Тӥ ке вӧзын, улонмы но шулдыр...

Кузнецова Римма Павловна

Римма Павловна вордскиз сыӵе семьяын, кудаз одӥг нуналэз но  ӝӧквылын сылӥсь кружка йӧлтэк син азе пуктыны уг луы. Адӟонэз сыӵе луэ: Римма Павловналэн вань улонэз йӧлэн герӟаське. Анайзыез, Лидия Кузнецова, гумыраз скал кыскем; атайзыез но, Василий Кузнецов, колхозын тыршем, комбайнэн но ужам, кочегар но луэм, нош пенсие озьы ик скал кыскон удысысен потэм. Аслаз анай-атаез но, Любовь но Павел Фёдоровъёс, фермаын ужаллям (анаез скал кыскись луэм, атаез нырысь пудо утись, собере — кочегар).

— Семьяын ми куать кузя нылпиос, мон куинетӥез. Ваньмы фермаын будӥмы ини. Анай-атайлы фермае юрттыны васькиськом вал, нош бадӟым классъёсын анай интые ужаны ик ветлӥ ни, — шуэ Римма Павловна.

Школазэ йылпумъяса, со татчы ик, фермае, ужаны интыяське, соку ик заочно бухгалтерлы дышетскыны но пыре, соку ик гуртысьтыз пилы, Юрийлы, картлы но бызе — ваньмыз одӥг аре. Вукогурт егит ныллы улон но, уж но, яратон но кузьма. Та гуртысь со ини нокытчы но уг кошкы. Фермаын но со туннэ нуналлы ини 23 ар ужа вылэм. Фермачиослэн семьяязы вордскыса, школаын дышетскыкуз ик анай-атаезлы юрттыса фермае ужаны ветлэм аръёссэ чотэ басьтӥд ке, 23 арлэсь но тросгес... Вераны капчи, нош кӧня шуг-секыт, ма быдӟа тыршон та лыдпусъёс сьӧрын ватско! Нуналысь нуналэ, арысь аре кӧня тыршоно луиз солы, праздник нуналъёсты адӟытэк — со ачиз гинэ тодэ. Римма апай скал кыскись луыса ужаны кутске, аслаз группаез но луэ солэн. Туннэ нуналэ со — технолог по воспроизводству (огшоры кылын вераса, скалъёсты бызьылытӥсь), озьы ик 2017-тӥ арысен лаборант но. «Шутэтскон ӧвӧл, котькуд нунал фермаын. Аслэсьтым одӥг нуналме гинэ верало ай: ӵукна ньыль часэн султӥсько, дорысь скалъёсты кыскыса кошкисько фермае, нышырозь дорам бертӥсько но сиён пӧзьтӥсько, пудо радъясько но ӝыт нош ик фермае кошкисько. Бер гинэ отысь бертӥсько. Озьы нуналысь нуналэ улон ортче».

Но та ӝожтӥськон кылъёс ӧз луэ. Фермаын будэм бере, ужлэсь секытсэ шӧдымтэ но, валамтэ но Римма апай. Ненормированной график но сое уг кышкаты, нуналаз фермае кык пол ветлон но ужезлэсь уг палэнты. «Ферма уж сётэ. Яра али фермамы вань. Ферма быриз ке, гурт но быре», — гинэ шуэ. Та кылъёсын ваньзы соглаш луозы. Бен, Вукогуртын котькуд коркалы быдэ фермаын ужасьёс вань кадь. Кытын бен нош ужалод гуртын? Капчи ӧвӧл ке но, гуртысь калык та ужлы пичиысен дышемын. Азьвыл фермаын кык адямилы 50-лэсь тросгес скал ке вал, туннэ нуналэ сомында ик адямилы 100-лы матэ скалъёсты оско. Но азьло дыре молокопровод луымтэ, йӧлэз ведраен нуллоно луэм, со сяна но фермачиослэн ужзы шӧдскымон капчиёмиз. Кызьы луиз ке но, Римма апай ноку но фермаын ужаны кутскемез сярысь жалямтэ, шонергес вераса, солэн жаляны дырыз луымтэ — вазь ик картлы кошкем егит ныллэн огез сьӧры огез куинь нылпиосыз вордско — Александр, Владимир но Мария. Нылпиосыз но семьяез Римма Павловна понна котьку нырысетӥ интыын луо. Матысьёсызлэн юрттэменызы нылкышно, пӧртэм конкурсъёсы пыриськыса, призо интыос басьтэ. Данъян грамотаосыз ӧжыт ӧвӧл ке но, Римма Павловна вера: «Ми диплом понна ум ужаське. Улонын самой валтӥсез — семья. Семьяе, нылпиосы — мынам бадӟым поддержкае, юрттэтэ — ужын но, улонын но. Нылкышнолэн мукет сямен луыны но уг быгаты, дыр», — шумпотэ Римма апай.

Туннэ нуналэ Римма Павловналэн ассэ шудо кышно, шудо анай — шудо нылкышно шуыны мугез ӧжыт ӧвӧл: бадӟым семьяын со яратымон но яратӥсь кен, кузпал но анай.