Солдат орденъёс

ПЕТРОВ АЛЕКСАНДР ПАВЛОВИЧ
III степенё Слава орденлэн кавалерез.

Вордскемын 1923-тӥ арын Улын Ушма гуртын. Тодон-валан люка Покчи Лӧзя школаын. Ужан сюрессэ колхоз производствоын тыршыса кутске. 1942-тӥ арын гужем армие басьто. Нимысьтыз дасяськемез бере самоходной артиллерийской установкалэн (САУ) водителез, старшой сержант луэ. Трос секыт ожъёсы пыриськылэмын, кӧня ке пол сӧсырмылэмын. Вордскем музъемзэ, Балтика дорысь республикаосты, Чехословакиез но Польшаез фашист киултӥсьёслэсь мозмытыса, солы кузь но секыт ож сюресэз ортчыны тупа. Дано Вормон нуналэз пумита Берлинын. Вормон бере но али солы армиын кема служить кароно луэ —1947-тӥ арын южтолэзе гинэ вордскем гуртаз бертэ.

Быдӟым Атыкай ожлэн фронтъёсаз батырлыко ожмаськемез понна Горд Кизили орденэн, III степенё Слава орденэн, «За освобождение Варшавы», «За взятие Берлина», «За победу над Германией» медальёсын, Вылӥ Главнокомандующийлэн трос таукарон гожтэтъёсыныз пусъемын.

Война бере А. П. Петров кема аръёс ӵоже Ленин нимо колхозын огшоры ужъёсын ужаз.

(Гарифзян Мухаметшинлэн энциклопедиысьтыз)