«Сюлэмлэсь шунытсэ нылпиослы сётӥсько…»

Бен, секыт луоз-а котькуд нунал шудыны, урамын ветлыны, суредаськыны, соосын кылбур, кырӟан дышетскыны, соосты сюдыны, изьыны выдытыны? Туж капчи вераны. Нош со озьы ӧвӧл! Визьнодасьлэн ужез — со яратонэз, чиданэз но кужымез кулэ карись нуналмысь секыт но ӝег уж. Визьнодась котькуд нылпи понна анай но, ӟеч эш но, дышетӥсь но луыны кулэ. Василий Сухомлинскийлэн вань таӵе усто кылъёсыз: «…зэмос визьнодась луон понна, сюлэмдэ нылпиослы сётоно». Соин но та статьяямы вераммы потэ ӵош ужась эшмы, Самсонова Лариса Петровна сярысь.

Вордскиз со куартолэзе Тагашур гуртын Елизавета Эшкнаевна но Пётр Васильевич Байтугановъёслэн семьяязы куинетӥ нылпи луыса. Атайзэ исполкоме инструктор карыса ужаны басьто. Соин ик улыны но Балтаче кошко. Анаез бытовой фабрикаын ужаны кутскем. Аресъем нылзэс нылпи садэ сётӥллям. Озьы удмурт нылаш нырысетӥысен дасэтӥ классозь Балтач шоръёзо школын дышетске.

Пичи дырысеныз ик Ларисалы калыкен кусып возён, инкуазез: нюлэсъёсты, будосъёсты, пойшуръёсты — яратон мылкыд пыӵатӥз атаез. Угось Пётр Васильевич трос аръёс ӵоже школаын химияя но биологияя урокъёсты нуиз. Соин но Лариса Петровна атаезлэсь ужан сюрессэ бырйиз, дыр. Школаез йылпумъяса, со Казаньысь дышетӥсьёсты дасянъя институтэ пыриз. Нош 1990-тӥ арын химияя но биологияя факультетэз йылпумъяз.

Котькинлэн ужаны кутскон сюресэз аспӧртэм. 1990 арын ик Лариса Петровна ужаны кутске Шор Кушкет школаын, химияя но биологияя дышетӥсь луыса. Нош 1991 арын Пор-Кутеш гуртысь Самсонов Юрий Кузьмичен семья кылдыто. Кузпалэныз ӵош куинь нылпи будэто. Юрий Кузьмич труба тырон кранэн ужаз. Солэн ужез кыдёкын луэмен, толэзьёсын дораз бертыны ӧз быгатылы. Нылпиоссэ вордыны Лариса Петровналы Юрий Кузьмичлэн анаез но атаез юрттӥзы. Нылъёссы быдэ вуэмын ини. Асьсэ семьяоссэс кылдытыса уло. Покчи пизы, Сергей, дышетске кыкетӥ курсын аграрной университетын. Лариса Петровна туж шумпотэ ӵужанай луэмезлы но.

Гажано кышномурт Шор Кушкет школаын пӧртэм ужъёсын ужаз: библиотекарь но, интернатын визьнодась но луиз. Нылпи садын визьнодась луыса ужаны кутскиз 2003 арысен.

Лариса Петровна аслэсьтыз ужзэ яратыса быдэсъя. Нылпиосты яратэ. Ӵош ужась эшъёсыныз котьку лякыт вераське. Тыршись, визьмо, ужзэ тодӥсь адямиен адӟиськомы ми сое.  Яратэ книга лыдӟыны, крезьгур кылзыны, киужъёсын вырыны. Нылпиос но Лариса Петровнаез ярато, анай-атайёс ӟеч кылын верало.

Куартолэзе Лариса Петровналы 55 арес тырмоз. Ми малпаськом, со азьланяз но шудбуро, таза луыса, выль азинсконъёсы вутскыса, семьяяз ӟеч кусыпъёссэс утьыса ужзэ тазьы ик азинтоз шуыса.

Шор Кушкет шоръёзо школаысь дошкольной образования директорлэн кивоштӥсез Асанова И.В. но Шор Кушкет шоръёзо школаысь визьнодась

Якимова Л.А.