Скал кыскисьёс тодо: котькуд пудо мусоямез вите — 2-тӥ люкет

Со нылкышно Людмила Калистратовна Плотникова луэ вылэм. Лилия Александровналэсь но кемагес ужа вылэм ини со татын — 1987-тӥ арысен.

— Мон та палась ӧвӧл, — асэныз тодматыны кутске нылкышно, — Свердловск улосвылысь. Татчы ӵыжы-выжыосы луэмысь бертыны малпай. Крановщицалы дышетски ас дырам. Но асме кӧня тодӥсько, котьку пудоен ужай, дышетскем ӧнерея ӧй ужа. Кунян сюдӥсь луыса ужай дас кык ар ӵоже. Собере скал кыскыны кутски. Али но тани скал кыскись луыса тыршисько.

Людмила Калистратовна кунянъёсын ужаны капчигес вал шуыса вераз. Малы ке шуоно скал кыскисьлэн ужан дырыз вазь ӵукнаысен кутске, бер ӝытозь кыстӥське.

— Нырысь секытгес вал ке но, сыӵе ужан графиклы дышыны тупаз. Мукет уж ӧй вал бере, кытчы пырод? Мазэ ке тодымтэ, валамтэ учыръёсы валче ужась кышномуртъёс юрттыны дась вал котьку. Вылаз ик азьло пудо йырлэн лыдыз но, туннэен ӵошатыса, ӧжытгес вал. Сыӵе дыре котькуд пудоез аслэсьтыд вить чиньыдэ кадь тодӥськод, матын учкиськод ведь. Али соос тросгес бере, котькудӥзлы нимысьтыз саклык ӧжытгес висъяны тупа, соослы мусоян уг тырмы, — вера опытэн скал кыскись. — Но котькыӵе дыре ужад ке но, выламы трос пудо лыдъяське ке но, ми ум вунэтӥське: котькуд пудо мусоямез вите.

Ужзэ азьланьтыса, Людмила Калистратовна но аслаз скалъёсыныз матысенгес тодматыны кутскиз. Одӥгез возьдаськись, кыкетӥез кышкась, куинетӥез интыяз сылыны валасьтэм шуэ… «Нош таиз кыӵе?» — юасько скал кыскисьлэсь, одӥгез кыдёкынгес сылӥсь скал шоры возьматыса. Нош солэн котькудӥз пудо сярысь вераны ответэз дась ини. «Таиз Лиза. Та скалэз мон тужгес яратӥсько, татын ужасьёс но ваньзы сое ярато. Со юрт скал кадь, туж чылкыт, ӝикыт. Лиза кадь скалъёсын ужаса, пудолэсь жадёнэз но уд валаськы. Соин дорын но пудо утем потэ».     

Нылкышно мадиз, татын ужасьёслы возёс чабей, турын, куро но сётэ шуыса, ужасьёс понна бадӟым шумпотон луэ со.

— Мынам, кылсярысь, дорам но пудое вань. Туж ик трос ӧвӧл ке но (кык скал но кунянъёс), соосты вордон понна обществоысен сётэм турын, куро бадӟым юрттэт луэ. Гуртын улӥсь адями сое умой вала. Юртто бере, пудо но вордэм потэ.

Вераськыкумы ми дортӥ Мария Маврина ортчиз. Кияз исьнер кутыса, утялскыны кошке вал со. Ужаны дыртэмез шоры учкытэк, со но кӧня ке минут дырзэ милемын вераськонлы висъяз.

Мария Геннадьевна фермаын 2009-тӥ арысен ужа вылэм. Со дырозь Казаньын улэм но ужам, вузкарем.

— Бадӟым Лӧзя 2-тӥ люкет гуртын ӵыжы-выжыосы вань мынам, соин татчы бертыны малпай. Ини дас кыкетӥ арзэ татын скал кыскись луыса ужасько. Ужез туж капчи ӧвӧл ке но, графикмы туж умой, соиз кельше. Валче ужась нылкышноос но ас ужзылэн усточиоссы. Мон, соосын ӵошатыса, бергес ужаны лыктӥ бере, соослэсь ужамзэс учкыса дышетски шуыны кулэ. Верано ке, коллективмы туж умой, кивалтэт но юрттэ. Сменаен но тани та нылкышноосын куиньнамы ужаны потӥськомы, — шуэ Мария Геннадьевна вӧзаз сылӥсь Лилия Александровна но Людмила Калистратовна шоры учкыса. — Сыӵе тыршись но ужзэс валаса, яратыса быдэсъясь скал кыскисьёсын ужасько бере, кызьы ужам уз поты ни?

Туннэ нуналэ куиньназы ик скал кыскисьёс опыто ужасьёс ини. Ужзылэсь радзэ но соос рос-прос тодо. Огъя вераса, та ужлы соос кемалась дышемын ини. Пудоосты ярато, ог-огзылы юрттыса ужало, кивалтэтэн кусыпъёссы умой, уждунзэ дыраз басьто — каньыл ужан понна мукет номыр но кулэ ӧвӧл кадь ини.