсты дышетыны, секыт заданиосты сэрттыны-пертчыны. Ма веранэз, вал сыӵе вакытъёс, куке ваньзэ куштэме потылӥз, соку дышетӥсьёс но тыныд пумит сыло кадь потэ вал. Таӵе вакыт туж секыт йӧтӥз, но вазь-а, бер-а, сыӵе дыръёс быризы но школа улон аслаз ӧраз берытскылӥз. Вань дышетскон вакытэ мон трос пӧртэм конкурсъёсы пыриськылӥ, ӵемысь призо интыос но басьтылӥ. Та дырез эскерон, шумпотон, стрессовой но вормон вакыт шуысал, ваньмыз та узыр уникальной опыт луэ, кудӥз мыным тодон-валан гинэ ӧвӧл, дуно улон урок но сётӥз. Школаез йылпумъян пумысен али мынам кык пӧртэм мылкыдъёс: огласянь, туж шумпотымон, улонысь одӥг этапез йылпумъяське, выль уровень кутске, мукет ласянь, туж секыт люкиськыны адямиосын, кудъёсыныз артысь артэ дас ар пала ортчытэмын. Но шумпотӥсько, матысь дыре выль тодмоос, эскеронъёс луозы, соосты но дано потыны кулэ луоз. Школалэн пумаз-йылаз вуонозь кык арня пала гинэ кылемын, али мон валасько, макем дуно вал та школаын ортчытэм дыръёс, кыӵе сюлмаськонтэм вал мынам пинал дыры. Бадӟым улонэ вамыштыса, мон уг быгаты ни берытскыны со дыре, куке ваньмыз сыӵе капчи но огшоры вал, ку ӧй вал сыӵе бадӟым кылкутон ачид азьын но анай-атай азьын. Туж жаль. Табере школае мон лыкто ни пырись-потась луыса гинэ. Та ваньмыз ӝож мылкыдъёс кылдытэ ке но, мон буйгатӥсько асме: азьланяз быдэс шаеръя гинэ ӧвӧл, мукет кунъёсысь эшъёсы но луозы.

— Туннэ тон кадь школаез йылпумъясь эшъёсыдлы мар сӥзьысалыд? 

— Вань выпускникъёс понна капчитэм экзаменационной сессия вакытэ, ваньзылы ЕГЭ-лэсь кышкан мылкыдэз палэнэ карыны сӥзисько, ведь, кызьы тросэз верало, та одӥгез гинэ улонысь эскерон. Экзаменъёсты умой сётон — азьпал улонлэн яркыт луэмез вылын уг шӧдӥськы. Целез быдэстыны тыршон, етӥз но тыршись луон — та ваньмыз кулэ луэ пуктэм ужпумъёсты быдэстонын но выль ӝуждалаосты вормонын. Экзаменъёс бере улон уг быры, улон сюрес арысен аре шугоме, выль ужпумъёс кылдо, кудъёссэ одно ик пырпотоно. Мон малпасько, экзаменъёсты умой сётоз сыӵе адями, кудӥз дась эскеронъёслы. ЕГЭ — со пробник, кудӥз возьматоз адямилэсь ужпумъёсты быдэстыны дась луэмзэ но со пробниклэн йылпумъянэз тросэз понна мотивация луоз ас быгатонлыкъёссэ будэтонын, соин ЕГЭ йылпумъянъёслы йырсазьыштонозь сюлмаськоно ӧвӧл. Та котькуд дышетскись понна ляб но кужмо палъёстэ эскерон, наукалэн пӧртэм ӧраз азинскон луонлык сётэ. Озьы ик экзамен сётон аре одно ик дышетскыны пыроно ӧвӧл. Куддыръя, секыт катьтэммытӥсь (изнурительной) дасяськон бере дышетскыны мылкыд пуксе, соку юрттыны быгатэ gap year (ар кусып кельтон — ред.). Та вакытэ мургес дышетыны луэ тунсыко луись ужан удысъёсты, астэ валаны, кытчы сюлмыд кыске, кытын быгатонлыкъёсыд шараясько, выльысь кулэ луись предметъёсты сётыны. Туннэ нуналэ выпускникъёс азьын туж паськыт быръён вань, асьме бордысь гинэ потэ, кыӵе луоз асьме улонмы.