Скал кыскисьёс тодо: котькуд пудо мусоямез вите

Туала дыре но соослэн ужзы гуртын тужгес секыт ужъёслэн одӥгез луыса кыле. Соослэн тыршемзы бордын луэ хозяйстволэн каньыл, тыр улонэз но. Тае ваньмы но туж умой валаськомы. Соин гурт удысын ужасьёс сярысь тросгес гожъяммы потэ. Та учыре ужан визитэн Бадӟым Лӧзя 1-тӥ люкет гуртысь фермае вуимы. Тодматскимы отын ужась скал кыскисьёслэн куд-огъёсыныз — Лилия Матвееваен, Людмила Плотниковаен но Мария Мавринаен.

Матвеева Лилия Александровна вордскем Бадӟым Лӧзя 2-тӥ люкет гуртын, со ик гуртэ картлы но кошкем. Куамын арлы матэ, 1992-тӥ арысен, Бадӟым Лӧзя 1-тӥ люкет гуртысь фермаын скал кыскись луыса ужа вылэм со. 

— Кема татын ужасько ини. Ӧнерея ужаме ӧз поты — дышетски Можгаын вуриськисьлы. Но кык ар ӵоже вуриськись луыса ужаны вутски ик. Татын ужаны кутскытозям, кык ар ӵоже бытовойын но ужай. Нош татчы, фермае, анае ужаны ӧтиз. Со но татын ужа вал. Ойдо, пе, лыкты, ужаса утёд, оло, кельшоз шуиз. Кема малпаськытэк, соглаш луи. Фермаын ужаны мыным кельшиз но, татчы ужаны кыли ини. Та сярысь ноку но ӧй жаля, ужме яратӥсько мон, ӵемысь секыт луэ ке но. Тани, асьтэос адӟиськоды — уж уг быры, — шуэ Лилия Александровна, огдыре ужзэ ужаса но монэным вераськыса.

Ужзэ капчиен уг лыдъя ке но, кышномурт ӝожтӥськыса номыр но ӧз вера. Вазь ӵукна ужан интыязы лыктыса, соос пудоослэсь сиён тусьёссэс, пыдулъёссэс сузяло, скалъёсты утялто. Берлогес ӵукна вить часысен скалъёсты кыскыны кутско. Собере нош куро пыртоно, сое вӧлдоно... Скал кыскисьёслэн ужзы соин гинэ но уг йылпумъяськы али. Озьы нуналысь нуналэ. Яра али туала дыре фермаосын скалъёслы сиёнзэс трактор пыртэ, талы Лӧзяысь фермаын ужасьёс но пумтэм шумпото.

— Ми куинь ӵошен ужаськомы — мон, Мария Маврина но Людмила Плотникова. Куиньнамы куспамы керетытэк, тупаса, быгатэммыя ог-огмылы юрттыса, ог-огмес вошъяса ужаськомы. Даллашеммы но ӧвӧл, зэмзэ верано ке, мон даллашыны уг быгатӥськы, — шуэ Лилия Александровна, — кыӵе ке валантэмъёс луизы ке но, куспамы вераськыса, йӧноен гинэ кылдэм шуг-секытъёсты радъяськомы. Адями адямиен вераськыны, огъя кыл шедьтыны быгатыны кулэ.

Пудоосты яратӥсь нылкышноез скалъёс но ярато вылэм. Лилия Александровна вераз, солэн но, валче ужано нылкышноосызлэн но быдэн 65 йыр кысконо скалзы лыдъяське шуыса. Соос пӧлын пӧртэмъёсыз вань ке но — кылзӥськисьёсыз но кылзӥськисьтэмъёсыз, асьсэды умой но урод возисьёсыз — котькудӥзлы нимысьтыз дыр висъяно, котькудзэ кулэезъя утёно, шуэ со.

— Ваньзэс огкадь яратӥсько, пудоосме люкылэме ӧвӧл. Врач висисьёслы «тон висиськод, мон тонэ уг учкы» шуыса уг вера ведь. Милям но ужамы озьы. Кыӵе гинэ скал медаз луы, котькудзэ яратоно, соос яратэмез шӧдо. Тани мон аслэсьтым котькуд скалме кушемнимызъя но тодӥсько, — шуиз пальпотыса Лилия Александровна но скалъёсын тодматыны кутскиз.

— Мыным ньыльдон тямыс арес ини, ӝыны улонлэсь троссэ мон татын, фермаын ужасько. Яра ли ферма вань шуыса улӥськомы ини ми. Гуртлэсь кыдёкын ӧвӧл, пыдын но лыктыны луэ, гужемзэ велосипедэн ветлӥсько. Огъя вераса, ваньмыз ласянь ракат. Тани валче ужано Людмилалэсь но юалляськемды луэ. Со но туж кема ужа ини татын, — шуиз но, скалъёслэсь пыдулъёссэ сузясь нылкышно шоры возьматӥз Лилия Александровна.