Соос орденэн бертӥзы

Но котьку сюлмамы улоз, ноку уз вуны ожысь солдатъёслэн, гуртъёсын но городъёсын улӥсьёслэн лэсьтэм подвигъёссы. Быдӟым Отечественной война возьматӥз, куке одӥг солдат яке офицер быдэс армилэсь улонзэ утиз, Вормонэз матэктытӥз. Ӵектӥськом Ӟаны шоръёзо школаысь «Даур куара» шаертодонъя музейысь Кенешлэн ёзчиосызлэн 2016-тӥ арын дасям школа микрорайоназы пырем гуртъёсысь войнае ветлэмъёс сярысь «Соос орденэн бертӥзы» проектэнызы но солэн геройёсынызы тодматскыны Туннэ героймы — Ӟаны гуртысь III степенё Слава орденлэн кавалерез Кунаев Михаил Прокопьевич. 

Красноармеец Кунаев Михаил Прокопьевич вордскемын 1909 арын Ӟаны гуртын огшоры крестьян семьяын. Горд Армие басьтэмын 29 июне 1942 арын, нырысетӥзэ оже пыриське 10 июле 1942 арын. Ожмаськемын 235-тӥ стрелковой дивизиысь 801-тӥ Тильзитской полкын рядовой солдат, стрелок луыса. Секыт ожъёсын куинь пол сӧсырмылэмын. 1945-тӥ арын оштолэзе Кёнигсберг городэз штурмовать каронэ пыриське. Ожын кышкасьтэм луэмез понна кык пол данъямын.

1945-тӥ арын 6-тӥ оштолэзе нырысетӥосыз пӧлын Кёнигсберг вӧзысь Такенвальде гуртлэсь юнматэм обороназэ пазьгон понна атакае ӝутске, гранатаеныз пулемётэз пуштытыса, отделениысь боецъёслы азьлане сюрес усьтэ. Кышкасьтэм, батырлыко луэмез понна Михаил Кунаев пусъемын III степенё Слава орденэн. Герой-землякмы кыкетӥзэ Кабибульде гурт понна ожмаськонын ассэ возьматэ, нырысь ик атакае ӝутскыса, немец траншеяе пыре но 3 фашистэз быдтэ. Та подвигез понна красноармеец Кунаевез «За отвагу» медален пусъё. 

Армилэн радъёсысьтыз вордскем палъёсаз Кунаев Михаил Прокопьевич 1945-тӥ арын коньывуон толэзе бертэ. Война бере Киров нимо колхозын тылпу кысонъя командаен кивалтэ. Кулэ 1968-тӥ арын.