Шошма удмуртъёслэн тужгес яратоно крезьгуръёссы чузъяськизы Казаньын

Таиз «Древо жизни» — «Обряды детства народов Татарстана» проектлэн кыкетӥ пумиськонэз луиз ини. Со Казаньысь Горький нимо паркын ортчиз. Та пумиськон бигер, ӟуч, удмурт, пор, чуваш, мордва но башкир калыкъёслэн нылпи лулчеберетэзлы, сям-йылолъёсызлы, нылпи шудонъёслэн пӧртэмлыкъёсызлы сӥземын вал. Озьы ик нимысьтыз висъяны луэ пӧртэм сэрегъёсты, кытын ортчытӥськизы мастер-классъёс: мунё, дэмдор, горд сюйлэсь шудонъёс, кулэсь синпельлы арбериос лэсьтон.

«Древо жизни» проект 2022-тӥ арысен кутскыса радъяське. Ужрад быдэсме Казань Мэрилэн ӵектэмез улсын, Ассамблеялэн но Калыкъёслэн эшъяськон юртсылэн, бигер кылэз но Татарстан Республикаын улӥсь мукет калыкъёслэсь анай кылъёссэс утёнъя но азинтонъя Комиссилэн юрттэменыз.

Асьме ёросысь «Инвожо» ансамбль сяна та ужрадэ Казаньысь, Тукай, Новошешминской, Лаиш, Арча но Зеленодольск ёросъёсысь нылпи фольклор коллективъёс но пыриськизы.
«Инвожо» фольклорно-этнографической ансамбль (кивалтӥсеныз — Виктор Камаевен, визьноданъя но ДОО-ен кусып возёнъя советникен — Анна Смердоваен) та паськыт вӧлмем проектэ аслэсьтыз люкетсэ пыртӥз. Йӧскалык дӥськутэн пиналъёс сцена вылын сюан йылоллэсь люкетсэ но шошма удмуртъёслэсь «Семык шудонъёссэс» возьматӥзы. 

— Милям ансамбльмы яркыт, чебер йӧскалык дӥськутэныз но мур пуштросо крезьгуро-эктон аспӧртэмлыко выступлениеныз синмаськытӥз. Коллективмылэн задор мылкыдо луэменыз, адӟисьёс но эктыны дась вал. Кужмо кичабонъёс кема чузъяськизы на. Коллективен туспуктыны мылкыд карисьёс но ӧжыт ӧй вал. Дышетскисьёс каньыл мылкыдэн, шумпотыса доразы бертӥзы. Нимысьтыз тау шуыны кулэ проектэз радъясьёслы но, соос туж шуныт пумитазы, таӵе бадӟым проектэ пыриськыны луонлык сётӥзы, — проектэ вуылэмзы сярысь йылпумъянъёс лэсьтӥз Анна Витальевна.

Туала улонамы котькуд калык аспӧртэмлыко сям-йылолъёсыныз но дӥськутэныз висъяське. Калыкъёслэн куспазы улэмзы туж юн ужпум луыса сылэ: ёросамы но элькунамы пӧртэм вожвылъяськонъёс ортчо, фестивальёс но адӟытонъёс радъясько, озьыен, пиналъёс но егитъёс калык лулчеберетэн юнгес тунсыкъяськыны но эшъяськыны кутско. Вордскем кылзэс но котырзэс гажаны но утьыны дышетско. 

Калык сям-йылолъёсты утён но вӧлмытон — туж бадӟым но кылкутымон ужпум. Та понна трос гинэ кужым сётоно, но макем трос адями тырше ас лулчеберетсэ азинтон ужын, сокем узыр луэ солэн емышъёсыз. 

Таӵе бадӟым но шулдыр проектъёс тросгес мед луысалзы но нылпиосмы эшшо но юнгес калык улонэ мед кыстӥськысалзы! Азьланяз эшшо но ӝужытэсь вырйылъёсы тубыны кужымды медло!